2018/19: 法寶的使用

FPL Guy 於 07/08/2018 發表 收藏文章
首先就提提大家,第1週嘅截止時間係香港時間11/8嘅凌晨2:00,大家記得喺呢個時間之前執好個陣喇。今次想同大家講下FPL嗰4個法寶點樣用先可以發揮到佢哋嘅最大效用。法寶用得好,可以幫球隊拎到唔少分數;用錯就真係嘥晒喇,希望大家都會用得啱啦。
  1. Bench Boost:於下一週嘅比賽,後備席嘅得分將會計算在內。
  1. Free Hit:於一個比賽週能夠任意進行轉會並且唔扣分,但下一週比賽前,球隊將會變返未用法寶前嘅陣容。
  1. Triple Captain:於下一週嘅比賽,隊長得分將會乘3。
  1. Wildcard:週嘅所有轉會都毋須扣分。

Wildcard
Wildcard係每半季有1張,即使上半季唔用,下半季都唔會有2張嘅。其實,係咁多個法寶之中最隨心嘅,係睇大家幾時有迫切需要就用。以下係幾個常見玩家會用Wildcard嘅處境:
  • 自己隊波開季表現不似如期,唔換唔得。
  • 季初同時間有過多傷兵,尤其是國際賽後。
  • 上半季已經過咗一半,咁都係時候睇睇各隊未來10場嘅賽程計劃下大概個陣容,賣走啲將會同Big 6對賽較頻密嘅球員。
Wildcard的使用:首先好似平時咁換人,不過就可以換多過一或兩個球員,然後確定轉會後㩒”Play Wildcard”而唔係扣分換人,之後再㩒”Make Transfer”同”Confirm Transfer (and Play Wildcard”,咁就完成嫁喇。當Wildcard-旦被確認使用之後,係冇得返轉頭嘅,不過就可以喺截止時間之前作出無限次轉會。

Bench Boost
Bench Boost顧名思義,即係唔止得正選有分,喺嗰一週連後備嘅得分都會計埋。一般嚟講,都會係喺其中一個一週雙賽嘅時候用比較著數,因為大部份球員都打多一場,即係嗰週有180分鐘俾佢哋搶分,一般分數都會較平時高。一週雙賽通常都係下半季至會出現,主要係因為英超球隊喺原定比賽日撞咗本土盃賽賽事,但亦都有可能係因為之前嘅比賽因各種原因嘅延期而出現,例如:天氣過於惡劣。唯一要注意嘅係揀嗰15個球員都會落場,如果唔係就嘥咗個Bench Boost。
Bench Boost的使用:喺Bench Boost度㩒”Play”再㩒”Confirm Transfer”就得喇,陣都唔洗排。

Free Hit
Free Hit係喺其中一週嘅比賽前可作任意轉會,而唔需要扣分,不過喺再下一週,球隊就會變返用Free Hit前嘅陣容。同Wildcard嘅分別就係,用Wildcard轉完陣就係永久性,冇再作轉會個陣容就會一直保持;而Free Hit嘅轉會就只係一次性,只會持續一週。我覺得最有效用Free Hit嘅時候係當某一週唔係每隊都有比賽嘅時候,有機會因為部份球隊要打本土盃賽而打唔到聯賽,造成只有4至6場比賽,一般嚟講,大部份FPL玩家嘅球隊應該都會有唔少球員冇得出場,咁呢個時候用Free Hit就啱晒。大家就可以嗰週將所有資金投放落睇好嘅嗰幾隊嘅球員身上。當然,如果唔係有太多球員缺席少比賽嘅週的話,大家都可以留返一週雙賽嘅時候用,呢個都係Free Hit嘅另一個選擇。
Free Hit的使用:首先好似平時咁轉會,當轉好晒之後就㩒”Make Transfer”,然後再㩒”Play Free Hit”,之後再㩒”Confirm Transfer (and Play Free Hit)”就得喇。記住一經確定用Free Hit後就冇得返轉頭。一旦Free Hit係Active,大家就可以喺截止時間前作任意轉會而唔需要被扣分。

Triple Captain
Triple Captain係可以將隊長其中一週嘅比賽得分乘以3。Triple Captain其實都冇話幾時用個優勢會大好多,隨時其中一週嘅比賽都有球員腳風順,大演帽子戲法,真係話唔埋。如果選擇一週雙賽用但隊長冇入球都係少少浪費咗,只不過一週雙賽,隊長有兩場比賽爭取高分,論機率點都高過平時嘅,所以都有唔少嘅玩家選擇一週雙賽嘅時候用Triple Captain。
Triple Captain的使用:首先喺轉會版面個Triple Captain度㩒”Play”,之後再確認就完成。一旦Triple Captain已經Active,大家都可以喺截止時間前隨時轉隊長。

最新消息,FPL Guy已經成立咗一個league名為FPL Guys,大家快啲邀請埋你哋嘅朋友一齊加入,互相切磋同交流啦!越多人玩,越熱鬧,希望聚集到一班熱愛玩FPL嘅朋友!Code to join: 1000936-577294

下一篇將會係開季前嘅最後一篇,我會排出我認為最好嘅陣容,希望透過少少嘅分析,令大家有所得著,同玩得更開心。

請不忘讚好我的專頁:https://www.facebook.com/fplguy1905/
標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→