2018/19: 世界盃對球員開季出場時間的影響

FPL Guy 於 29/07/2018 發表 收藏文章
鑑於今屆嘅世界盃距離英超開季只有四星期,通常球會都會俾有份踢世界盃嘅球員放三至四星期假,咁即係意味住一部份有踢世界盃嘅球員可能要到開季嗰個星期至歸隊。就算趕得切8月前歸隊,歸完隊,參與操練,操返起個態,再落場交到表現都需要啲啲時間。有時亦有可能係球員好想落場比賽,但係領隊或者教練要佢哋繼續休息。咁我哋依家就睇下有邊啲球員因為咁而好大機會冇得出場,而邊啲球員又會因為咁而多咗出場時間。選擇咗以下呢幾隊嘅原因就係因為呢幾隊有較多進入到世界盃最後階段嘅球員。
車路士(Chelsea)
車路士都有唔少嘅球員進入到世界盃嘅最後四強,包括:法國嘅基奧特(Giroud)同簡迪(Kante);比利時嘅夏薩特(Hazard)、古圖斯(Courtois)同巴舒亞伊(Batshuayi);英格蘭嘅卡希爾(Cahill)同羅夫度斯卓克(Loftus-Cheek)。當中亦只有巴舒亞伊、卡希爾同羅夫度斯卓克唔係國家隊常規正選,其他球員都接近踢足每場比賽。假設以上呢幾位球員今夏都唔會離隊,夏薩特同簡迪必然係來季車仔嘅正選,但基於佢兩個都打到去世界盃嘅最後兩日,頭兩場嘅比賽應該都唔會踢足。因為咁,初期夏薩特嘅位置應該會由韋利安(Willian)或者柏度(Pedro)頂住先;而簡迪喺中場比較防守性嘅位置應該會由今夏新加盟嘅佐真奴(Jorginho)出任。上季尾車仔嘅中鋒位都係由基奧特出任,但考慮到基奧特幫法國踢埋決賽,莫拉達(Morata)季初應該都會有唔少機會表現自己。不過,睇完車路士嘅熱身賽,發覺莫拉達嘅護球能力依然係有啲差。
曼城(Man City)
曼城同樣有唔少嘅球員進入到世界盃嘅最後四強,包括:比利時嘅迪布尼(De Bruyne)、甘賓尼(Kompany);英格蘭嘅史達寧(Sterling)、獲加(Walker)、史東斯(Stones)、戴爾夫(Delph);法國嘅文迪(Mendy)。除咗戴爾夫同文迪之外,其他球員都得到頗多嘅比賽機會。照牌面睇,曼城季初應該會用早早喺十六強已經出局嘅阿根廷中堅奧達文迪(Otamendi)夥拍冇份出戰世界盃嘅拿樸迪(Laporte)鎮守中路。中前場亦有機會俾迪布尼同史達寧休息一下,最大嘅得益者相信會係冇份為德國出戰世界盃嘅辛尼(Sane)同新加盟嘅馬列斯(Mahrez)。

曼聯(Man Utd)
至於曼聯就有法國中場普巴(Pogba);比利時嘅盧卡古(Lukaku)同費蘭尼(Fellaini);英格蘭嘅連加特(Lingard)、鍾斯(Jones)、拉舒福特(Rashford)同楊格(Young),進入到世界盃嘅最後四強。估計曼聯應該季初會起用史摩寧(Smalling)同拜利(Baily)打中堅。由於曼聯嘅中前場人手比較緊拙,估計摩連奴應該都唔會同時俾晒咁多位中前場球員休息,預計佢會作出適當嘅輪換,推測馬斯亞(Martial)同阿歷斯山齊士(Alexis Sanchez)理應會喺季初得到唔少上陣機會,但聽聞馬斯亞同摩連奴嘅關係好似麻麻地,呢點都需要留意。
熱刺(Spurs)
熱刺今屆有好多球員有份出戰世界盃,當中能夠踢到最後四強嘅,包括:法國門將洛里斯(Lloris)同穆沙施素高(Sissoko);比利時嘅艾達韋列特(Alderweireld)、華湯根(Vertonghen)、丹比利(Dembele);英格蘭嘅哈利卡尼(Kane)、迪利阿里(Alli)、查比亞(Trippier)、路斯(Rose)同戴亞(Dier)。另外,南韓國腳孫興民(Son)亦為咗唔想服兵役而為國出戰亞運會而確定缺口熱刺頭四輪嘅英超賽事。只要佢幫南韓拎到金牌就可免除28歲前進入軍隊服役。預計熱刺季初嘅左閘將會由賓戴維斯(Ben Davies)任正選,而早早喺十六強已經出局嘅哥倫比亞中堅達雲臣山齊士(Davinson Sanchez)將會係其中一個中堅。因為孫興民要出戰亞運同迪利阿里帶領英格蘭殺入世界盃四強嘅關係,預計拉美拿(Lamela)同盧卡斯摩拉(Moura)都會多返唔少機會。

利物浦(Liverpool)
相比起其餘四隊,利物浦球員能夠晉身到世界盃較後階段嘅人數都比較少,當中包括:克羅地亞中堅洛夫雲(Lovren);英格蘭嘅軒達臣(Henderson)同阿歷山大阿諾(Alexander-Arnold)。利物浦季初嘅中堅好大機會會由雲迪克(van Dijk)拍住馬迪普(Matip),但可惜馬迪普於季前熱身賽對多蒙特(Borrussia Dortmund)嘅時候不幸受傷,依家就要睇睇馬迪普嘅康復情況同洛夫雲歸隊後嘅狀態。至於右閘,雖然阿歷山大阿諾跟隨住英格蘭殺入世界盃四強,但佢並唔係英格蘭嘅常規正選,所以佢體力上就應該冇乜問題。不過,唔知道高普會唔會第一場就即刻起用佢,定係會俾個機會上季受傷患困擾而苦無出場機會嘅佳尼(Clyne)呢?相信來季軒達臣都會係利物浦三中場之一嘅正選,但由於佢帶領英格蘭去到四強,季初可能都會得到一啲休息嘅機會,咁利物浦三中場裏面,新加盟嘅拿比基達(Keita)同法賓奴(Fabinho)應該都會係鐵膽。
如果大家想開季前更清楚知道各隊嘅正選十一入係邊個,就請密切留意各隊嘅季前熱身賽同轉會消息。下一次會同大家講下賽程對於排陣嘅影響。

最新消息,FPL Guy已經喺Facebook開咗專頁喇,歡迎大家去睇下!如果大家鐘意呢個專欄,就請like同share同埋訂閱呢個專欄啦!你哋嘅支持,就係我繼續寫文嘅動力。
FPL Guy Facebook專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→