2018/19: 季前球員CP值的比較 精選

今屆嘅俄羅斯世界盃上星期已經圓滿結束，首先喺呢度恭喜法國國家隊奪冠！世界盃嘅完結，代表新一季英超又就快開鑼。提提大家，第一週嘅截止時間係香港時間11/8嘅凌晨2:00，通常個截止時間都係每週首場比賽前嘅1個鐘。2018/19嘅英超揭幕戰將會係曼聯喺奧脫福主場迎戰李斯特城，時間係香港11/8嘅凌晨3:00。

今次主要係用球員嘅場均得分同性價比同大家分析返究竟邊啲球員係比較抵玩。點解會用CP值呢？因為我覺得如果齋睇邊個球員入得多波或者交得多助攻其實係冇乜意思，係人合埋雙眼都會識放哈利卡尼（Kane）同沙拿（Salah）落去，但問題係現實我哋受到資金嘅限制，淨係哈利卡尼（12.5M）同沙拿（13.0M）兩個加埋已經總值25.5M，超過資金嘅25%，所以大家要諗諗係咪真係要同時要晒佢哋兩個？為咗方便大家，喺大家仲諗緊應該用咩人嘅時候，小弟整咗個表，列咗每個位置嘅場均得分同CP值嘅前10至20名，希望幫到大家，喺大家砌陣嘅時候俾到少少靈感。
以下嗰幾個表只係用咗2017/18嘅英超球員數據嚟參考，並不包括今個夏天新加盟嘅球員。當中亦只包括全季出場達1000分鐘嘅球員，場均得分係以球員嘅出場時間嘅基礎嚟計算。綠色嘅格仔代表嗰一欄最好嘅數值，例如：分數最高、價錢最低、出場時間最多等等。
守門員場均得分排行榜
守門員CP值排行榜

真係唔計過都唔知卡利奧斯（Karius）係咁拎到分，無論係以場均得分定CP值去計，卡利奧斯都係數一數二，呢個真係驚喜。不過，隨住巴西國腳艾利臣比加（Alisson Becker）強勢加盟利物浦（Liverpool），相信卡利奧斯想再為紅軍出場都幾難。迪基亞（De Gea）雖然拎到好多分，但係其實性價比都唔算太高。另外，今季由已降班嘅史雲斯（Swansea）轉會到韋斯咸（Westham）嘅法比安斯基（Fabianski），雖然佢嘅不失球場數只係迪基亞嘅一半，僅得9場，但兩者分數只係相差15分，相當抵玩。

後衛場均得分排行榜
後衛CP值排行榜

後衛都一樣有驚奇，摩西斯（Moses）竟然係全英超場均得分最高嘅後衛，而鍾斯（Jones）就係性價比最高嘅後衛。唯一美中不足嘅就係，兩個球員嘅出場時間都唔係太穩定。縱觀咁多位後衛，相比起守門員，後衛嘅表現比較平均，每個後衛都有佢嘅長處。有啲雖然貴但可能拎到高分同出場時間比較多，又有啲雖然出場時間冇咁穩定但一落場就有表現，至於兩者點樣取捨就要睇玩家嘅風格。如果全部穩陣派，雖然換嚟嘅分數唔錯，但可能花費得太多資金落後衛度。如果全部都係有實力嘅邊緣人，遇著頭幾場都得唔到領隊重用的話，因為制乏出場機會而冇分，真係欲哭無淚。
中場場均得分排行榜
中場CP值排行榜

全英超得分最高同場均得分最高嘅球員都非2017/18勇奪英格蘭球員先生嘅沙拿莫屬，正因為咁沙拿將會係2018/19開季最貴嘅球員，價值13.0M。但大家買佢之前都要三思，因為以沙拿呢個價錢拎呢個分數，其實性價比都唔算太高，CP值係不入二十強。最抵玩其實係曼聯（Man Utd）雙子，馬斯亞（Martial）同連加特（Lingard），不過佢哋兩個都唔係球隊嘅必然正選。藍斯（Ramsey）如果冇病冇痛，其實都幾抵玩，不過唯一隱憂就係唔知喺雲爺爺走咗之後，喺艾馬利麾下得唔得到正選。

前鋒場均得分排行榜
前鋒CP值排行榜

至於前鋒，大跌眼鏡嘅係，一向係入球保證嘅卡尼場均得分竟然只排第五，而計CP值更加係冇埋影添。睇返個表，其實阿拿杜域（Arnautovic）同阿古路（Aguero）都係一個唔錯嘅選擇，前者有穩定嘅出場時間同性價比唔低，而後者就得分同場均得分都好高。選擇阿古路需要考慮嘅地方可能就係來季佢又會唔會再受傷患困擾，以致出場時間不似預期，畢竟阿古路都係屬於易傷嘅球員，而另一個考慮因素就係曼城（Man City）另一前鋒耶穌（Jesus）會唔會分薄晒佢嘅出場時間。畢竟每週只有一個免費轉會，買入一個球員都要盡量考慮得長遠少少，就算唔諗全季，都要諗埋過兩三個星期嘅賽程係點等等。最差嘅情況就係阿古路同耶穌輪住出，喺曼城嘅角度，咁做係非常之好，但一眾FPL嘅玩家就唔係咁諗。
下次主題會係，同大家講下世界盃對球員季初出場時間嘅影響。