Fantasy Premier League (FPL) 簡介

FPL Guy 於 18/07/2018 發表 收藏文章
唔知大家有冇玩過Fantasy Premier League (簡稱FPL)呢?呢個係英超賽會官方一款以砌陣為主嘅遊戲,玩法非常簡單,十分適合每星期都會睇英超同支持英超球隊嘅球迷。每名玩家有100M嘅資金,用嚟構建一支由15名球員組成嘅球隊,當中包括2名守門員、5名後衛、5名中場同3名前鋒,並且一隊唔可以擁有超過3名屬同一球會嘅球員。然後,玩家每週因應球員狀態、賽程等作出排陣,由15人當中選出最佳11人做正選,務求取得最高嘅分數。


FPL規則*

球隊管理
選擇你的11人
每個比賽週(Gameweek)嘅截止時間前,由15個球員當中選出最佳11人做正選,嗰週球隊嘅得分就會係呢11個球員得分加埋嘅總和。如果球隊有球員冇出場,系統會自動讓後備入替冇出場嘅球員。另外,雖然玩家可以自由選擇用咩陣式,但球隊陣式必定要有1名守門員、最少3名後衛同最少1名前鋒。
選擇隊長及副隊長
玩家喺11人大軍中,需要揀1名隊長同1名副隊長,隊長嘅分數將會乘2。假如隊長冇出場,副隊長嘅分數就會乘2。如果不幸地隊長同副隊長同時都冇出場,咁玩家嗰週就冇球員嘅分數得到加乘。
後備席的自動替補
玩家嘅後備球員會自動入替喺比賽週(Gameweek)冇比賽嘅正選球員,用嚟保障返玩家遇到一啲預計唔到嘅意外,例如:球員因傷病或比賽延期而冇參與比賽。自動替補盡量會喺唔影響陣式嘅前提下進行替補,即係位換位。如果唔得,先至會喺唔違反球隊陣式嘅基本要求下進行替補。
例子:假設玩家係用352陣式,後備席每名球員都有分數,而正選嘅其中1名前鋒冇出場,系統會自動用後備前鋒入替嗰個冇出場嘅正選前鋒。但如果玩家係用352陣式,後備席上只得2名後衛有分數,而正選嘅其中1名前鋒冇出場。喺呢個時候系統先會將放喺後備席1號嘅後衛入替冇出場嘅正選前鋒。注意:喺呢個時候系統係會先以放喺後備席1號嘅後衛去入替,而唔係最高分嘅後衛,所以後備席嘅排位都好重要!

轉會
第一週開始前,玩家可以任意買賣球員。當球季開始後,玩家每週可以得到1個免費轉會(free transfer)。免費轉會(free transfer)以外嘅球員買賣代價係總分被扣4分。如果玩家冇用到個免費轉會(free transfer),玩家係可以儲起個免費轉會(free transfer),但最多只係可以儲多1個免費轉會(free transfer),即係話玩家最多只能手執2個免費轉會(free transfer)。

球員價格
球員價格係因應市場反應而變動,即係越多人買,球員身價就會升;越多人賣,球員身價就會跌。轉會頁面上顯示嘅價格係球員嘅售價。個售價可能會低過球員依家嘅實際買入價格,咁係因為玩家要俾返50%出售球員所賺到嘅利潤。簡單嚟講,即係球員要升值0.2M,玩家賣人就賺0.1M。
以下係一個簡單嘅例子,假設你買入1個球員時用咗9.0M,到你想賣嘅時候,佢市值9.4M。當你賣嘅時候,你將會係以9.2M賣出,亦即係帳面賺咗0.2M。用返同一個例子,如果個球員只係升到9.5M,你都係會以9.2M賣出;嗰個球員要升到9.6M,你先至可以以9.3M嘅價錢賣出。

法寶
FPL一共有4個法寶俾大家用,但單一比賽週(Gameweek)只可以用1個法寶,換句話說,即係法寶唔可以同時使用,法寶簡介如下:
  1. Bench Boost:於下一週嘅比賽,後備席嘅得分將會計算在內。
  1. Free Hit:於一個比賽週能夠任意進行轉會並且唔扣分,但下一週比賽前,球隊將會變返未用法寶前嘅陣容。
  1. Triple Captain:於下一週嘅比賽,隊長得分將會乘3。
  1. Wildcard:週嘅所有轉會都毋須扣分。
除咗Wildcard之外,所有法寶全季都只能用一次。全季有兩張Wildcard,第一張Wildcard嘅使用期限係由開季至第20週(Gameweek 20),而第二張嘅使用期限係由第21週(Gameweek 21)直至季尾。

積分系統
於賽季期間,玩家隊中嘅球員將根據佢哋喺英超聯賽中嘅表現而獲得積分。積分系統簡介如下:
  • 落場比賽(最長可達60分鐘):1
  • 落場比賽時間達60分鐘或以上(不包括受傷時間):2
  • 守門員或後衛的每個入球:6
  • 中場的每個入球:5
  • 前鋒的每個入球:4
  • 每個助攻:3
  • 不失球(適用於守門員或後衛):4
  • 不失球(適用於中場):1
  • 守門員每3次成功撲救:1
  • 成功撲出十二碼:5
  • 射失十二碼:-2
  • 賽後最佳球員加分(最少3位球員獲得加分):1-3
  • 每失2球(適用於守門員或後衛):-1
  • 每張黃牌:-1
  • 每張紅牌:-3
  • 每個烏龍球:-2

聯賽
除咗本身預設咗會自動進入嘅一啲全球聯賽(例如:按國家、支持隊伍分類等),玩家仲可以同三五知己或一班波友自組聯賽較量。

盃賽
首輪盃賽將於第17週(Gameweek 17)賽事開始,於第16週排名係喺前4,194,304名嘅玩家將會自動獲得參賽資格。每支球隊將會以隨機抽籤嘅形式抽出與另一支球隊對壘。勝方(Gameweek得分最高嘅球隊減去任何轉會扣分)將淘汰對手並晉級第二輪賽事,之後同樣會以隨機抽籤嘅形式抽出另一支球隊進行淘汰賽,勝方晉級,敗者出局!呢個過程會持續到最後一週,讓淨低嘅兩支球隊決一勝負!

*所有規則皆以FPL官方網站為準,如欲知道更多規則詳情,請瀏覽https://fantasy.premierleague.com/a/help

有興趣嘅朋友可以到FPL官方網站登記:https://fantasy.premierleague.com/
各位亦可以到Google Play或Apple嘅App Store下載Premier League – Official App

今次係小弟第一次寫關於FPL嘅文章,如果大家鐘意就訂閱呢個專欄啦,下次會講下唔同位置不同球員嘅性價比,俾大家砌陣時可以參考一下。

如果喜歡我們的文章,請即分享到︰

標籤: FPL  Fantasy Premier League  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→