2018/19: 賽程對排陣的影響

FPL Guy 於 03/08/2018 發表 收藏文章
首先就提提大家,第1週嘅截止時間係香港時間11/8嘅凌晨2:00,大家記得喺呢個時間之前執好個陣。

賽程係每次排陣同揀出正選11人嘅一大考慮因素之一,即使係強隊,一遇著魔鬼賽程,太頻密嘅強強對碰,我都會盡量避免。考慮賽程嘅時候,由於每週只係得一個免費換人,所以我哋都唔可以太短視,只係考慮下一週嘅賽事。正因為咁,我哋唔單止需要揀出一個會為我哋下週帶嚟高分嘅球員,而係要揀一個未來幾週會為我哋帶嚟高分嘅球員。當然如果有嘅話,咁梗係揀一個全季都為我哋帶嚟高分嘅球員啦,但真係咁易咩?邊有咁多個沙拿呀……
喺呢度就會總結一下每隊頭4場嘅賽程,方便大家睇住個表嚟排陣,唔洗逐隊逐隊搵,歡迎大家望住嚟排。表入面嘅數字其實係英超官方訂嘅賽程難度指數俾大家參考,數字越大,難度就越高。然後,我會根據20隊嘅賽程難度分為極容易、容易、中等、困難同極困難,希望幫到大家因應各隊嘅賽程嚟排陣。

極容易
愛華頓(Everton)
利物浦(Liverpool)
愛華頓開季嘅頭4場對手都只係上季不入前10嘅隊伍同升班馬,對上季排第8嘅愛華頓嚟講,賽程可以話係相當輕鬆。至於愛華頓嘅宿敵—利物浦開季頭4場嘅賽程都唔錯,利物浦嘅對手都只係中游同中下游,對今個轉會窗大手買人嘅利物浦嚟講,應該唔成問題。大家不妨可以買多啲呢兩隊嘅球員。俾大家參考下,利物浦上季聯賽8次對呢4隊就贏足8次,所以利物浦開季頭4場比賽應該係相當輕鬆。

容易
般尼茅夫(Bournemouth)
般尼(Burnley)
水晶宮(Crystal Palace)
曼城(Man City)
屈福特(Watford)
水晶宮嘅賽程都認真唔錯,除咗第2週要對利物浦之外,其餘嘅對手都只係中下游同升班馬,係水晶宮搶分嘅好機會。如果玩家有興趣買水晶宮嘅球員,只要第2週有另一名球員同水晶宮嘅球員輪換,水晶宮都係一支值得大家喺季初投資落去嘅球隊。至於上屆冠軍曼城,除咗第一週要硬撼阿仙奴之外,另外3隊應該都唔係曼城嘅對手。雖然話就話係對住Big 6嘅阿仙奴,但唔好唔記得,上季曼城喺聯賽係雙殺阿仙奴,分別贏3比1同3比0,贏得非常之有說服力,所以第1週我會投曼城一票。

中等
卡迪夫城(Cardiff City)
車路士(Chelsea)
富咸(Fulham)
李斯特城(Leicester City)
修咸頓(Southampton)
熱刺(Spurs)
車路士嘅賽程一般,皆因喺第二週嘅賽事就需要對阿仙奴。不過,過完阿仙奴之後,都只係需要對住中游球隊。俾大家參考一下,上季車路士兩次對阿仙奴嘅賽果都係和波收場,分別係0比0同2比2。至於熱刺,佢嘅賽程難度都同車路士差唔多,熱刺就需要喺第三週作客對曼聯。提提大家,上季熱刺雖然主場贏曼聯2比0,但係作客嘅時候就係輸0比1。

困難
阿仙奴(Arsenal)
曼聯(Man Utd)
狼隊(Wolves)
阿仙奴嘅賽程都相當難打,一開季要先主場迎戰曼城,然後再緊接住作客對車路士。上季阿仙奴聯賽4次對住呢兩支球隊都係未嚐一勝。不過,阿仙奴過完頭兩場之後嘅賽程其實都算易打。至於曼聯,頭4場嘅對手其實都屬於中上游,絕對唔容易踢。曼聯除咗第3週要對熱刺之外,第2週嘅對手—白禮頓都不容忽視,皆因上季白禮頓成功喺主場擊敗曼聯,而第2週曼聯正正就係要作客對白禮頓。

極困難
白禮頓(Brighton)
哈特斯菲爾德(Huddersfield)
紐卡素(Newcastle)
韋斯咸(West Ham)
呢幾隊嘅共通點就係頭4場就已經有最少兩場要同Big 6打,當中就以紐卡素嘅賽程最為難打,頭4場就需要對熱刺、車路士同曼城。如果大家可以避免的話,就避免選擇呢幾隊嘅球員,因為佢哋失分嘅機會都比較大。

相信大家睇完呢篇文章同對上兩篇文章,都應該有個概念自己個陣係點排,下一次我就會同大家講下幾時同點樣用嗰4個法寶先發揮到佢哋嘅最大效用。

如果大家鐘意呢個專欄,就請like同share同埋訂閱呢個專欄啦!你哋嘅支持,就係我繼續寫文嘅動力。
FPL Guy Facebook專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→