真正無名英雄 一代防中馬斯查蘭奴宣佈退役

黃足坑 於 17/11/2020 發表 收藏文章
未必係歷史上最佳防中,但係馬斯查蘭奴喺呢十幾年嘅演出,相信喺唔少人心目中都佔一席位。尋日(11月16日),36歲嘅佢喺阿根廷學生隊宣佈退役。

2003年喺河床出道,馬斯查蘭奴嘅職業生涯可以用穩步上揚嚟形容。踢過河床同哥連泰斯兩支南美大球會後,馬斯查蘭奴去到歐洲第一隊波並唔係咩豪門,而係韋斯咸。喺2006年夏天,佢同另一位阿根廷球星泰維斯加盟呢支倫敦球會,但係翌年一月就被利物浦借入,同年正式轉會紅軍,而泰維斯亦轉投曼聯。去到利物浦,馬斯查蘭奴嘅表現獲高度讚賞,時任領隊賓尼迪斯曾經將佢比喻為一隻「怪獸」。而家回想,馬斯查蘭奴丶沙比阿朗素同謝拉特嘅中場的確好高水準。可惜,喺利物浦嘅幾年間,馬斯查蘭奴未能贏得任何獎盃,只係曾經喺歐聯屈居亞軍。終於喺2010/11球季離開英超,轉投西甲巴塞。

對我嚟講,馬斯查蘭奴嘅全盛時期就係喺巴塞。喺哥迪奧拿同其他領隊下,馬斯查蘭奴打過防中丶中堅,佢嘅攔截丶長傳都好出色,亦以硬淨見稱。八年入面上陣過334場比賽,係球隊不可或缺嘅人物之一。文章標題形容佢係「無名英雄」,因為最易睇嘅入波數字無法顯露馬斯查蘭奴喺場上嘅作用。334場比賽,佢只係錄得1個入波,仲要係十二碼嚟,另外有8個助攻。雖然佢係打防中,但係呢方面數字都係較少,要細心少少留意比賽先睇到佢嘅長處。

2018年一月,馬斯查蘭奴離開巴塞,同時離開主流聯賽,唔再係焦點,佢去到中超嘅華夏幸福,隊友包括同鄉拿維斯。馬斯查蘭奴之後再轉到最後一支效力嘅學生隊,完成生涯最後兩個球季。
https://e0.365dm.com/20/11/768x432/skysports-javier-mascherano_5173712.jpg?20201115231631

喺阿根廷國家隊,佢嘅名氣唔及美斯大,但係重要性不出其右。馬斯查蘭奴總共為國家隊上陣147場,係歷史上出場次數最多嘅成員。尤記得14年世界盃,阿根廷有前冇後嘅情況特別嚴重,中堅拍擋係加雷同迪米捷利斯,如果要話後場由馬斯查蘭奴一夫當關都唔過份,結果,佢當屆踢足每一分鐘,帶領阿根廷殺入決賽,最後僅敗而回;對荷蘭一戰差啲踢到爆丸,令人「縮然起敬」。同年,佢亦有隨阿根廷嚟香港獻技。而直到2018世界盃,馬斯查蘭奴仍然係踢足,當年34歲嘅佢仲係後場嘅關鍵人物。

尋日,馬斯查蘭奴表示自己一路喺比賽中付出所有,但係近幾個月發覺自己力不從心,所以決定掛靴,並多謝學生隊俾機會自己喺阿根廷結束職業生涯。雖然36歲喺現今球擅壇唔算好老,但係喺多年拼搏後,相信佢好清楚自己體能下降,再踢落去未必係最佳選擇。筆者見住一個又一個年青時嘅球星退休,真係要認自己老喇!

如果喜歡我們的文章,請即分享到︰

標籤: 馬斯查蘭奴  巴塞  利物浦  韋斯咸  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→