淺談香港「超級外援」政策 精選

相信各位球迷都聽過超級外援呢個term。呢個係港超新推行嘅外援政策，令各隊可以喺原本註六出四嘅之外，再出多一位外援球員。隨住飛馬嘅四位巴西外援人選被傳媒報導，連Transfermarkt都搵到呢幾個球員，相信各隊今年嘅外援人選都塵埃落定，今季冇一個「國腳級」外援加盟。粗略估計，而家港超應該有超過十位所謂「超級外援」，但係呢班人到底有幾超級呢？

超級外援嘅定義如下：佢哋要曾經代表世界排名前50嘅國家隊上陣，或者喺呢啲國家嘅頂級聯賽上陣過。
超級外援＝名氣大？
翻查幾個月前嘅新聞，有球會覺得超級外援有助「為球圈注入新鮮感」。換言之，港超聯希望借助超級外援嘅名氣，以吸引球迷入場。但係而家咁多位外援，無一位有畢特丶基士文丶科蘭丶施素高等人嘅名氣。筆者認為，以效力過嘅球會計，名氣最大嘅外援係南區嘅列文（喺2003-2006年曾經為富咸出戰英超）不過佢嘅英超經歷已經係咸豐年前嘅事，佢喺11/12球季已然嚟到香港踢傑志，時至今日，已經冇人會因為佢踢過英超而入場睇佢。

列文之外，好多球員因為某聯賽上陣過幾場比賽，而獲得超級外援資格，例如理文嘅基華利頓曾經喺巴甲上陣兩場丶東方嘅盧卡斯喺葡超上陣過兩場。喺超級外援政策推行之前，佢哋已經喺香港踢波，同樣地，冇人因為佢哋份CV而入場，而且佢哋亦無法「為球圈注入新鮮感」。更甚嘅係，原來「世界排名前50嘅頂級聯賽」，充斥住好多普遍港人未聽過嘅球會。好似愉園新援艾迪比帝，據報效力國多支尼日利亞超級聯賽球隊，因此獲得超級外援資格。但係，香港人連尼日利亞有咩球隊都未必知道，又點樣靠艾迪比帝吸引人入場呢？
超級外援一定好波過人？
同外國波唔同，我哋較難搵到數據判斷一個球員嘅能力，唔講數據又太過主觀，所以就唔會逐個超級外援攞出嚟討論。現今公認較為出眾嘅外援之中，費蘭度丶艾華頓丶蘇沙都唔係超級外援；而科蘭，施素高等人，踢港超時已經係職業生涯晚年，表現亦唔算突出。即使最近兩屆香港足球先生（華杜斯丶伊高）同屬超級外援，亦唔代表攞住超級外援四字就一定係超班，只係代表佢哋曾經踢過某啲聯賽 。
政策有冇弊處？
依上面論點睇，超級外援未必達到「為球圈注入新鮮感」之效但係，呢個政策變相減少本地球員出場機會。喺新政策下，每隊最多可以派多一個外援（共5個）上陣。球場上多一個外援，代表少一個本地球員。因此，本地球員嘅上陣機會自然會減少。亞洲賽嘅外援係「註3+1出4」，港超本來就比亞洲賽外援政策寬鬆，所以有部份球員，只會喺亞協丶亞冠先有機會上陣。如果上游嘅港超球會喺本地賽事用盡外援，恐怕呢個情況會再惡化。

總結
超級外援其實係一個幾有趣嘅政策，但要以此吸引球迷，超級外援門檻需要大大提高。今季可以話係呢項政策嘅試驗期，如果今年出到嚟嘅效果理想，相信唔少球迷都會樂見呢個改革。