距離世界級仲爭少少—夏蘭特 精選

上週上演德甲大戰：多蒙特對拜仁。呢場波可以話係一場對攻比賽，兩軍踢法上有好多相似之處：多長傳丶打兩邊丶有逼搶。當戰術大同小異時，球員個人能力變得更加重要。講明今場係進攻足球，筆者決定將夏蘭特同利雲度夫斯基今場嘅表現比較一下。

首先講下啲沉悶嘅數據先：夏蘭特全場錄得4次射門，有一次中龍，一個入波。Expected goal係1；至於利雲度夫斯基全場有兩次射門，一次中龍，一個入波。Expected goal係0.3，另外有兩個入波係僅僅越位。夏蘭特全場只有13次傳波，而利雲除咗有28次傳波外，當中包含一個Key Pass同一個助攻。夏蘭特有兩次失去控球，而利雲只有一次。
主隊多蒙特嘅夏蘭特，經過喺對方高位防線之間游走，並憑住佢嘅速度，接應到唔少直線，喺保定同艾拿巴身後攞波。但係佢接應皮球之後嘅處理實在需要改善，喺窄位射門偏離目標太多，而且射門都欠缺力度。左腳同右腳嘅射波都出現過呢種情況。冇記錯夏蘭特浪費咗三至四次呢類機會。我認為呢三丶四次入面，夏蘭特起碼要有一球射中龍。
https://i.imgur.com/W5X7iHD.gifhttps://i.imgur.com/HzYpbbb.gif

數字係唔會講大話嘅，夏蘭特都喺比賽入面攻入一球，同樣係突破防線，今次夏蘭特就選擇唔直接射，而係先扭過門將紐亞。呢個入波要讚夏蘭特嘅冷靜，佢決定過埋龍門，令到入波機會大增，當然佢嘅腳下功夫要有返咁上下先得。但係對住空龍射入，始終好難為自己之前嘅失機平反。
https://i.imgur.com/VxbZ8Pn.gif
另外，夏蘭特嘅身體質素好優秀，從多蒙特嘅一個攻勢可以見到。比賽34分鐘，夏蘭特引球推進，被甘美治打橫攔截，夏蘭特成個人飛起咗，但係仍然冇跌低，兼且可以繼續帶波。如果佢嘅平衡力冇咁好，或者身體質素差啲，肌肉冇咁發達，相信夏蘭特已經訓咗喺度。
https://na.cx/i/4sY74AO.gif

而利雲度夫斯基，同樣有一個窄位射波。射門位置大約喺小禁區角附近，雖然同樣係唔中龍，但係皮球只係射中網側，而且力度好夠，相比夏蘭特，筆者認為利雲喺類似情況下嘅射門質素較高。https://i.imgur.com/Kkydgmd.gif

再講佢入波嘅一球，如果話夏蘭特擅於走直線，咁利雲就係擅於搵射門空位。相比拜仁，多蒙特防線冇壓得咁前，變相利雲同梅拿等隊友，除咗向前走之外，都要向其他方向跑動嚟搵空位。利雲嘅入波係頭搥嚟，從片段所見，出波嘅盧卡斯靴南迪斯，本身斬唔到去利雲附近，要利雲喺傳中後再跑去落點位置。可見利雲喺預判，搶點都好出色。https://i.imgur.com/E1w8qlq.gif
 
總結
利雲係世界級前鋒，唔係最佳都係世界頭三，夏蘭特把握力比唔上佢係情有可原。而夏蘭特嘅射術唔係真係咁差，只係喺大賽入面，微細嘅差距就係勝負嘅分野，雖然最後拜仁係勝出一方，但計Expected goal原來係多蒙特佔優，作為前鋒嘅夏蘭特都要負上部份責任，距離世界級就係爭嗰少少。不過唔好忘記夏蘭特只係20歲，將來大把世界。