唔通香港足球真係一文不值?

黃足坑 於 07/11/2020 發表 收藏文章
相隔大約十個月,香港足球再次開放俾球迷入場。各大傳媒當然會紛紛報導呢單消息。當中筆者喺立場新聞嘅帖文入面,驚見唔少向本地波大潑冷水嘅人。「家下本地球員一個都唔識,算吧啦!」如果係善意批評,好多人都會接受。但聽到呢類無理無由,隨意拋一句香港足球係垃圾之類說話,就連我一個小小球迷都會灰心,更莫講話球員嘅感受係點。

本地波粉絲必須要承認,香港波水平遠比五大聯賽低。而家香港嘅世界排名只係排141,連上半版都唔係;港超又缺乏凝聚力,粗略估計,每場港超只有大約一千人入場。即使係區隊,球隊踢成點都唔太受區內市民關注;好多人唔知道今季有邊幾隊,甚至幾多隊港超球隊;而喺商業角度睇。各球隊基本上係年年燒錢,某程度上,搞本地波毫無經濟效益可言。

香港波有咩價值呢?通常最多人睇嘅比賽係港隊賽事,有一萬人入場都唔出奇。筆者有幾位朋友係只睇港隊,唔睇港超,即使佢哋唔識晒場內十一個港隊球員,佢哋都會為香港打氣。佢哋睇港隊都係想支持代表自己嘅一隊波。我認為唔少港隊球迷都同我幾位朋友情況相似。從佢哋睇波嘅背景可見,佢哋支持香港足球係為咗支持本土事物。

世界各地都有唔少具濃厚本土思想嘅球隊。巴塞代表住加泰人同馬德里政府唔同嘅價值觀;又好似阿根廷河床同中國廣州富力代表嘅本地人口,同敵對球隊小保加丶廣州恆大所代表嘅外內人口咁。略舉幾個例子只係想講,用「本土」二字做一隊波嘅價值並無不可。雖然「香港足球」並唔係一隊波,但係同上面幾個例子係有相似之處。

既然香港波嘅價值唔係源於競賽水平丶經濟效益,點解要用呢啲論點去踩低香港足球呢?我哋嘅價值應該由我哋建立。今時今日嘅球迷就係做緊呢點。球迷大半年嚟不斷上山下海睇波,疫情前更加有球迷跟隨港隊作客,南征北伐。換嚟球員嘅認同,令佢哋想喺球場為香港,為球迷,爭一口氣,呢啲都係睇外國波得唔到嘅點滴。

近年越嚟越多人表示自己鍾意香港,而足球又係最受香港人歡迎嘅運動,我哋好應該俾香港足球一個嘗試,等自己感受一下我哋嘅本地足球。就算最後真係唔太熱衷,都唔好落井下石。寫到呢度,而家係十一月七日大約四點鐘,係時候出發睇波。最後,引用幾張喺討論區流傳嘅相,等大家感受下香港波對一眾職球員,以及球迷嘅價值:

圖片引用自:https://lihkg.com/thread/2274162
標籤: 本地足球  

留言


請按此登錄後留言。未成為會員? 立即註冊
    快捷鍵:←
    快捷鍵:→