攻不銳丶守不穩—阿特蘭大今場寫照 精選

昨晚上演阿特蘭大對利物浦嘅歐聯比賽，前者一向係攻強守弱嘅球隊，而利物浦自從雲迪克受傷後，防守亦都冇咁穩陣。所以本來會認為呢場波會大手交易。最後的確係入球如麻，但係入波一面倒嚟自利物浦。「攻不銳丶守不穩」形容尋晚嘅阿特蘭大最適合不過。

比賽早段，兩邊都比較保守，大部份時間控球在腳嘅利物浦希望主導中場，但係被阿特蘭大嘅人盯人限制住，韋拿杜姆同鍾斯都被Mark實，難以喺中場攞波。所以利物浦三箭頭嘗試返後攞波，希望多一個人，令主隊Mark唔晒。祖達係前面三個人入面最常返後嘅一位，不過阿特蘭大中堅柏洛米奴敢於離開位置，跟祖達跟到足，所以利物浦亦無功而還。
但阿特蘭大嘅人盯人只係限於中場，佢哋喺利物浦嘅逼搶唔算嚴密，令利物浦球員較易喺後場長傳。不過長傳距離太遠，加上阿特蘭大幾位中堅頂走唔少波，令到利物浦仍然冇乜優勢。https://i.imgur.com/YYSjXj6.gif

另一方面，阿特蘭大嘅三中堅，喺人盯人加上被拉邊下，中堅之間留有好大空位，容易被利物浦利用。佢哋第一個失波就係咁被打穿，加上祖達嘅冷靜處理，做成失球。
https://i.ibb.co/7NXPCFs/ezgif-com-video-to-gif-6.gifhttps://i.ibb.co/Wt5F0C7/ezgif-com-video-to-gif-4.gif

去到上半場中段，阿特蘭大中場盯人開始變得鬆散，經常有利物浦球員搵到無人看管嘅位置，令佢哋更能控制中場，壓住阿特蘭大嚟打。

利物浦亦都可以善用中場優勢，同時繼續針對阿特蘭大防守空位進攻，一直用放過頭波長傳，令到佢哋取得第二個入波。
https://i.ibb.co/ZNJBFXN/ezgif-com-video-to-gif-3.gif

去到下半場，落後兩球嘅阿特蘭大冇得唔向前壓，卻令後防增加更多空位。利物浦有好多機會長傳俾前面三個走，佢哋亦有好多一對一機會。而後場空虛亦令佢哋再失三球。同時長傳為利物浦製造更多攻勢。https://i.imgur.com/tjYcyr1.gif

守不穩之餘，阿特蘭大嘅進攻亦都唔夠銳利。佢哋平時應該有好多傳中，而因為雲迪克嘅受傷，利物浦制空力減弱，阿特蘭大理應佔到唔少甜頭。但係今場阿特蘭大傳中唔夠準繩，只有五次成功傳中。利物浦兩名中堅合共只係有一次頂輸，發揮出色。加上阿特蘭大好多時連傳中都傳唔到，經常被紅軍兩閘閘到，甚至搶返個波，更莫講係斬到俾目標。https://i.imgur.com/llDLArY.gif

除咗傳中之外，阿特蘭大亦有兩路進攻板斧，其中就係喺中場搶波後嘅反擊，特別喺上半場人盯人時次數較多。但係幾次射門一係被救出，一係就中柱，都係入唔到波。而角球攻勢係阿特蘭大攞到較多Expected Goal嘅地方，但係幾次頭搥都被艾利臣救出。阿特蘭大嘅Expected Goal達1.15，但最終一球都入唔到。
https://i.ibb.co/PZKZfyG/ezgif-com-video-to-gif-5.gif
總結
其實阿特蘭大嘅近況一般，對上三場意甲只係贏到一場，今場對利物浦輸波都唔出奇，只係冇諗到會輸咁多球。經過三輪歐聯，可以肯定阿特蘭大要同阿積士爭一個出線席位。希望佢哋可以重拾狀態，嚟近幾場表現有所提升。