歐聯丨賽後文章 : 維拉利爾夢醒前再次綻放 利物浦調整扭轉戰局 (維拉利爾 2-3 利物浦 總比數 : 2-5)

歐聯四強次回合,維拉利爾同利物浦嘅對決,形勢扭轉再扭轉。維拉利爾嘅神奇之旅仿似一場夢,而夢醒之前再次綻放了光芒。利物浦失去優勢之後,半場嘅一系列調整,令戰局再次扭轉。

雙方陣容 :

🟡防不勝防,因為訓練有素
維拉利爾於上場西甲大輪換過後,體能狀態比尚要爭奪英超冠軍嘅利記好。首回合落後兩球之下,球隊上半場大舉壓迫,壓住利記。艾馬利今場安排球隊以邊路傳中,加上中前場球員後上插入,有效侵襲利記防線。卡保爾同高基蘭分別後上插入利記左右halfspace,更令對方防不勝防。

比賽開始僅僅三分鐘,維拉利爾已取得入球。盧施素同摩蘭奴通透嘅串連,越過利記壓迫,再轉移到前場左路傳中,卡保爾同摩蘭奴交叉就位過後,從羅拔臣身後插入右路halfspace接應傳中,地波助攻迪亞後上壓過雲迪克門前射入。

完半場前卡保爾再喺右路發難,面對羅拔臣一扣一傳中,高基蘭後上起跳壓過阿諾頂入死角,維拉利爾總比數迫和。維拉半場攻門唔多,但球員精準執行進攻配合,令球隊進攻效率奇高,上半場面對利物浦嘅防線射門五次已入兩球,可見球隊訓練有素。
🔴處於下風
利物浦體能狀態不及對方,速率方面比較輸蝕,上半場於對攻中未能得到優勢,球隊多次嘗試反擊但未能有效衝擊對方,而向前壓迫效果亦係一般。球隊中後場多次受壓,面對維拉利爾嘅反擊/快攻,好在雲迪克引領嘅越位陷阱起到作用。

🔴半場調整
利記上半場形勢處於下風,高普決定半場以迪亞斯入替祖達,以其後備入題嘅體能優勢衝擊對手。整體踢法方面,球隊獲得控球權後,減少立即長傳同放直線反擊,更多保持控球壓住對手。調整過後,利記成功奪回形勢,下半場嘅控球比率反超對手,亦令對方於下半場未能射門。
🔴牽引作用
處於陣地戰時,沙拿發揮牽引作用,移入中路時能牽引對方後防使其收窄,助阿諾右路傳中。61分鐘,沙拿返回邊路,便拉開了維拉利爾後防線。較少上前嘅防中法賓奴插入halfspace,可算出其不意,其接應皮球一刻對方後防無人看管。法賓奴推進到近禁區底線假傳真射,射入門將魯利嘅大細龍門。

🔴關鍵調動
64分鐘,迪亞斯發揮其個人技術,左路內切連過兩關再射中柱。兩分鐘後,沙拿再次移入中路為阿諾製造空間,阿諾於右路睇準傳中,迪亞斯從對方中堅艾比奧爾背後插前頂入,魯利反應不及,其大細龍門再次被通過。今場可見迪亞斯狀態比祖達更好,高普半場嘅調動相當關鍵。
🟡差天共地
維拉利爾再次落後兩球,只能向前搶攻,艾馬利安排調動連換兩人,以柏達沙同卓古爾斯入替高基蘭同有傷在身嘅摩蘭奴,以補充體能。不過,經過上半場不斷搶攻,以及下半場被對方控球消耗,此時球隊整體體能已所剩無幾,進攻效果同上半場差天共地。73分鐘,維拉利爾全軍壓過半場,利記搶到皮球後有大量空間反擊,文尼連過出迎嘅魯利同補位嘅科夫射入空門,助利記單場逆轉2-3鎖定勝局。

🟡🔴兩回合總結
兩回合嘅對決中,兩隊展現到唔少戰術變化,維拉利爾從泊大巴都全力搶攻,都為利記帶來唔少麻煩,而利記亦運用了唔少方法應對。值得留意嘅係,沙拿雖然喺兩回合未有入球,但其創造力同牽引作用亦係幾個入球關鍵之一,面對維拉利爾以至近期嘅沙拿,可謂無名英雄。

艾馬利麾下嘅維拉利爾雖然未能走到最後,但喺呢次神奇之旅中,球隊沿途已留下深刻嘅印記喺球迷心中。維拉利爾呢個人口只有五萬幾嘅小鎮,有將近一半嘅人去到陶瓷球場支持球隊到最後一刻,場面動人。最後,感謝維拉利爾!

歡迎 follow Instagram!!
睇完波訓醒可能會有即時短文或者係小弟有感而發嘅po
loading

留言


請按此登錄後留言。未成為會員? 立即註冊
    快捷鍵:←
    快捷鍵:→