歐聯丨賽後文章 : 曼城對抗優勝 皇馬效率更高 巴西兩代大將對決各有千秋 (曼城 4-3 皇家馬德里)

歐聯四強,曼城於伊帝哈德球場同皇家馬德里激戰一番,首回合曼城領先4-3 。
雙方陣容 :

⛵️👑體能負擔較少
今場比賽節奏快而精彩,雙方最近嘅體能負擔較少。曼城上仗大勝屈福特過程輕鬆,球員消耗較少體能。皇馬於上周末不需應付聯賽,另一邊嘅維拉利爾亦係一樣。西甲賽會嘅安排,令球員得以休息,助旗下球隊晉身歐聯決賽。

⛵️👑攻強守弱
兩隊進攻球員狀態良好,向前壓迫嘅力量充足。相反地,兩隊後防都受傷患困擾,表現一般。曼城右閘獲加有傷在身,客串右閘嘅史東斯於上半場退下火線,另外簡些路需要停賽。皇馬防中卡斯美路因傷缺陣,中堅艾拿巴、左閘文迪剛剛傷癒。兩隊後防表現不及其進攻亮麗,未能抵擋對方猛烈進攻。

⛵️角色轉換,防不勝防
開賽兩分鐘,馬列斯引球內切傳中,迪布尼衝前插入禁區一頂破網打開記錄。今次進攻過程,同大家認知之中曼城嘅踢法有些少分別。經常負責引領攻勢、致命傳送、傳中嘅迪布尼轉成了接應角色,加上其由禁區頂衝上前嘅助力,令對方防不勝防。馬列斯更多發揮到其推進能力,而貝拿度施華跑向halfspace牽引文迪亦係入球關鍵。
👑無可替代
不過值得留意嘅係,若果面對馬列斯傳中嘅係卡斯米路,而非今場打中場中間嘅卻奧斯,或者能阻止對方傳中。今個失球可見皇馬傷兵問題嘅影響,同卡斯米路對皇馬嘅重要性,其於防線前掃蕩嘅作用無人能代替。

⛵️👑狀態分野
不久之後,迪布尼一記傳中,上仗上演大四喜嘅加比爾捷西斯轉身擺脫之後因傷退下火線嘅艾拿巴射入,可見兩人狀態分野。踢到十分鐘,曼城已領先兩球,皇馬增加向前壓迫搶攻,令比賽變成快打快嘅對攻。

⛵️對抗優勝
兩隊對抗之中,曼城球員整體運轉速率較高,皇馬中場兩老摩迪同卻奧斯速率有限。曼城因此搶到更多球權同攻擊防線身後嘅機會,包括迪布尼挑過艾拿巴製造馬列斯嘅機會、馬列斯同迪布尼先後兩下傳送劏穿對方壓迫形成三打二機會、下半場馬列斯推過米列圖後嘅半單刀。可惜通通未能把握。

👑效率更高
皇馬雖然控球同機會較少,但效率更高。賓斯馬壓迫幾次令對方門將艾達臣失誤,而摩迪嘅搶截更帶來入球。33分鐘,摩迪於中前場搶到皮球,交俾文迪喺左路45度角傳中,賓斯馬頂住施真高,球不著地小腿一批,皮球中柱而入,艾達臣鞭長莫及。入球令人嘆為觀止,賓斯馬再一次拯救皇馬。
⛵️👑巴西兩代大將對決
費蘭甸奴於36分鐘入替因傷退下火線嘅史東斯擔任右閘,與巴西同胞雲尼素斯鬥志鬥力。53分鐘,費蘭甸奴先勝一籌,成功預判文迪傳球路線,比雲尼素斯快一步接走皮球,其後同馬列斯撞牆衝落底線傳中,助攻科頓以頭鎚拉開比數。

2分鐘後,同樣係文迪緣左路邊線傳俾雲尼素斯,費蘭甸奴欲重施故技,但今次就被對方反咬一口。雲尼素斯用身體頂住費蘭甸奴,讓皮球先過,自己再轉身擺脫其防守,之後用速度單刀直入,追近3-2。雲尼素斯能迅速「回應」費蘭甸奴,相信因為喺失球之時已作反省並搵到解決方法,今個入球可見其球商逐漸成熟。
⛵️👑各有失誤
兩隊各自最後一個入球,都係來自對方嘅失誤。73分鐘,施真高於禁區頂被踢跌,球證俾曼城進攻得益,以為會吹停比賽嘅皇馬後防都稍有停頓,防中卡馬雲加未及反應,未有包夾貝拿度施華,讓其推入禁區射入,門將高圖爾斯當亦未及時調整企位。

79分鐘,面對皇馬罰球攻勢,拿樸迪禁區內起跳伸手大意犯下手球,賓斯馬以一記panenka 射門為皇馬追近,亦保留了次回合嘅懸念。
⛵️👑次回合預期
次回合之前,兩隊都需要於4月30日應付各自嘅聯賽。皇馬面對分數上可以踢「風流波」嘅愛斯賓奴只需打和,便能高舉西甲獎杯,曼城需要作客同需要護級而擅長壓迫搶攻嘅列斯聯對決。相信曼城於聯賽嘅戰況會比皇馬更加激烈,加上連同次回合對決,皇馬連續兩場主場出擊,曼城連續兩場作客應戰,相信皇馬體能狀態會更好。

下周中卡斯米路應該能夠復出,若有足夠狀態,無疑會令皇馬防守更加堅固。而曼城肯定會有簡些路停賽後復出,帶來更多進攻變化,而卡爾獲加亦有可能復出。傷癒復出不久嘅中堅迪亞斯狀態相信會有提升。次回合大家或會睇到兩隊更加完整嘅對決。

如果喜歡我們的文章,請即分享到︰

標籤: 歐聯  曼城  皇馬  迪布尼  馬列斯  賓斯馬  摩迪  卻奧斯  科頓  

留言


請按此登錄後留言。未成為會員? 立即註冊
    快捷鍵:←
    快捷鍵:→