歐聯丨賽後文章 : 拜仁調整改變形勢 黃色潛艇尾段加速擊倒德甲巨人 (拜仁慕尼黑 1-1 維拉利爾 總比數 : 1-2)

歐聯八強階段,維拉利爾首回合於主場以一球領先拜仁慕尼黑。次回合,黃色潛艇駛到慕尼黑,作客面對德甲巨人以1-1打成平手,黃潛晉級四強。

雙方陣容 :

首回合之中,拜仁運轉速率不及維拉利爾,進攻效果一般,而防守亦有漏洞,令維拉利爾得以從halfspsce製造機會同入波。拜仁主帥尼高士文連同教練團隊作出了調整,令拜仁慕尼黑今場面對沿用首回合排兵布陣嘅維拉利爾,形勢得到改善。細節如下:

🔴若拜仁於主攻陣地戰進攻失敗,球隊三中堅陣之下,其中一位中堅有另外兩位中堅「逗住」之下,可以上前幫助壓迫包圍,有助搶回球權,讓球隊繼續進攻。

🔴哥利斯卡回歸正選增強了球隊對抗能力

🔴拜仁以三中堅陣應戰,球隊整體回防時人數足夠,左右中堅靴南迪斯同柏華能封住halfspace位置。

進攻方面,今場尼高士文決定安排高文擔任左翼衛、辛尼擔任右翼衛。梅斯亞拿、利雲杜夫斯基同梅拿三人集中於中路,令維拉利爾大部分防守球員集中於中路。喺一般情況下,就算翼衛得到空間,但由於三中堅陣欠缺翼同閘之間嘅邊路配合,其進攻效果有限。不過,拜仁由高文冋辛尼兩位具有持球擺脫能力嘅翼鋒擔仼翼衛,就令球隊兩邊有一定嘅牽扯力量,俾到梅拿同梅斯亞拿前插或接應傳中嘅空間。

拜仁次回合得以製造機會,但球隊就似首回合嘅維拉利爾一樣,往往未能把握。拜仁只能以偶有嘅前場反擊,由利雲入球扳平總比數。

比賽尾段,眼見將要進入加時,甚至拜仁有機會再次入球時,維拉利爾主帥艾馬利決定連換兩人,提高球隊速率以及衝擊力。艾馬利嘅調動隨即於一次反擊中奏效,謝拉特摩蘭奴助攻後備上陣嘅卓古路斯絕殺,拜仁「臨尾香」。

兩回合嘅對決之中,兩隊各有一場取得優勢,維拉利爾稍稍贏在進攻嘅把握力。歐聯列強之中,維拉利爾球員能力方面未必及得上其他對手,但球隊能憑藉其防守同組織嘅整體性,加上球員嘅意志力,連續淘汰祖雲達斯同拜仁慕尼黑,成為奇兵黑馬。無論維拉利爾之後能否走得更遠,球隊今季嘅事跡,相信會係球迷們難忘嘅回憶。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→