歐聯丨賽後文章 : 峰迴路轉的故事 車路士決心反撲 皇馬有師弟「幫拖」 (皇家馬德里 2-3 車路士 總比數 : 5-4)

上週日晚,大家欣賞過一場極其緊湊嘅高手過招-曼城對利物浦。意猶未盡之際,皇家馬德里同車路士喺歐聯八強次回合,合演峰迴路轉嘅一戰。今場比賽情節有如動漫,戰局大起大落。最終皇馬繼淘汰PSG後,再次以反勝晉級。

雙方陣容 :

車路士今場繼續以三中堅陣應戰,洛夫斯卓克擔任右翼衛,而占士於右中堅位置,以其速度同力量限制雲尼素斯。皇馬方面,球隊後防重心人物米列圖停賽缺陣之下,球隊防守力難免受到影響。比賽第15分鐘,車路士一次快攻突破拿祖嘅防守區域,添姆雲拿助攻曼治入球,為首回合落後兩球嘅車路士追近比數。
皇馬於比賽早段同車路士對攻之中未能確立優勢,球隊上半場中段收縮防守,以求保住領先優勢。車路士於主攻陣地戰之中顯得掙扎,原因如下:

  • 衝擊力強嘅占士受對方左翼雲尼素斯牽制,未能後上衝擊。
  • 球隊上場大勝修咸頓時多次衝擊右路嘅洛夫斯卓克,今場上半場未有發揮其衝擊能力,反而被安排更多擔當串連嘅角色,有時甚至會收入中場位置。
  • 前線三位球員,曼治、添姆雲拿同夏維斯企位集中於中路,對應嘅皇馬後防球員只需集中中路應對,車仔未能拉開對方防線。
  • 皇馬右翼華維迪繼續發揮覆蓋能力,幫助皇馬收縮防守時形成三中堅企位,同時減輕三位中場嘅覆蓋負擔。

上半場車路士只能攻入一球,並未足以逆轉。杜曹於半場作出調整,安排洛夫斯卓克更多向前衝擊,卓克嘅衝擊效果良好,首先從反擊製造地波傳中送到門前,其後卓克再次衝擊博到角球,間接造就魯迪加頭槌頂入扳平總比數。

皇馬死球失波之中,摩迪嘅高度同對抗性未能抵擋魯迪加向前衝頂,可見球隊區域聯防嘅弱點,就算米列圖在陣,相信仍難免失球。不過值得留意嘅係,車仔入球係來自短時間內第二個角球,之前第一個角球攻勢中占士後上射門,摩迪嘗試封阻但其實沒有接觸到皮球。第二個角球並唔應該存在,奈何今次單靠球證肉眼的確難以判斷,而角球嘅判決,同入球並非來自同一攻勢,VAR無法推翻入球。

皇馬被迫和之後增加向前壓迫同車仔對攻,此時比賽變成了「你一拳我一腳」嘅搏鬥。皇馬左閘文迪曾將皮球送到門前,其後車仔前場搶到反擊,阿朗素右腳抽入但因手球食炸糊,不久之後賓施馬頭槌頂中門楣。到75分鐘,車仔一次快攻,添姆雲拿連過兩關後射入,車路士總比數反先。


皇馬雖然能以組織同賓施馬嘅空中能力製造機會,但球隊整體運轉速率不及對方。阿朗素嘅炸糊,來自車仔前場成功逼搶,而添姆雲拿嘅入球之中,皇馬中後場輪轉未能跟上對方步伐。皇馬落後之下,主帥安察洛堤決定連換兩人,分別以馬些路入替文迪,亦以右翼洛迪高入替卡斯米路,而原本擔任右翼嘅華維迪轉到中場位置。

洛迪高上場,華維迪移到中軸,連同早前入替卻奧斯嘅卡馬雲加同正選嘅雲尼素斯,幾位年輕球員嘅力量,令皇馬運轉速率提升,得以同車仔對攻抗衡。車路士大部份擅長對攻嘅球員都已經喺正選之中,所以杜曹於90分鐘之前,只有以佩利錫入替添姆雲拿。

有隊中嘅師弟支撐住,兩位師兄摩迪同賓斯馬得以充分發揮。80分鐘,摩迪攞波轉身再用腳背斬波,皮球精準咁彎入禁區去到洛迪高身前,洛迪高一抽入網扳平,將比賽帶入加時。去到加時,雲尼素斯同卡馬雲加合作搶到前場反擊,雲尼素斯推入左路傳中,賓斯馬衝頂入網!皇馬總比數反超前5-4!


其後杜曹接連調動,換入佐真奴同施耶治。車路士以高波最後一搏,但無力回天。最終皇馬艱難之下晉級四強。

今場比賽峰迴路轉,以為只係車路士強勢反撲,點知皇馬就同大家嚟個反反撲。兩隊嘅心態、球員嘅級數、教練嘅部署同調動,喺今場比賽碰撞出動漫般嘅故事。車路士決心反勝,球員長時間奔跑搶攻,曾連入三球,雖敗猶榮。皇馬繼十六強面對巴黎,再次以年輕力量成功於絕地反擊。賓斯馬同摩迪兩位師兄老而彌堅,講緊嘅唔止係表現,仲有係佢哋嘅堅持。36歲半嘅摩迪今場跑動13.72公里,係全場第四多,而賓斯馬喺加時小腿抽筋之後仲要係咁衝係咁壓迫,真係唔到你唔Respect!

最後,恭喜皇家馬德里!無論今屆皇馬能否奪冠,球隊連續反勝PSG同車路士嘅故事,相信會係足球迷難忘嘅歷史。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→