海軍鬥水兵 (熱刺對曼聯賽後分析)

黑仔講波 於 02/11/2021 發表 收藏文章
圖片來源:Sky Sports (https://www.skysports.com/football/tottenham-hotspur-vs-manchester-united/446385)

星期六尾場有一場本週重點賽事,熱刺主場對曼聯。兩隊嘅近況都麻麻,主隊雖然喺周中嘅聯賽盃成功晉級,但對上兩場賽事分別喺聯賽及歐洲議會盃不敵韋斯咸同荷甲維迪斯;至於曼聯則聯賽五場不勝而且喺各項賽事中近三場失咗 12 球。最終曼聯今場成功「反底」,以 3:0 擊敗對手,中止近期頹勢。

熱刺正選陣容大部份都係見慣見熟嘅球員:靴爾堡、史基比擔任雙防中,左路孫興慜、右路盧卡斯姆拿、配上進攻中場盧施素支援前鋒哈利簡尼;不過喺左閘位置上就由守強於攻嘅賓戴維斯取代列古朗 (Sergio Reguilón) 嘅正選位置。

熱刺正選陣容
GK1 洛里斯 Hugo Lloris
LB 33賓戴維斯 Ben Davies
CB15戴亞 Eric Dier
CB 4 羅美路 Cristian Romero
RB12艾馬臣 Emerson Royal
CDM5靴爾堡 Pierre-Emile Højbjerg
CDM29史基比 Oliver Skipp (66’ 由尼當比利 Tanguy Ndombele 入替)
LM 7 孫興慜 Son Heung-Min
CAM18盧施素 Giovani Lo Celso (73’ 由迪利阿里 Dele Alli 入替)
RM27盧卡斯姆拿 Lucas Moura (54’ 由貝格雲 Steven Bergwijn 入替)
FW10哈利簡尼 Harry Kane


今場曼聯改變戰術,由慣用嘅 4-2-3-1 改踢三後衛陣式,以鞏固防守及防止熱刺嘅快速反擊。後防線方面有華拉尼傷癒復出,與曼聯嘅慣常正選四人防線合作防守;另一個改動係由以往嘅單箭頭改踢雙箭頭,由卡雲尼夥拍 C 朗擔起球隊嘅入球重任。

曼聯正選陣容
GK 1 迪基亞 David de Gea
CB 5 麥佳亞 Harry Maguire
CB 19華拉尼 Raphaël Varane
CB 2 連迪洛夫 Victor Lindelöf
LWB23梳爾 Luke Shaw
CM 17費特 Fred
CM 39麥湯文尼 Scott McTominay
RWB29雲比沙卡 Aaron Wan-Bissaka
CAM18般奴費蘭迪斯 Bruno Fernandes (76’ 由馬迪 Nemanja Matić 入替)
FW 7 C 朗拿度 Cristiano Ronaldo (71’ 由拉舒福特 Marcus Rashford 入替)
FW 21卡雲尼 Edinson Cavani (82’ 由連加特 Jesse Lingard 入替)


今場兩隊互有攻守,而數據上熱刺更係佔優嘅一方,不論控球、傳送及角球都係較多嘅一隊,可惜組織力、攻力疲弱嘅問題依舊,未能組織有效攻勢,結果錄得零中龍嘅尷尬數據;而雖然曼聯控球只有約四成,但佢哋就成功把握到熱刺後防失誤,憑 C 朗、卡雲尼及拉舒福特各入一球,以三球淨勝熱刺。

熱刺 – 防線穿窿
筆者喺上星期文章先講完曼聯嘅防線係豆腐防線 (詳情請見延伸閱讀),今個星期隨即就有另一隊接力,回顧熱刺三個失球,其實都係由自己後防失誤造成,而且後衛之間溝通存在問題,其中一個原因可能係後防線上缺乏一位領導者或提場嘅角色。

圖片來源:熱刺官方 YouTube (https://www.youtube.com/watch?v=lX8FN6T5ryc)

第一個失球係由於賓戴維斯包越位兼漏頂而成。上面第一張圖顯示般奴費蘭迪斯接球一刻賓戴維斯係有做 shoulder check,做好準備並知道 C 朗喺自己身後嘅盲眼位;但係當般奴送出長傳時,從熱刺後防線嘅企位睇得出佢哋係想裝越位但賓戴維斯就包咗越位,最後更加漏頂俾 C 朗成功接應長傳窩利射入先開紀錄。

圖片來源:熱刺官方 YouTube (https://www.youtube.com/watch?v=lX8FN6T5ryc)

第二個失球則係兩名中堅戴亞、羅美路未有好好溝通,走漏卡雲尼令佢接應 C 朗傳球後輕易形成單刀。當時係熱刺組織緊攻勢,但喺中圈附近被逼甩並迅速形成 3 打 3,戴亞、羅美路就好似上圖咁一齊被原本控球嘅般奴同 C 朗吸引咗注意力,完全忽略咗另一邊嘅卡雲尼。呢個攻勢當中有一個細節位不得不讚 C 朗,就係當佢控球期間發現羅美路回頭檢查卡雲尼位置時,佢立即瞄住兩個中堅之間嘅空位傳出直線,當羅美路回過頭發現時佢嘅身體已經轉咗向變成對住卡雲尼嗰邊,令佢趕唔切回身截下傳球,最終卡雲尼單刀鬆射入。

圖片來源:熱刺官方 YouTube (https://www.youtube.com/watch?v=lX8FN6T5ryc)

第三個失球同樣係被曼聯一個直線劏穿防線後被對手單刀射入。從上圖可見熱刺嘅右閘艾馬臣同右中堅羅美路本身換咗位,或者係位置感問題,令前者同戴亞之間有好大嘅空位,而且兩者都並未有好好守住拉舒福特,導致後者有足夠空間發揮速度並控定皮球一射入網。

曼聯 – 戰術成功
上文提及過曼聯所作出嘅調動都非常有效,三後衛減少後場空間防止熱刺反擊,雙前鋒則以靈活老練嘅走位拉散熱刺防線。

首先要知道熱刺最銳利嘅武器就係佢哋嘅快速反擊,若要佢哋保持控球在腳組織攻勢反而會變得老鼠拉龜,因此蘇斯克查今場排出三中堅陣式減少後場空間並減輕後衛壓力,將熱刺反擊威脅減至最低。而由於熱刺球員不擅組織嘅關係,佢哋控球在腳時往往難以送出致命一傳,好多時都會選擇喺兩邊斬入去,但禁區中只有哈里簡尼一人接應,而且佢亦非柱躉式前鋒,面對呢啲攻勢曼聯三中堅就可以輕鬆化解。

圖片來源:英超官方網站 (https://www.premierleague.com/match/66439)

而雙前鋒嘅佈陣亦係今場致勝關鍵。當球隊排出雙前鋒面對對方四人防線時,多數都會分別企喺對手嘅中堅同閘中間,一來可以攻擊二人之間嘅 half space 位置,二來可以同時吸引兩個人嘅注意力;而且雙前鋒意味住即使前鋒需要回後協助組織攻勢,仍然有一名前鋒企喺最前作球隊嘅 target 之餘亦可牽制對手防線企位。再者,卡雲尼同 C 朗兩位沙場老將並非與對方硬碰,而係以自己累積嘅經驗、觸覺同智慧喺適當嘅時候作出最致命嘅走位,作出有威脅嘅攻門。

總結
經過今場勝仗後,蘇斯克查總算可以穩一穩自己嘅帥位,但對手紐奴就冇咁好彩,熱刺喺輸波後好快就宣佈辭退領隊紐奴,短短四個月喺熱刺嘅執教生涯就始告終,而下任領隊則盛傳會由干地接任。兩隊嘅人腳其實並唔係特別差,但不論狀態、表現或戰術執行上都不似預期。期待一場勝仗同換領隊可以分別幫助兩支球隊重拾狀態,為今屆英超爭冠、爭歐聯席位嘅過程中加添一啲變數。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page!
https://www.facebook.com/blacksontalkball/

如果喜歡我們的文章,請即分享到︰

標籤: 熱刺  曼聯  英超  C朗拿度  卡雲尼  拉舒福特  

留言


請按此登錄後留言。未成為會員? 立即註冊
    快捷鍵:←
    快捷鍵:→