回勇的阿記,迷失的熱刺 (阿仙奴對熱刺賽後分析)

黑仔講波 於 27/09/2021 發表 收藏文章
圖片來源:Sky Sports

今輪英超另一場大戰有北倫敦打吡,由阿仙奴喺酋長球場迎戰作客嘅熱刺。兩隊開局同近況都完全相反,主隊喺經歷開季三連敗後及時止血回勇,近三場聯賽及盃賽取得三連勝兼且保持零失球;反觀熱刺開季三連勝後各項比賽已經四場不勝,而且場均失兩球或以上。

阿仙奴排出 4-2-3-1,龍門位置繼續由蘭斯度把關,富安健洋亦繼續出任正選右閘;防中位置用上薩卡、帕迪嘅組合加強掃蕩,而進攻方面則由奧巴美揚帶領身後嘅史密夫路、奧迪加特、沙卡威脅對手防線。

阿仙奴正選陣容
GK32藍斯度 Aaron Ramsdale
LB 3 泰亞尼 Kieran Tierney
CB6 加比爾 Gabriel
CB4 賓韋特 Ben White
RB18富安健洋 Takehiro Tomiyasu
CDM34薩卡 Granit Xhaka (82' 洛岡加 Albert Sambi Lokonga 入替)
CDM5帕迪 Thomas Partey
LM10 史密夫路 Emile Smith-Rowe (88' 由泰華利斯 Nuno Tavares 入替)
CAM8奧迪加特 Martin Ødegaard
RM7 沙卡 Bukayo Saka (87' 由美倫尼爾斯 Ainsley Maitland-Niles 入替)
FW14奧巴美揚 Pierre-Emerick Aubameyang

熱刺則繼續排出 4-3-3 陣式,正選陣容同上場對車路士差唔多,只作出咗三個調動:山齊士、坦根加取代羅美路、艾馬臣復任正選,盧施素 (Giovani Lo Celso) 亦先任後備,由傷癒復出嘅盧卡斯姆拿擔任正選右翼。

熱刺正選陣容
GK1 洛里斯 Hugo Lloris
LB 3 列古朗 Sergio Reguilón
CB15戴亞 Eric Dier
CB6 山齊士 Davinson Sánchez
RB25坦根加 Japhet Tanganga (46' 由艾馬臣 Emerson Royal 入替)
CM28尼當比利 Tanguy Ndombele (70' 由基爾 Bryan Gil 入替)
CM5 靴爾堡 Pierre-Emile Højbjerg
CM20迪利阿里 Dele Alli (46' 由史基比 Oliver Skipp 入替)
FW7 孫興慜 Son Heung-Min
FW10哈利簡尼 Harry Kane
FW27盧卡斯姆拿 Lucas Moura

今仗阿仙奴大踢曼城式嘅傳控足球,史密夫路、奧迪加特以頻密嘅換位、走位進襲熱刺後防 half space 位置,配合壓上助攻嘅閘位球員製造人數優勢;另一方面,熱刺未有好似上場對車路士一樣採取高強度嘅前場逼搶,加上前、中、後三線之間連繫唔夠緊密,導致中後場有好多空位俾阿仙奴發揮,上半場 12 分鐘阿仙奴就憑史密夫路先開紀錄。先失一球嘅熱刺立即壓前反撲,但未見成果就俾阿仙奴反擊得手,奧巴美揚、沙卡先後入波,阿仙奴帶住 3:0 優勢入更衣室。換邊後熱刺嘅進攻未見起色,阿仙奴亦放慢節奏,以逸待勞,最終熱刺只能靠孫興慜喺 79 分鐘破蛋,阿仙奴成功以 3:1 擊敗同市宿敵,全取三分。

阿仙奴 – 曼城式足球
今場阿迪達活用佢喺曼城跟隨哥迪奧拿擔任助教時所學到嘅理論,以傳控足球擊敗熱刺。阿仙奴進攻時一邊閘內收到中堅位置,另一邊閘壓上,配合翼鋒及進攻中場攻擊對方嘅 half space 或邊路位置,以人數優勢 overload 對手,從而製造空位,當有空間作出傳中時就會 cut back 到 12 碼點附近位置俾後上嘅球員撞射,今場頭兩個入球就係咁樣創造出嚟。

12’ 阿仙奴 1:0 熱刺 (入球球員:史密夫路)
圖片來源:阿仙奴官方 YouTube (https://www.youtube.com/watch?v=nsV6tLPTLLU)

第一個入球係由一次反擊產生,史密夫路接波後一路向前推,分俾右邊嘅沙卡後自己繼續走入禁區,同時奧巴美揚喺熱刺左閘列古朗面前走入禁區吸引其注意力,令沙卡可以輕鬆接波,然後一擺、一推、一傳就俾到 12 碼點附近嘅史密夫路撞射得手。

27’ 阿仙奴 2:0 熱刺 (入球球員:奧巴美揚)
圖片來源:阿仙奴官方 YouTube (https://www.youtube.com/watch?v=nsV6tLPTLLU)

第二個入球同樣來自一次反擊,阿仙奴後場解圍搵到奧巴美揚,奧巴美揚知道身後有熱刺嘅山齊士 mark 住自己就一腳彈俾後上緊嘅史密夫路,山齊士回身想追已經遲咗,最後史密夫路殺入禁區 cut back 俾奧巴美揚輕鬆射入。

防守方面,今場阿仙奴球員積極回防,而且企位緊密有系統,有效地以遮線嘅方式阻止熱刺攻勢,加上適時作出逼搶,令對方難以組織攻勢。今場比賽筆者對富安健洋印象極深,佢具備速度及出色嘅位置感,即使對住熱刺嘅孫興慜、列古朗亦不落下風;進攻時佢嘅走位極具威脅,而且佢唔只會從邊線 overlap,更會 underlap 走入禁區,雖然阿仙奴球員同佢未係好配合到冇傳到俾佢,但佢嘅無球跑動確實能夠為球隊製造空位。

熱刺 – 攻不銳守不穩
呢六個字可以概括今場熱刺嘅表現。進攻時,哈利簡尼會回後攞波組織,但哈利簡尼嘅狀態明顯極低迷,傳球、控球、決定都係水準以下,熱刺失嘅第三球就係因為佢喺前場帶帶下波自己帶失咗而俾對手打反擊。除此之外,其他球員缺乏無球跑動,個個都好似等波到咁,但阿仙奴積極回防嘅防守球員已經封鎖咗大部分傳球路線,熱刺嘅進攻球員只係留喺原地郁都唔郁基本上係絕對接唔到波,導致今場熱刺進攻啞火。

再者,熱刺前、中、後三線企位極鬆散,線與線之間缺乏聯繫之餘更留有極多空位,令阿仙奴球員進攻時可以輕易打穿中場嘅防守,直接面對後衛,防守時熱刺嘅中場就形同虛設。再者,今場阿仙奴主打兩邊 half space 位置,雙閘配合雙翼及進攻中場不斷衝擊呢兩個位置,但熱刺中場迪利阿里、尼當比利皆未有積極回防,令熱刺嘅一對閘經常要一打二,加上列古朗、坦根加防守時經常淨係跟住個波而忽略自己本身嘅位置,令左右路猶如放題俾人任攻。

筆者認為紐奴與其繼續堅持 4-3-3,不如改踢 4-2-3-1 並暫時棄用迪利阿里。首先迪利阿里定位尷尬,防守意識薄弱、進攻時決定得太慢之餘亦經常做錯決定,拖慢進攻速度甚至導致進攻斷纜。現時熱刺中場防守力不足,倒不如直接排出雙防中鞏固防守,由靴爾堡配史基比或榮斯 (Harry Winks),前者負責逼搶而後者負責逗後,確保中場有足夠人手。而進攻中場位置則由尼當比利或盧施素擔任,兩位球員都有一定創造力及護球能力,只要其他隊友肯走位配合相信可以創造出有威脅嘅攻勢。而且 4-2-3-1 可以掩蓋呢兩位球員體力不繼嘅問題,因為無論以尼當比利抑或盧施素嘅體能都難以維持全場高效率嘅表現,呢個陣式除咗可以令佢哋減少防守責任、專注投入體力喺進攻方面外,亦可避免佢哋同時上場令後備無人可換,係喺未解決佢哋嘅體能問題之前嘅權宜之計;再者,進攻中場可以分擔更多組織攻勢嘅重任,狀態低迷嘅哈利簡尼可以專心打最前而唔需要兼顧其他工作,可以專注入球打破入球荒。左右翼方面相信問題不大,畢竟熱刺能夠勝任翼鋒位置嘅最少都有孫興慜、盧卡斯姆拿、基爾及正在養傷嘅貝格雲 (Steven Bergwijn) 。

總結
今場阿仙奴技術性擊敗熱刺,呢場勝仗十分重要,除咗因為係贏咗同市宿敵之外,更重要係大勝一支有實力嘅球隊能夠有效提升士氣,同時建立球員自信心,相信阿仙奴已經走出季初三連敗嘅陰霾。反觀熱刺未見起色,連續五場比賽不勝之餘場均失超過兩球,若紐奴未能及時作出改變、調整,恐怕熱刺接下來都難有起色。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page!(https://www.facebook.com/blacksontalkball/)

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→