得中場得天下 (熱刺對車路士賽後分析)

黑仔講波 於 20/09/2021 發表 收藏文章
圖片來源:Sky Sports

英超第 5 輪尾場上演倫敦打吡,由熱刺主場迎戰車路士。兩隊近況可以話係兩個極端,熱刺喺聯賽及歐洲議會盃連續兩場不勝,包括上輪英超作客 3:0 大敗予水晶宮;而車路士則保持各項賽事連續五場不敗兼只失一球。

熱刺今仗有新兵羅美路首次喺聯賽正選上陣,與戴亞合作鎮守後防中路;中場方面紐奴一改過往幾場聯賽嘅三工兵排陣,派出咗較具創造力嘅尼當比利、盧施素,並將後者推前一格與哈利簡尼及傷癒復出嘅孫興慜合作攻堅。

熱刺正選陣容
GK 1 洛里斯 Hugo Lloris
LB 3 列古朗 Sergio Reguilón
CB 15戴亞 Eric Dier
CB 4 羅美路 Cristian Romero (83' 由山齊士 Davinson Sánchez 入替)
RB 12艾馬臣 Emerson Royal
CM20迪利阿里 Dele Alli
CM5 靴爾堡 Pierre-Emile Højbjerg
CM28尼當比利 (62' 由史基比 Oliver Skipp 入替)
FW10哈利簡尼 Harry Kane
FW7 孫興慜 Son Heung-Min
FW18盧施素 Giovani Lo Celso (62' 由基爾 Bryan Gil 入替)

車路士則繼續以三中堅陣容應戰,由泰亞高施華、魯迪加、基斯甸臣擔任正選中堅,反而龍門位置上改由阿列沙巴拿加把守最後一關,文迪則唔喺大軍名單之中;中場核心繼續由佐真奴、高華錫出任,協助防守、掌控節奏之餘支援前線三叉戟盧卡古、蒙特、夏維斯。

車路士正選陣容
GK 1阿列沙巴拿加 Kepa Arrizabalaga
CB 2魯迪加 Antonio Rüdiger
CB 6泰亞高施華 Thiago Silva
CB 4基斯甸臣 Andreas Christensen
LWB3馬高斯阿朗素 Marcos Alonso
CM 8高華錫 Mateo Kovacic
CM 5佐真奴 Jorginho
RWB28艾斯比列古達 Cesar Azpilicueta
CAM29夏維斯 Kai Havertz (70' 由添姆雲拿 Timo Werner 入替)
CAM19蒙特 Mason Mount (46' 由簡迪 N’Golo Kanté 入替)
FW 9盧卡古 Romelu Lukaku

上半場兩隊都好著重前場防守:熱刺中前場透過積極逼搶令車路士未能輕鬆於中後場組織,而車路士則利用前鋒盧卡古加上進攻中場蒙特、夏維斯以遮線嘅方式封鎖中路嘅傳球路線,逼使熱刺要從邊路進攻。雙方球員不斷跑動創造空間,打得你來我往,不乏入球機會,但喺雙方門將都有穩定發揮下上半場兩隊互無紀錄。

下半場一開波車路士就以簡迪入替蒙特改踢 3-5-2 增強中場控制力,效果顥著,令車路士得以喺下半場主導形勢,奠定今場大勝嘅基礎。49 分鐘先有泰亞高施華憑藉角球攻勢頂入,8 分鐘後簡迪禁區外起腳省中戴亞改變方向入網。落後嘅熱刺好快作出調動,以史基比、基爾入替尼當比利、盧施素,但亦未能扭轉敗局,並喺補時再失一球,最終主場以 0:3 不敵車路士。

熱刺 – 無鋒陣只見其型
熱刺正選陣容雖然名為 4-3-3,但進攻時除咗靴爾堡會固定喺中場中嘅位置外,中前場嘅其他球員都會不斷換位,加上熱刺中前場球員不斷主動作出逼搶,令筆者不禁諗起曼城慣用且善用嘅無鋒陣,但唔同嘅係曼城著重直接攻擊 half space 位置,熱刺則比較常於邊線憑藉雙閘列古朗、艾馬臣 overlap 作配合再殺入禁區。相信紐奴起用呢個戰術一定程度上係因為盧卡斯姆拿 (Lucas Moura) 、貝格雲 (Steven Bergwijn) 兩位擅長突破嘅球員都受傷未能上陣,打反擊嘅話變相只有啱啱傷癒嘅孫興慜一個突破點,對方容易防守,故此同時派出尼當比利、盧施素上陣,希望球隊作主動進攻一方。筆者之前講過尼當比利、盧施素係現時熱刺陣中最具創造力嘅中場 (詳情請見延伸閲讀),兩位球員同時上陣的確可以分擔組織重任,讓哈利簡尼可以減少回後造波嘅次數,專注喺最前等待入球機會;而當哈利簡尼墮後擔任 playmaker 嘅工作時,其他球員如迪利阿里、尼當比利、盧施素則會前插,確保最前線有足夠嘅球員,或牽制對手、或作為接應點。

雖然球員有積極跑動,但面對住車路士嚴密嘅防守,創造出嘅空間往往都一閃即逝,偏偏熱刺球員都把握唔到呢一剎那送出 killer pass;此外,熱刺球員對球隊進攻戰術並未習慣,不時會出現欠缺配合或走位疊位等情況,導致進攻容易斷纜。再者,哈利簡尼狀態低迷,無論係射波、傳送抑或決策能力都係水準以下,亦係導致熱刺攻力疲弱嘅其中一個原因。

另外,當熱刺以 0:2 落後時,紐奴竟然以史基比、基爾入替尼當比利、盧施素,一口氣換走兩名最具創造力嘅球員,筆者認為以基爾入替尼當比利或盧施素其中一人先係正確調動。基爾擅於盤扭突破,進攻時能夠為球隊創造空間,甚至有機會憑個人技術殺出一條血路,喺球隊落後時換入呢位進攻球員非常合理,而佢落場後的確能夠為球隊注入活力,透過不斷嘅跑動、突破去創造空間;然而,史基比係一個偏向防守或工兵型嘅中場,對進攻冇太大嘅幫助,並唔係熱刺喺需要追和嘅時候要換嘅人。或者係因為尼當比利同盧施素體能下降嘅問題非常嚴重先要作出呢個調動,畢竟喺上季呢兩位球員都鮮有踢足 90 分鐘,但背後紐奴真係要好好考慮下應該點樣分配呢兩名球員嘅上陣時間同點樣訓練佢哋嘅體能。

車路士 – 戰術大師杜曹
車路士喺下半場換入簡迪絕對係今場比賽嘅轉捩點,領隊杜曹居功至偉。上半場受制於熱刺嘅主動逼搶及中場中人數優勢,車路士難以如常從後場開始組織,即使佐真奴或高華錫回後幫波試圖破解逼搶亦未能成功;但簡迪上場後打多一個中場變成 3 打 3 ,車路士喺中場人數上再無劣勢,組織進攻時為後防提供多一個選擇;而且簡迪攔截準繩、覆蓋面廣,增強中路防守之餘亦令球隊更容易保持控球,尤其是當進攻被對手解圍時,有簡迪在陣令球隊更容易回收球權。隨住下半場熱刺球員體能下降,逼搶強度下滑,車路士逐漸控制中場,主導形勢,發動一波又一波嘅進攻。若非對方門將洛里斯有精彩演出,相信今場比賽車路士唔只入 3 球咁少。

圖片來源:YouTube - LK Highlights (https://www.youtube.com/watch?v=GwngC5ZVEJM)

緊密嘅防守亦係車路士今場致勝關鍵。從上圖可見,防守時除咗三中堅同一對翼衛之外,車路士甚至會動用到中場組成後防線嘅其中一員,人數上嘅優勢加上球員緊密嘅企位,令對手難以進入己方心臟地帶,只能喺禁區外互相傳球,即使熱刺球員會走位、換位試圖牽扯防線,但對於有人數優勢嘅車路士嚟講成效不大。

總結
繼上輪英超輸俾水晶宮後熱刺再經歷一場大敗,喺盧卡斯姆拿、貝格雲因傷缺陣,加上哈利簡尼狀態低迷兼且聯賽尚未開齋嘅情況下,熱刺喺進攻方面彷彿迷失咗咁,相信仍然需要一段時間調整;而車路士則繼續保持火熱嘅近況,贏得非常有說服力,而且再一次喺不失球嘅情況下贏得比賽,為佢哋下輪比賽主場迎戰曼城打下一支強心針。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page!(https://www.facebook.com/blacksontalkball/)

如果喜歡我們的文章,請即分享到︰

標籤: 英超  熱刺  車路士  簡迪  

留言


請按此登錄後留言。未成為會員? 立即註冊
    快捷鍵:←
    快捷鍵:→