2017

2017

2017年恆指升左37%,好明顯係牛市,係正既;但呢個世界唔係非黑即白,比如話,作為皇馬球迷,我地應該點定義2017年呢?

2017年皇馬拎左西甲、歐聯、歐洲超級盃、西班牙超級盃、國際冠軍球會盃等五個獎盃;我地有C朗拿度拎到2017年金球獎、我地有C朗、摩迪、卻奧斯、馬些路、拉莫斯入選2017年歐洲最佳陣容,我地重有施丹拎左2017年世界最佳教練。然而,下半年度猶如過山車一樣,表現直插谷底,西甲連續不勝、前鋒集體啞火、球員表現一落千丈,風水輪流轉之下,2017年以0:3輸比巴塞作結。一時間,2017,好似變左皇馬史上最差嘅年度。

喺風頭火勢之時,好多人企出黎批評球員表現幾咁不濟:「一早就見到C朗疲態」、「一早話左賓施馬廢」、「條中場咁老,點踢啊」、「個陣容都識背啦,比人睇穿哂啦」;因此,「點解唔買前鋒中場後衛龍門」既論調成為冬天的旋律。然而,正係呢套正選陣容,係今季開初依然踢出統治性既表現,擊敗摩連奴既曼聯嬴得歐洲超級盃,更加喺開季兩場西班牙超級盃連嬴巴塞隆拿,連碧基都頹底咁第一次覺得巴塞真係唔夠皇馬黎。
球季進行左一半,的確地可以見到球隊嘅好多問題。首當其衝係球隊結構改變。之前曾撰文寫過17年陣容結構完善,有必然嘅正選、有極欲證明自己嘅頂級球員、有充滿潛力嘅後生仔,每一個球員於球場上,都有充足嘅個人慾望推動自己。上季初曾經迷失嘅伊斯高,同飽受批評嘅占士良性競爭;學成歸隊嘅莫拉達不斷以入球挑戰賓施馬,證明自己;華斯基斯、高華錫把握每次上陣機會,發揮所長;阿辛斯奧、馬利安奴無後顧之憂地展露才華和衝勁。反觀今季新加盟嘅球員全都非常年青,華利祖、菲奧、夏卡美、羅蘭迪、施巴約斯、馬約拿,最大都不過22歲。無論實力或經驗,對上左神台嘅伊斯高、賓施馬、馬些路,甚至高華錫都構成唔到競爭。簡單黎講,皇馬今季就好似請左好多intern,新球員喺場上似係學野,而唔係比貨。「長工們」發揮自己,但少有交出超水準表現。我認為某程度上,引致今季少左好多關鍵時候扳平或反超嘅底氣。

此外,球隊板凳深度唔及上季。但誰都知道擁有莫拉達、占士、比比嘅後備席係一種奢侈。今季只係回歸現實。其實多一名前鋒係需要的,只係施丹因為維持球隊平衡,並期許馬約拿高度成長,而於夏季放棄了補充嘅時機。再講,冬季轉會期間買入球員亦非上策,因為咁等於間接同球隊所有人,包括所有大佬們講,你地質素唔夠,要搵幫手。新加盟球員亦要接受巨大嘅壓力,例如佢地有無拎過3屆歐聯?有無踢過歐聯決賽?取代左交唔交到功課?施丹一直維護嘅更衣室平衡,會一下子被打破。到時候,只有重組一條路。所以,我認為施丹曾經作為球員嘅經歷,會驅使佢傾向相信現有班底。

作為主帥既施丹,亦有一反常態嘅表現。首先請大家唔好忘記,施丹係從賓尼迪斯嘅手上接過爛攤子,然後連奪歐聯。大家用嘅都係同一班球員,但球隊嘅踢法、士氣,已經有天壤之別。而施丹嘅魅力,在於佢果種特立獨行嘅靈氣。如佢喺節奏急速嘅球場上,仍然獨自起舞,用自己嘅節奏,活喺只有佢嘅球場上。作為教練,佢曾經知人善用、敢於使用年青球員、敢於輪換、敢於轉陣、敢於嘗試、勇於信任。但自從九月份開始,即使西甲與歐聯交替上陣,施丹都依然使用相同嘅鑽石陣容上陣。點解唔試下4-3-3打邊路?點解唔用新兵搭舊兵試下化學作用?既然幾日後踢歐聯,點解唔做輪換?隨著時間嘅推移,皇馬戰績每況愈下,施丹臉上嘅笑容,愈發變成緊繃嘅面容,記者會上嘅談笑生風,換來直白嘅陳述。毫無疑問,呢個係受壓下嘅表現。
其實相比兩年前嘅皇馬,現在根本唔算得係差。既然當日施丹能夠拯救皇馬,今日依然可以。敢於用新人吧!馬約拿係唔夠猛、唔夠壯,但佢有速度、有技術、有足球智慧,可以於陣地戰時幫手鋪橋搭路、走位拉空;施巴約斯踢波好黏腳,有時重好多多餘動作,但佢技術好,有膽色,關鍵時候可以喺前場位置搞動防守,就好似當初伊斯高咁;羅蘭迪唔夠壯、攔截唔係特別勁、防守位置亦唔係好出色,勝在勤力、攻防節奏快、踢法爽朗,跑動多嘅時候絕對幫到手;菲奧防守和攔截可以再好啲,但佢勁在速度快,而家馬些路表現於水準之下時,可以比佢左路走上走落,或者會有新嘅攻擊模式;華利祖經歷過德甲洗禮,可以比多啲機會佢擔正,或者客串右閘都可穩住右路。

多啲替換吧!高華錫、阿辛斯奧、華斯基斯等等,現在都係出色嘅角色球員,佢地都有充份嘅理由去表現自己,點解唔多啲使用呢股動力?久而久之,往往可以帶動球隊氣氛。

可以做其他嘗試!上季伊斯高因為施丹設計嘅鑽石陣容而打起,今季點解唔試下打造其他攻擊核心?巴利絕對有咁嘅能力,睇到上場對維拉利爾佢幾乎無掂過波,何不嘗試於球賽某些時段由巴利發動攻勢?當初佢都係咁樣喺熱刺打到曉飛。重有阿辛斯奧,可以比佢多啲衝擊邊線,拉出空檔亦係一種打法。施巴約斯,剛剛都提到佢絕對有能力喺無可能嘅地方創造可能。當每個球員都有角色去發揮,而非一味被體制所限,自然就兼顧到戰術與天份。

當初施丹用佢嘅信條創造一次又一次嘅成功。然後成功似乎成為公式,足球似乎變成體制,靈氣和激情仿佛盪然無存,勝利不再係渴望而係必需品。或者連續嘅失敗,可以令人回想初衷,記得當初點比人睇死,想點樣證明自己,想用漂亮嘅足球嬴得尊嚴,想話比世人知道,皇家馬德里係不死的。

The whole world wants to see fail,
The media wants to see us suffer.
It’s us against the whole world.
We’ll do it for our fans and for our families.
Their desire to see us fall,
Only makes us stronger

如果喜歡我們的文章,請即分享到︰

標籤: 2017  real madrid  皇馬  皇家馬德里  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→