雷根尼斯的啟示 馬體會之戰不容有失

「西甲領頭羊皇馬又嬴一場」、「齊祖27場不敗神話延續」、「巴利梅開二度閃耀全場」如果比著以前見到皇馬嬴波,一定會喺起身臨番學前,打開新浪網睇下啲編輯寫嘅皇馬J文。果陣時淨係睇標題都已經好過引,睇埋內文簡直high哂。話說回來,踢左11場之後,西甲就只係淨番皇馬一支不敗球隊;但唔好意思,呢篇文章可能要潑大家冷水,面對現實。

西甲不敗真面目
皇馬現時喺西甲打左11場比賽,取得8勝3和,積27分排榜首。

細心睇下對手,原來前十名球隊只係打左4場,分別取得2勝2和成績。例如對第三名維拉利爾打和1-1;對第六名皇蘇臝0-3;對第七名畢爾包嬴2-1;對第9名拉斯彭馬斯和2-2。

事實上,以上幾場比賽場面並非一面倒的十拿九穩。打和維拉利爾一場,面對西甲現時最佳防守隊伍(只失7球),皇馬當時就集中攻勢於邊路傳中,單一板斧下只能以罰球破門;對陣拉斯彭馬斯一役,面對全場緊迫、控球在腳的踢法,皇馬幾乎陷於被動,長期於中場膠著,最後把握僅有機會破門;對陣畢爾包亦曾久攻不下,最終於完場前由莫拉達射入險勝。

另外,其餘7場對第十名以下球隊,即使攻力弱得數一數二嘅拉科、貝迪斯都取得入球,排尾二嘅奧沙辛拿甚至入夠兩球,防守軟肋,表露無遺。

雷根尼斯的啟示
皇馬攻擊板斧單一、面對緊迫無從適從嘅問題,直到現在依然生效。對住雷根尼斯囤守中路、全場緊迫,皇馬要到20’ 先有莫拉達接應巴利K角位傳球頂高,形成第一個攻門。事實上直到巴利於38’ 靈機一觸嘅入球之前,皇馬一直都未能製造到似樣嘅攻勢。即使面對呢種熟悉嘅悶局,球員仍未見有多走位,多支援,多製造空間。往往在進攻無成效時,大家都心急,所以本場中段開始見到閘位同中場球員突前到前鋒位置,但就頂住了前鋒盤球路線。

本場亦延續皇馬今季嘅慣性遲入局、開場節奏偏慢。雷根尼斯壓前好快;面對緊迫,皇馬沒有於中路靠短傳入滲,而選擇於長傳比兩閘、翼鋒走邊路空位,或者左右轉邊,但往往欠卻準繩,造成失誤。後防開場連續傳失波,比如華拉尼同卡華積頭10分鐘就已經直接傳過個波比對手3次。

前場無態,本場缺席嘅賓斯馬於周中歐聯都唔係十分活躍;莫拉達被人犯規犯足全場,難有表現,入到波已經好好;C朗仍然一貫打飛機,命中率其差,表現遠在水準之下,令人好擔憂;巴利有狀態,但談唔上活躍,唔講入球其實整場無咩其他表現。更致命嘅係,三叉擊缺乏互動,經常形單隻影,遊離於左中右。

此外,吸取之前失球教訓,今場施丹明顯要求中場更多鎮守中路,卻引致缺少前插。例如今季阿仙奴嘅奧斯爾就好多前插搞亂對手後防,但今仗皇馬沒有,明顯保守為主。三個中場幾乎一齊企喺中圈分波。即使伊斯高都唔係用最熟悉嘅短傳、走位去比賽,似乎驚被打反擊。

馬體會之戰 不容有失
國際賽後嘅星期日就要作客面對馬體會。現時馬體會主場氣勢旺盛、保持不敗,於卡達朗球場攻入18球,只失4球。計埋作客比賽總共只失8球,失球數字上排西甲第二。面對強勢嘅馬體會,現時皇馬嘅狀態好難佔到甜頭;但正因如此,更應全取三分。

第一,積分上可以拉開差距,如果順利將可拋離馬體會9分,保持與巴塞的2分距離;第二,同城打比戰勝出必定士氣大增,接下西甲直路面對巴塞、華倫、西維爾等將可承勝追擊;第三,令周中歐聯對士砵亭的比賽無後顧之憂,集中爭取歐聯出線主動權;第四,成功取勝意味住皇馬應能找到勝利方程式,並可用未來幾仗重覆驗證,有助季尾衝刺。

高華錫表現「關鍵」
屆時嘅比賽正選陣容相信與本場無出其右,賓斯馬和摩迪估計會成為正選。當中,我認為高華錫將會係「關鍵」,關鍵係因為佢打嘅係皇馬最重要的防中位置;關鍵係因為佢必須要再提升表現。

作為防中,佢防守嘅作用實在唔高。上場屌完佢,佢今場對雷根尼斯依然懶散。好多時鏡頭影緊打反擊,你唔會見到佢追番黎,往往等個波被清走先出現喺鏡頭。而且佢全場只有一下剷波。

再用數據分析。就西甲的搶斷和攔截而言,高華鍚係卡斯米路後嘅最佳防中人選。卡斯米路場均5.7搶斷、1.3攔截;卻奧斯3.3、1.3;摩迪1.6、1.6;高華錫2.3、1.4。

無錯佢係打防中,但佢從來唔打爛仔波,埋身肉膊少,幅蓋面少,犯規更少。作為防中,高華錫未有過成功攔截射門或傳中,反映位置感和幅蓋面弱;此外,高華錫的場均犯規只有0.5,與卡斯米路1.7、卻奧斯0.8、甚至乎阿辛斯奧0.9相比顯得過份斯文。

與高華錫(搶斷2.3、攔截1.4、犯規0.5)對位嘅馬體會球員加比(3.3、2.5、1.6)和薩爾(2.8、2.4、2)就顯得有血性、有狠勁得多。唔係話打防中要打到好似隻秋咁,但有時候防中就需要展現強度和拼勁,過份斯文只會令球隊落於被動。由其係面馬體會呢類鐵血軍團,如果你唔用熱血去打拚,氣勢和脈搏係唔會來臨。雖知高華錫係有藝術氣質,但黎緊嘅血路絕對需要你披荊斬棘。



Statistic ref: Whoscored
https://www.whoscored.com/Teams/52

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Dan Lau
    Dan Lau 於 08/11/2016 評論 NO. 1

    馬體會不容有失

  • Ramos Cheung
    Ramos Cheung 於 08/11/2016 評論 NO. 2

    宜家連Kroos都傷埋,真係唔知點搞

  • Leung Kleung
    Leung Kleung 於 08/11/2016 評論 NO. 3

    睇到個四點理由真係得啖笑 利申半皇迷

  • Voonchoy Lee
    Voonchoy Lee 於 08/11/2016 評論 NO. 4

    和波

  • Bo Tai
    Bo Tai 於 08/11/2016 評論 NO. 5

    馬體W

  • Ka Fai Chan
    Ka Fai Chan 於 09/11/2016 評論 NO. 6

    其實篇文好似有d問題,前面說皇馬中場欠缺支援,進攻冇成效時都因心急而突到前鋒位。
    但後面又指出中場因施丹的指示而缺少前插,踢得保守,只在中場分波。
    那究竟皇馬中場在這場比賽有沒有前插?

  • Cary Chan
    Cary Chan 於 09/11/2016 評論 NO. 7

    摩迪同高華錫都踢到防中既

  • Cary Chan
    Cary Chan 於 09/11/2016 評論 NO. 8

    摩迪同高華錫都踢到防中既

快捷鍵:←
快捷鍵:→