如果你係皇馬球員 就唔好再輕率對待比賽

喺一個空空如也嘅球場,播住最令人激昂嘅歐聯主題曲,只係聽到球員嘅掌聲,整個反差係如此大、如此好笑。為左呢場歐聯作客比賽,皇馬為華沙之戰準備了少見嘅4-4-2陣式,陣中四大前鋒悉數上陣(BBCM),配以技術型中場搭檔(KK)。面對昔日嘅手下「大敗將」,開場僅一分鐘就由巴利左腳窩利直飛死角打開紀錄,順便創下皇馬歐聯史上最快入球紀錄。任誰都無想到,面對堪稱本屆最大魚腩嘅歷基亞,竟然於領先兩球嘅情況下被對手連入三球,到臨完場先由高華錫扳平,勉強保持26場不敗。呢個成就,又係多麼諷刺。

施丹的失策
賽後有記者問到究竟咩地方出錯,施丹就話:
「我地幾乎所有野都差啲,我地缺乏強度,特別喺領先兩球之後」
「我地失去左強度;而當你無左強度,你就會好容易失球」
「這是一場複雜的比賽,而我需要為已發生嘅一切負責。呢種係好奇怪嘅感覺」

其實施丹講得啱,由比賽開始嘅第一秒鐘起佢就需要負上責任。點解會喺呢場比賽安排四位前鋒同時上陣?四叉擊可以嘅,但中場點解又安排兩位防守薄弱嘅搭擋?既然打得全攻陣容,全隊就要為各自的防守任務做足心理準備。但反擊時,高華錫同卻奧斯呢?仍然用均速「follow」住對方,咁有無去迫搶?有無嘗試去補位?重有四前鋒?喺對手反擊時等待反擊,真係一絕。

下半場領先一球嘅情況下,無理由判斷唔到對手會背水反擊。作為領隊嘅施丹,喺更衣室又有無為球員做好呢方面嘅心理準備同戰術部署?就呢場比賽黎睇,施丹嘅表現係唔合格的。

防守臝冠軍
呢場比賽過後,皇馬又將不敗紀錄延長到26場。但同時間,本季皇馬踢嘅15場比賽中,就只有2場比賽保持清白之身,幾乎每一場波都失最少一球。咁代表球隊對於防守沒有始終如一嘅集中。而防守,偏偏係近代足球冠軍嘅必有基因。

對於呢個問題,卡斯米路唔係問題,更唔係真正答案。最重要嘅係球員對防守嘅態度,關係到球員對勝利嘅執著。如果你真係想嬴,你會唔會停下腳步?人有惰性,懶惰會傳染。你唔跑,點解我要跑埋你果份?你唔迫唔搶,個波係唔會自己黎你腳的。近幾場無論對手幾弱,皇馬都會失球。即使施丹有責任,作為球員更加責無旁貸,必須展現對防守嘅集中度、積極性。唔係每一場被對手反敗為勝之後,重會有機會比你扳平。

高華錫「不容再失」
喺度我重必須要屌鳩高華錫。失第一球時,對手喺禁區頂心臟位置左甩右扣,名義上嘅防中高華鍚係度做咩?喺度扮緊迫,作勢要行過去,其實企左喺度,結果對手咪「順便」過左佢,又「順便」推順個波,再「順便」抽到應一應,最後「順便入埋波」。失第二球,高華錫又再喺度睇波,睇住對手加速,沒有嘗試迫搶,再次目送皮球入網。

咁激動,全因為佢非常令人失望。明明有能力有大好前途,點解唔學學師兄摩迪每球必爭,充滿競爭力去踢每場比賽?每每見到高華錫嘅睡惺忪、懶洋洋嘅跑姿同踢法,由其防守端嘅輕率表現,真係令人非常氣惱。任你進攻才華再高,如果你態度輕率,你嘅皇馬生涯亦會到此為止。

好記得若干年前,皇馬黎左個巴西右閘叫施仙奴,初期頻頻入世界波,直到有一日卡路士話「踢皇馬無想像中咁易,你必須付出更多」之類嘅意思,最後承佢貴言,無幾耐施仙奴就走左。

「常勝」是甚麼? 
籃兒當入樽有一幕講到海南新人青田信長諗住輕率比賽,隊內嘅神奈川第一人牧伸一就捉住青田,指住台上觀眾揮舞住嘅旗幟問度:「你沒看到那幾個大字嗎?」「常勝」「如果你是海南的球員,就別說那麼天真的話」因為海南準備認真、每場比賽都使出百份百嘅力量、對勝利採用最佳策略、對冠軍嘅驕傲、對常勝從不殆慢。相比起異軍突起嘅湘北,其實要長年保持競爭力更難。

我認為皇馬嘅處景同漫畫中嘅海南好相似,常勝係必需。常勝唔會因為你係皇馬就自動降臨。你必需要比別人更努力、更專注先可以保持成功。第一步就係做好防守,搶到個波,先再講攻城陷陣啦。

常言道,驕兵必敗。每季皇馬都會有欣欣向榮嘅時候,但往往又有唔少爆冷場面發生。今日仍能保持不敗,有實力,亦有運氣使然。若然球隊目標係先取西甲、再取其他,咁皇馬就絕對再無餘地去失分,必須保持高水準嘅穩定表現。

原本嬴左就鎖定榜首出線位置,今場平局令皇馬落後多蒙特2分,領先士砵亭5分。要輕鬆走線鎖定首名,黎緊對多蒙特就變得非常關鍵。

今場比賽,出現得正合時宜。希望球隊能痛定思痛,於球季白熱化前改善陋習;若非如此,筆者相信皇馬本季將會一事無成。這兩年辛苦建立嘅穩定架構、施丹嘅帥位,屆時一切被推倒重來也不用驚訝。

如果喜歡我們的文章,請即分享到︰

標籤: real madrid  皇馬  

留言

會員
我要評論
請按此登錄後留言。未成為會員? 立即註冊
  • SuperConan
    SuperConan 於 04/11/2016 評論 NO. 1

    「男兒」,不是「籃兒」

  • Ming Kit Wong
    Ming Kit Wong 於 04/11/2016 評論 NO. 2

    精闢

  • Teddy Chan
    Teddy Chan 於 04/11/2016 評論 NO. 3

    係皇馬踢波得一條命,錯過左就會gg了

  • Conrad Chan
    Conrad Chan 於 04/11/2016 評論 NO. 4

    其實,施丹排個咁性感嘅陣
    球員可以點?
    領隊唔係要強迫球員做唔擅長嘅事
    反而係應該發揮球員優點互相配合

  • Alvin Chung
    Alvin Chung 於 04/11/2016 評論 NO. 5

    其實亂排陣又424又442最後仲334
    好明顯想輸/和比自己走盞首名/次名出線,暫時黎講
    首名出線要打PSG, Juventus, Manchester City, Porto, Bayern Munich, Leverkusen
    次名就打
    Arsenal, Napoli, Sevilla, Leicester City, Monaco

  • Gordon Hoi
    Gordon Hoi 於 04/11/2016 評論 NO. 6

    真心好想睇西甲隊對英超

  • Devil_Mark
    Devil_Mark 於 04/11/2016 評論 NO. 7

    其實關咩事姐,,下半場收到Order 數完銀子,咪失波lo,合情合理..
    輸足3球賴強度不足..但係又唔輸得起...咪最後叫做追得到..
    成個劇本就係甘..

快捷鍵:←
快捷鍵:→