永恆的正選 賓施馬

人類,係善忘的;縱然係咁,相信都好難忘記賓施馬今場錯失左整整七個黃金機會。然而,如果人類不善忘的話,就唔應該忘記賓施馬應有嘅實力。

回帶到八月十三日,作客對巴塞隆拿嘅西班牙超級盃首回合,賓施馬兩下插花過到比基坐喺地下之後,傳比遠柱嘅卡華積射門,被佐迪艾巴飛身護空門;幾日之後番到班拿貝,積極嘅B9回追馬斯查蘭奴,創造華斯基斯射中門柱嘅機會。當然,球迷唔應該忘記賓施馬鬼魅一般喺烏堤堤身後攝出黎,控高個波、抽身窩利射入。
永恆的正選中鋒
要數賓施馬嘅靈光時刻又何只咁少,然而比起呢一切神奇時刻,對皇馬而言最重要係賓施馬作為中鋒嘅察應、組織能力。誠言作為中鋒,佢搶點沒有法卡奧好、身體質素沒有哥斯達強、把握力不及利雲高、盤扭唔夠蘇亞雷斯神奇、速度唔夠奧巴美揚快,但係賓施馬嘅控球、察應、配合和時刻冷靜嘅頭腦,絕對係皇馬喺前場組織和打開缺口嘅不二之法。
前排喺討論區見到有球迷封佢為「永恆的正選」,諷刺佢自從加盟後雖無突出表現,但依然能佔據正選之位。曾經與之競爭正選位置嘅,有希古恩、莫拉達等高質素前鋒;如果計埋曾經傳到似陳陳嘅奧巴美揚、利雲度夫斯基、阿古路等等,都會覺得賓施馬可以佔有正選位置咁多年,係好「神奇」嘅事。

數一數,自2009年加盟之後,賓施馬歷經柏歷連尼、摩連奴、安察洛堤、賓尼迪斯和現在施丹的執教。五位教練,各有所長:柏歷連尼講究短傳、控球。摩連奴追求反擊、紀律。安察洛堤著重平衡、節奏。賓尼迪斯則不予置評。現在施丹嘅皇馬則講求走動、耐性。

獨一無二的賓施馬
有些球員必須喺特定嘅戰術體系下才能發揮所長,例如巴利擅長打反擊但不擅傳控陣地戰、伊斯高則相反。又例如奧斯爾不能於高壓體力化嘅比賽發揮(剛剛於星期日發生)。而賓施馬嘅特點令佢能夠於不同戰術下表現,成為每個領隊心目中嘅首選。

技術上,佢嘅控球觸感極佳,即使再高難度嘅傳球都能以最舒服、最自然、最合理嘅方式控下來,而且完成速度快,甚至first touch 二傳比隊友也好、邊走邊控也好,令反擊打得更流暢,陣地戰亦打得更得心應手。始終最高水準嘅比賽當中,用多一秒時間控球或傳球,機會可能就隨之而逝,好多時機會就喺一瞬間岀現。

位置上,佢係一個中鋒,職責主要喺禁區搶點。而實際上,賓施馬經常拉邊察應組織,空岀位置比C朗和巴利入攝,拉岀中堅、打亂站位,令對方更難釘防。於面對高壓迫搶或巴士陣時,亦能於前場作為控球點,將球穩當地運送到前場。例如最近對巴塞嘅兩回合就經常見到賓施馬擔住碧基接應傳球,往往控定後讓隊友舒服組織。這不單講求身位,更需要清晰解讀對手站位、隊友走位、波嘅來勢,從而選擇恰當嘅動作去完成控傳。

心理上,從當年由法甲橫空岀世至此,賓施馬場內一直甚少露面岀極端嘅情緒,佢無C朗嘅極強爭勝心、沒有馬些路嘅激情。從其動作上觀察,更如水一般平靜,甚少狗衝狗射狗控狗傳,往往見佢都係預判哂對手嘅動作再行動。即係話,賓施馬能夠喺前場作岀快速、正確嘅決定,免除好多不必要嘅失誤,係球隊喺前場嘅冷靜控球點。而事實上,球員於場上嘅決定,正正係分野高水準和一般球隊嘅分別。

呢一切嘅技術特點,再加上賓施馬無私嘅踢法,令佢成為獨一無二的前鋒。亦因如此,喺皇馬前線星光點點當中,有佢擔任了分享球權嘅角色,連同中後場嘅隊友,為C朗同巴利等攻擊手創造機會。要衡量賓施馬嘅尺,晤應該只係一把單一嘅入球尺,更應包括察應、傳控、節奏、配合等不能量化嘅方面。

Form is temporary, Class is Permanent
賓施馬領場嘅狀態低迷確有其事。但狀態調整亦晤係咩新鮮事,忘帶射門鞋呢個術語,亦非今日新知。正如施丹賽後所講,The most difficult thing is to have chances to score. He didn’t score, but he has worked a lot and you can’t blame a player for missing chances.

因為C朗缺陣嘅原因,其實今場賓斯馬好多時都喺禁區搵機會,而能夠有如此多射門機會得到,代表賓施馬於背後不斷閲讀球賽、於正確嘅時間喺正確嘅地方岀現,縱使效率今天如此之低。其實今場阿辛斯奧第一個入球,賓施馬都應記一功,佢先走入中路,引來干度比亞追來,加上正面而對嘅左中堅和原先已經跟住哂嘅左閘,足足有三個華西球員比賓施馬拉走左。講多幾句同情話,其實佢頭頂腳踢、左右開弓都岀哂,飛機又有、龍門神救又有、中柱又有,其實又何嘗晤係B9嘅bad day。

開賽前,見到Marca有篇報導叫Valencia should fear Benzema,如今已然成為笑柄。Facebook上盡是施丹失望拍地嘅gif圖。留言講嘅都係幾廢、幾無用、要賣走、要買邊個、應該一早點點點、如果晤賣莫拉達就點點點、抵死之類。

但係我看到嘅係一個忘記帶射門鞋、運氣差到不得了嘅球員。最後一球頂中被尼圖救岀後,佢坐喺地下,拳頭用力打左草地一下。眼裡係怒火和無奈。咁嘅眼神係晤會磨滅,下場又係90分鐘嘅新一天。


如果喜歡我們的文章,請即分享到︰

延伸閲讀:
2017

留言


請按此登錄後留言。未成為會員? 立即註冊
  • pazu_yanzi 於 29/08/2017 評論 NO. 1

    策應、似層層...咁多懶音你係咪鄭兆聰?

  • 1.75 於 29/08/2017 評論 NO. 2

    儲儲埋埋先一次過爆seed...
    死得啦

  • Hoyin Ting123 於 29/08/2017 評論 NO. 3

    其實好耐之前已經講過,佢好似有高層射住,位置好穩陣,同埋一時失準實有,佢的確係為前鋒製造左好多空間同機會,足球有時唔係剩係睇突破入波,無隊友拉開 ,美斯都要仆街

  • C7Ronaldo 於 29/08/2017 評論 NO. 4

    啱吖..有時一兩場腳風唔順就即刻俾人圍插,但講到尾其實點計佢都係位世界級前鋒

  • Hola Konichiwa 於 29/08/2017 評論 NO. 5

    意思係有啲前鋒連機會都製造唔到,所以佢已經好有威脅。一場半場,我接受。

  • alank 於 29/08/2017 評論 NO. 6

    依家大部分球分 只睇數字 只睇入球加助功 如果佢係差!c 朗唔會咁鍾意同佢踢 其實好多時佢都讓左中鋒位俾c朗 做串連

  • anyman2106 於 29/08/2017 評論 NO. 7

    作者分析中哂,賓9尋晚把握機會確實唔掂,但無阻佢推動隊友入波既能力😂

  • Darren C. 於 29/08/2017 評論 NO. 8

    其實我覺得佢係皇馬既主要作用並唔係射手 最主要係為隊友既拉空走位 然後等c朗阿辛斯奧佢地射門

  • 寡默 於 29/08/2017 評論 NO. 9

    有玩開garena 嘅fifa online 都知佢係chance creater

快捷鍵:←
快捷鍵:→