針對性擴軍後 阿特蘭大更加唔會丟意甲面

黃足坑 於 26/09/2020 發表 收藏文章
貝加莫係意大利入面被武漢肺炎打擊得最大嘅城市之一。市內球隊阿特蘭大一直成為市民嘅精神支柱,季內嘅意甲同歐聯比賽,阿特蘭大多次舉標語支持受肺炎影響嘅貝加莫人。佢哋上季亦取得出色表現。來季目標自然係保住前四,衝突列強。而佢哋亦都有唔少引援,我哋一齊睇下。

首先簡單講下佢哋離隊嘅球員。其實暫時只有翼衛卡斯泰尼轉投李斯特城。另外上季外借去羅馬嘅基安路卡文仙尼,今季正式被買斷,為藍黑軍帶來1100萬歐元嘅轉會收入。至於補入咩人,稍後再講。
阿特蘭大上季有兩段時間表現較為失色。第一段係上年十月中至十二月尾,當時前鋒薩柏達受傷,球隊缺少一個高大中鋒開路同埋頂波,十場意甲比賽只得四勝三和三負;另一段時間係季尾,伊利錫因私人理由離隊。六場意甲阿特蘭大得三勝兩和一負,唔單止將聯賽第二名位置拱手相讓俾國際米蘭,歐聯亦都出局。有關伊利錫對阿特蘭大嘅重要性,可以喺筆者早前嘅文章睇返(連結喺文章最尾)。呢兩段時間可以見到,阿特蘭大喺以上兩個位置冇後備兵源。一旦正選有咩事,球隊實力就會大打折扣。

有見及此,阿特蘭大分別從燕豪芬同莫斯科火車頭,引入林馬斯(Sam Lammers)同米蘭卓克(Aleksey Miranchuk)。前者身高1米89,必要時可以代替薩柏達擔任Target Man位置。同時佢嘅腳下功夫不俗。雖然有身高優勢,但佢喺荷甲主要都係用腳入波。而且有唔錯嘅盤球能力。所以要佢踢後半格,相信佢都可以應付得嚟。


至於米蘭卓克應該較受香港人認識。雖然只係24歲,但係已經喺俄超出道7年,另外佢亦有參與2018世盃,有打開機嘅朋友唔會對佢陌生。米拿卓克可以勝任攻中,中場同右翼,佢嘅前球會莫斯科火車頭喺俄超都係打開逼搶,所以相信佢喺阿特蘭大主帥加斯柏連尼下,都可以適應向兩邊壓逼山嘅打法。今年夏天有段時間,各大聯賽又未開季,得設俄超等二線聯賽睇,筆者都有留意莫斯科火車頭嘅演出。米蘭卓克左右腳皆宜,而且遠射能力唔差。上季喺禁區外都有兩球進帳。我認為佢喺阿特蘭大會充當伊利錫嘅後備。其實伊利鍚離隊後,只係最近先投入返操練,狀態成疑之外,據聞佢離隊嘅原因係被戴綠帽,情緒會唔會被打擊都係未知數,所以阿特蘭大都搵定一個能力唔錯嘅人代替佢。
剛才講到卡斯泰尼離隊。上季阿特蘭大主要用上三名翼衛:右翼衛夏迪保亞丶左翼衛高辛斯,同埋左右皆可嘅卡斯泰尼。如果要做到每個位置都有替補,咁就要左右翼衛都各自增添人手。於是阿特蘭大分別從華倫西亞同基羅納借入比仙尼(Cristiano Piccini) 同莫積卡 (Johan Mojica)。當中後者喺2017/18球季為基羅納交出4個助攻同埋111次傳中,場均制造2.24次射門機會。考慮到基羅納係細球會,呢個數據都唔差。所以唔好因為佢嚟自西乙而睇低佢。不過如無意外佢哋兩個都係擔任後備為主。
比仙尼

莫積卡

呢兩名翼衛都有一個共通點:就係受嚴重傷患影響。比仙尼上年試過髕骨碎裂。整個球季報銷;莫積卡上年就斷過十字韌帶。傷患無疑係佢哋最大敵人。 就好似貝加莫城嘅人民被武漢肺炎蹂躪一樣。有人離世,人民心情未必可以完全復原。伊利錫處境亦有類似之處。惟望喺阿特蘭大協助下,各人可以踢返出本來水準。

除咗提到嘅幾位球員外,阿特蘭大亦買斷車路士嘅中場柏沙歷丶同向祖雲達斯借入中堅羅美路,不過相信後者上陣機會唔多。上季阿特蘭大只有15位球員喺聯賽上陣超過1000分鐘,當中四位係中場中球員。除咗中場中呢個位置外,佢哋板凳深度唔係太多。今年新簽嘅球員正正可以填補後備人腳嘅不足,對佢哋來年多線作賽有幫助。加上今年意甲仍然有五個換人名額,後備質素好會更加有優勢。阿特蘭大陣中只有高美斯同伊利錫係超過30歲。相信新球季對佢哋嚟講,係經驗嘅增加多過能力嘅退化。以加斯柏連尼嘅戰術,阿特蘭大出年繼續會係一支焦點球隊,唔單止唔會丟意甲面,我相信佢哋會係意甲同歐戰嘅黑馬。

如果喜歡我們的文章,請即分享到︰

標籤: 阿特蘭大  意甲  歐聯  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→