沒有伊利錫的阿特蘭大？淺談其作用及重要性

呢兩季阿特蘭大喺意甲表現令人眼前一亮。當中球隊核心伊利錫功不可沒。不過呢位32歲前鋒，自7月11日作客祖雲達斯後，就冇再為呢支黑馬上陣。自此之後，阿特蘭大七場比賽錄得三勝兩和兩負嘅戰績。佢哋表示伊利錫因為“私人理由”而一直缺陣，而有消息指伊利錫被戴綠帽，因此大受打擊，已回國休息。究竟係咪真有此事就冇人知喇！
圖：阿射蘭大前鋒伊利錫

阿特蘭大主帥加斯柏連尼曾經指出，佢哋可以失去沙柏達，但絕對唔可以失去伊利鍚。可見呢位球員嘅重要性。事實上，伊利錫今季賽事射入21球，係藍黑軍團嘅神射手。另外有5球助攻。伊利錫通常踢3-4-1-2嘅右前鋒，或者3-4-2-1嘅右進攻中場，兩種戰術下，佢嘅作用都類似內切前鋒(Inside Forward)，左腳嘅佢可以切乒禁區頂附近射門；佢右腳能力都唔差，所以佢都有唔少落底傳中嘅鏡頭。斯洛文尼亞人場均制造7個機會，係全隊之冠。
伊利錫係球隊重心，曾奪歐聯賽事最佳球員

失去伊利錫之後，阿特蘭大主要以柏沙歷(Mario Pasalic)踢嗰個位。雖然佢喺歐聯八強建功。但整體表現始終不如伊利錫。制造機會方面，喺後伊利錫時代，柏沙歷七場比賽只制造9個機會。但正如頭先提到。伊利錫一場都有七個。睇嚟去到大賽。阿特蘭大真係無法缺少伊利錫！
圖：柏沙歷

最終，阿特蘭大尋晚以1:2被巴黎反勝，八強只步。呢個結果相信比大部份人預期更好，只少某報記者一定冇諗過佢哋係最後一支出局嘅意甲球隊。阿特蘭大所在嘅貝爾加莫位於意大利北部，係受武漢肺炎影響最大嘅城市之一。阿特蘭大多次指出，佢哋係為肺炎死者同埋受重創嘅貝爾加莫市民而戰。其實佢哋尋晚表現都唔差，甚至只係同贏波出線爭幾分鐘。希望呢場比賽，乃至阿特蘭大整個歐聯之旅能夠鼓勵貝爾加莫啦！