歐戰表現雖好 都唔好對里昂期望太高 精選

不經不覺，作為最早開季嘅五大聯賽，法甲已經開咗波三個禮拜。部份球隊已經踢咗四場比賽，里昂係其中一隊。上季里昂喺歐聯成績亮麗，球迷自然會更加期待佢哋嘅表現，有朋友甚至喺歐聯嗰排估計佢哋有望衝擊第二名(你知啦，法甲冠軍就唔好諗住喇)。不過，喺四場比賽過後，我覺得里昂嘅能力有啲被高估。呢四場比賽佢哋只係有一勝兩和一負成績，四隊對手當中實力較強嘅只係上季排第八嘅蒙彼利埃。

里昂有兩場比賽用上3-4-1-2陣式，另外分別排出過一次4-4-2 同3-4-3。有關佢哋喺歐聯用踲戰術，大家或者都略知一二：兩位前鋒喺高位等候反擊機會，加上兩邊翼衛，以速度壓倒對方企高位嘅中堅；中後場以防守為主，由艾奧亞做串連。呢招對住幾隊出名主攻嘅列強都相當奏效，就算去到輸波一戰，戰術都係成功嘅，只係球隊埋門一腳欠缺質素。
返到法甲，里昂算係上游球隊，上季平均控球率達56.4%，只係次於PSG。今季暫時更加有62.3%控球。同歐戰唔同，里昂喺法甲需要主攻，面對對手較後同整齊嘅防線，速度優勢難以發揮符淋漓盡致。圖為主場對尼姆一戰，客軍經常列出5-3-1-1等里昂進攻，實行兵來將擋。

依筆者愚見，如果要突破呢種防線，一係要利用球場闊度拉邊，一係靠球員盤扭過人。前者係里昂常用嘅，佢哋四場比賽共有100次傳中，比第二嘅尼姆(56次)多接近一倍。但係佢哋傳中後，接應成功次數較低。例如伊甘比只有14.3%成功爭頂，丹比利亦只有42.9%。

至於扭波方面，里昂陣中擅扭之人唔多，迪比係較出色一位，而艾奧亞嘅盤扭能力都唔差。但係除咗佢哋之外，其他球員過人都係麻麻，盤扭次數亦都較少。艾奧亞因為曾經確診武漢肺炎，加上對蒙彼利埃一戰領紅被逐，出場時間甚少。呢個時候里昂只有迪比一名突破點。亦睇得出里昂過份依賴個別球員，令對方容易防守。另一方面，主力表現一旦失準，球隊亦自然踢得差。好似利物浦對列斯聯一戰咁，即使文尼踢得患得患失，亦有沙年挺身而出，陣出多名球員都有一定質素，互相依賴，就冇里昂呢個問題。佢哋更大嘅問題係埋門一腳失準，上季佢哋喺法甲一共射入42球，排法甲第三。丹比利丶迪比丶艾奧亞同哥列特依次係隊中最多入波嘅球員。呢幾位球員上季嘅實際入波都比預期入波多，可見佢嘅把握力好過一般球員。

暫時里昂總共有五個入波，除咗對方一球烏龍球外，其餘四個入波都係由迪比射入，而且有三個係嚟自十二碼。可知佢哋今場射門能力低下。其實佢哋每場比賽都有唔少射門機會，只係偏偏唔能夠將佢哋轉化為入球。佢哋四場波共有78次射門，係全法甲之最。預計入球亦都有9.63球。但實際上只有五個入波，就知佢哋射門有幾差。星期五晚對尼姆一戰，哥列特都有幾次機會，好似呢球咁，近門兩次機會都唔入，實在可惜。暫時今季睇嚟，里昂浪費太多呢種機會。
https://i.imgur.com/7j9hDLx.gif
總結
里昂對將十號波衫交俾迪比後，筆者可以大膽肯定佢呢個轉會窗唔會離隊，會繼續成為主力。另一核心艾奧亞就有機會離隊。呢幾場里昂嘅唔如意，都可以歸究此子上陣時間偏少。里昂要重拾正軌，要留得住艾奧亞之外，其他球員都唔可以依賴佢同迪比，其他進攻球員需要有多啲突破，同時埋門都要去返上季水準，先可以喺法甲攞到理想成績。