為藍車尋找五個合適的門將人選

黃足坑 於 16/08/2020 發表 收藏文章
車路士今季奪得第四,呢個成績可能比季賽預測稍好。隨住簽下薜耶治(Hakim Ziyech) 同添姆華拿 (Timo Werner),再去到無限接近嘅夏域斯(Kai Havertz),只要佢哋成功磨合,車路士中前場絕對可以同利物浦丶曼城相提並論。然而後防暫時未見人腳變動。筆者早前都有講過車路士幾位中堅嘅不足。當然龍門都係藍軍較差一環。阿列沙巴拿加(Kepa Arrizabalaga) 錄得全英超最低撲救率,全季共失54球,絕對唔係藍軍樂見。季尾幾場比賽,林伯特寧願用上卡巴尼路把關,睇嚟Kepa已經被放棄。如果要為藍戰士搵一位門將,又有咩可行嘅選擇呢?

1.普比 (Nick Pope, 28歲,現效力般尼)

普比其實唔係今季先彈起,早喺17-18球季,襯當時般尼一號門將希頓受傷,成功上位。上季雖然受傷患困擾,今年重新坐正,演出更加比之前好。最後普比聯賽共保住15次清白之身,只差一場就可以同曼城門將艾達臣平分金手套。如果車路士簽下普比,更加唔擔心佢唔適應英超。唯一擔心嘅係普比用球能力,佢喺般尼大部份時間都係開長波,較少同後防隊友互相組織,同車仔踢法相反,長傳比前面亦都唔準,佢只有約31%嘅波成功長傳俾隊友,係全英超第五差。最後係價錢方面,般尼指出武漢肺炎下,佢哋財政仍然穩健,唔一定要賣人,但如果想喺轉會市場有動作,就要先賣人套現!據報車路士願意用5000萬鎊簽入呢位門將。筆者唔太懷疑佢嘅撲救能力,但要轉到強隊,龍門都要有一定腳下功夫,而因為咁,普比未必係車路士最佳選擇。

2.甸恩軒達臣(Dean Henderson, 23歲,現效力錫菲聯/曼聯)
甸恩軒達臣今季亦有良好表現,除咗保持13場清白之身外,場均失球更不足一球,只係比艾利臣同艾達臣多。同時撲救率達75%,亦係全英超第三。同普比一樣,軒達臣用波以長波為主,暫時未知佢喺英超嘅用波能力如何。軒達臣來季會完成改借,返回曼聯。佢同迪基亞都要求踢正選,暫時未知紅魔最後會留用邊位門將。假如車仔要買軒達臣,相信曼聯都會要求一筆大額轉會費。車仔變上送錢俾競爭對手擴軍,佢哋又願唔願意呢?

3.拉積高域(Predrag Rajkovic,24歲,現效力蘭斯)

今年法甲失球最少嘅球隊唔係巴黎聖日耳門,而係蘭斯。法甲賽事雖然未完成,但蘭斯28場比賽入面,只係失咗21球。而正選門將拉積高域上陣27場,失18球,接近八成撲救率,保住12場清白之身。數據顯示呢位門將表現非常好,預計失球(Expected Goal)比實際失波多超過八球,反映好多本應會輸嘅波,拉積高域都能一一化解;反觀阿列沙巴拿加預計失波比實際失波少接近十球,兩人比較自然形成鮮明對比。佢亦都係較常短傳俾後衛嘅門將。相對符合林伯特嘅要求。同時,呢位塞爾維亞第二國門嘅轉會費應該較上面兩位平。

4.奧拿拿(Andre Onana,24歲,現效力阿積士)
喀麥隆門神已經連續兩季喺歐聯賽場證明自己。歐聯賽事預計失球比實際失波多4.5球,成功接實對方14%傳中。都係歐聯入面數一數二嘅數據。佢面對高波同受壓下傳球成功率都係藍軍需要嘅門將能力。轉會機會方面,據報奧拿拿本人希望加盟車路士。阿積士方面亦已簽下史迪基倫堡,作為奧拿拿一旦離隊嘅替補。相信車仔只要肯俾約3000萬鎊,就能將奧拿拿帶到倫敦。

5.烏尼西蒙(Unai Simon, 23歲,現效力畢爾包)
烏尼西蒙係畢爾包失去阿列沙巴拿加後嘅代替品,今年正式成為巴斯克球隊嘅正選。西甲入面,烏尼西蒙嘅歐聯賽事預計失球比實際失波多近10球,表現係五大聯賽中排行第三。眾所周知,畢爾包賣人係明買未賣,只要付擔到違約金,任何球隊都可以帶人走。據稱烏尼西蒙違約金達5000萬鎊。車路士並非買唔起。只係中完“Kepa”伏後,佢哋會唔會想喺畢爾包買龍門呢?

如果喜歡我們的文章,請即分享到︰

標籤: 車路士  龍門  門將  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→