車路士來季的防線危機

車路士今季失球高達54球，係五大聯賽嘅前四球隊中最多。呢個數據係俾沙利領導下多出15球，可見林伯特嘅進攻足球曝露咗藍軍嘅防守漏洞。之前都有唔少評論指藍軍門將阿列沙巴拿加 (Kepa) 撲救數據差劣。同時好多車迷亦指車路士嘅四位中堅都俾唔到人信心。呢度就想簡單分析佢哋各自嘅優缺點。


1.杜莫利 (Fikayo Tomori, 上陣15場，1291分鐘)
呢位青訓產品係藍軍陣中速度最快嘅球員之一，但筆者認為呢位年青中堅仍然較嫩。面對逼搶時傳波會有出錯，例如作客對里爾一場回傳俾龍門幾乎出事。另一方面防守功夫未夠成熟。幸好佢年紀輕，第一年踢頂級聯賽兼倦勤半季下，其實表現尚可接受。有傳來季會外借，希望多一年經驗後佢會有所進步。

2.魯迪加 (Antonio Rudiger, 上陣20場，1710分鐘)
魯迪加上年同雷斯拍擋，防線成績比今年好。今年車仔防線比上年壓得更前，魯迪加經常去到中場線附近，嘗試阻止對方前鋒攞波。然而呢套戰術並非經常奏效。好似足總盃決賽對阿仙奴一役，魯迪加幾次上前後失位，變相後防打少個，就算呢啲攻勢冇直接變成入波，都足以令眾車迷㩒爆平安鐘。

3.基斯甸臣 (Andres Christensen, 上陣21場，1751分鐘)
同杜莫利一樣，基斯甸臣係車仔青訓，喺歐戰註冊方面有優勢，佢嘅傳球能力亦喺四位之中較出色，係四大中堅唯一一個中長距離傀球成功達九成嘅球員，數據上甚至比曼城中堅拿撲迪好。但身體對抗性係佢嘅缺點，爭頂成功率只有63%，係四位中堅中最低，比賽中亦較少同對方有身體對抗。然而此為中堅重要元素之一，基斯甸臣看來弱不禁風。

4.蘇馬 (Kurt Zouma, 上陣28場，2344分鐘)
筆者認為蘇馬係四位中堅中最好嘅一位，搶高波第一點比魯迪加出色，而失位情況較少，亦有一定用波能力，對阿積士一役自己從後場帶上前令人拍爛手掌。但係始終未到擔大旗級數。最近對拜仁一場兩度跟甩，導致失波，防守能力都係俾唔到信心。

其實四位中堅都仲可以進步。當中年紀最大嘅魯迪加只係27歲，甚至未到中堅的黃金時期。不過車路士都係一支有野心嘅球隊，絕對唔希望以年年爭四為目標。如果將杜莫利外借，再簽到一位有領導能力嘅老將，相信可以鎮住球防，同時將經驗傳授予上述幾位中堅。加上頂盛嘅中前場陣容，來季絕對可以避免四大皆空。