曼城竟被列斯聯打至疲於奔命?

黃足坑 於 05/10/2020 發表 收藏文章
上星期六上演咗列斯聯主場對曼城嘅英超比賽。因為列斯聯喺英超首戰對利物浦踢得好好,大家普遍會想再睇佢哋對其他強隊嘅演出。老實講,筆者對上半場列斯聯嘅表現係略為失望:唔係因為輸咗一球,而係因為踢得唔夠狂。逼搶丶人盯人踢得冇對利物浦時咁極端。相信係擔心失位,導致防守比較保守。

不過,換邊後嘅列斯聯係一個驚喜。尤其去到下半場中段,雙方快上快落,一方攻到入禁區,又被另一方搶走皮球,再被打反擊,再重覆又重覆。呢段時間,列丶曼雙方攻勢好直接同清脆。好少橫傳,只係靠中場一兩腳向前傳送,就將個波轉守為攻。最辛苦嘅,一定係期間不停走上走落嘅後衛。期間,列斯聯亦憑角球攻勢扳平。
時間關係,呢度用上快鏡

喺節奏咁明快嘅打法下,體力下降係必然嘅。據聞比爾沙喺英冠嗰陣,訓練強度已經好高,加上佢哋嘅打法一向都好要求體力,戰至七十分鐘,白衫軍仍然打到有效嘅反擊,未有體能下降嘅跡象。曼城體能雖然唔係出名差,但明顯被打至疲於奔命。講緊嘅只係70分鐘,一般英超球員都唔會咁快散。例如呢下反擊,曼城只有四位球員防守。好耐都唔見其他人返嚟回防。雖然鏡頭冇交代,但我懷疑喺體力急劇下降下,曼城中前場嘅回防意欲已經較低,喺前面散緊步。

另一方面,筆者留意到呢段時間死球較少,令到比賽冇乜暫停時間,呢個都係令球賽節奏變快嘅因素。而哥迪奧拿兩個換人都透露玄機。三個換人之中,有兩個係換入防守球員。其中喺77分鐘,更加係抽走進攻嘅馬列斯,而換入費蘭甸奴。喺未領先下,筆者甚少見哥迪奧拿會咁樣做,可見哥帥都要以穩陣行先。

幸好,曼城冇喺快上快落之間輸多一粒,保住1比1比數,令佢哋保持取勝機會。攻完一段後,雙方喺死球都盡量拖慢,爭取休息時間,始終頭先真係踼得太Chur喇。喺曼城之中,我認為體力最能保持嘅係右閘獲加。去到87分鐘,仍然見到佢回防搶波後,可以自己爆返上前場。可惜只有三位球員有意識參與進攻。一般曼城比賽,殺入禁區嘅唔會只得史達寧一個。
同樣時間關係,呢度用上快鏡


總結
去到比賽尾段,雙方互有攻守,皆能製造好幾個入球機會,不過最終都係無攻而還。曼城受制於體力下,列斯聯喺下半場踼得越嚟越好,係表現較佳一隊。曼城失分,亦可歸究於傷兵滿營,佢哋喺周中聯賽盃中,要用上唔少主力。馬列斯,史達寧丶費蘭托利斯要踢足全場,迪布尼,獲加等人亦要出戰。相反列斯聯喺聯賽盃早已出局,變相主力有更多休息時間。加上今場比賽係喺雨中作戰,體力消耗更大。不過無論如何,曼城呢場比賽失分相當合理,又再一次證明列斯聯係今季英超一路奇兵。

如果喜歡我們的文章,請即分享到︰

標籤: 列斯聯  曼城  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→