歐聯分組：分析各隊作客距離　邊隊要大長征？ 精選

對於歐洲列強嚟講，歐聯抽籤，除咗擔心會否落入死亡之組外，亦都要求神拜佛唔使作客太遠，以免舟車勞頓，減少休息時間。今季歐聯分組已經塵埃落定，而家先求神已經太遲，不過我哋都可以留意下邊一隊要大長征。有外國網呢製作咗一幅歐聯球隊作客距離嘅圖，我就借嚟比大家參考下。各位球迷，又到睇波學地理時間！圖片來源：https://www.reddit.com/r/soccer/comments/j3jrkq/champions_league_travel_distance_breakdown_202021/

今年分組賽，各隊嘅平均作客距離係4786公里。同往年一樣，由於大部份歐聯球隊都集中喺西歐，所以東歐，前蘇聯國家以及土耳其都會有較長嘅作客距離。作客距離最長嘅三隊球隊有俄羅斯嘅卡斯洛達同莫斯科火車頭，仲有烏克蘭嘅薩克達。不過得罪講句，佢哋始終係二丶三線球隊，相信唔太吸引球迷關注。反而要睇下邊啲球隊要遠征呢啲地方。好似英超方面就有曼聯要去土耳其伊斯坦堡，作客巴沙克舒希；車路士亦要作客卡斯洛達。好彩卡斯洛達位於俄羅斯南方，相信就唔使喺嚴寒下作戰。另一方面，雖然歐聯方面就未出詳細賽情，不過英超無弱隊，佢哋遠征之後嘅一場英超比賽，或多或少都會失水準。
車路士所在嘅E組更加係作客距離最長一組。四隊合計要飛超過26000公里。因為佢哋嗰組除咗有32隊位置最東嘅卡斯洛達之外，亦都有最南嘅西維爾。幸好佢哋同組最後一隊對手係雷恩，同倫敦相當接近，只有393公里，係全個歐聯分組賽，作客距離第三短嘅組合。同作客紐卡素距離相若，可能連飛機都唔使搭。

講到作客距離最短嘅組合，就係Ａ組嘅拜仁同奧地利薩爾斯堡嘅比賽，作客距離只有115公里。不過佢哋兩隊都要作客俄羅斯嘅莫斯科火車頭，整體作客距離麵唔少。加上天氣嚴寒，會影響兩隊發揮。

如果以作客距離計，最好運一定係D組，呢組有利物浦丶阿積士、阿特蘭大同米迪蘭特。四隊加埋，十二場比賽嘅作客距離只係10000公里。對利迷係一個利好消息。而32隊之中，作客距離最短嘅都係來先Ｄ組，係位於幾隊中間嘅阿積士，三場作客加埋只係要飛1870公里。
至於最受期待嘅馬賽對波圖，作客距離係1175公里。