車仔簡單而有效的壓逼

黃足坑 於 02/10/2020 發表 收藏文章
希望呢個標題唔會令各位讀者感到奇怪。車路士唔係一支出名逼搶勁嘅球隊。要講逼搶可能用利物浦同拜仁會更加適合。不過車路士喺比賽上經常係主攻一隊,今時今日強隊點都要有啲逼搶元素,所以都會見到車仔踢逼搶,只係冇利物浦等球隊咁高壓。入返正題,喺車仔對熱刺嘅聯賽盃比賽,尤其係上半場入面,藍軍多次用上同一種逼搶方法。個人認為呢招簡單易明,所以筆者將其中一次逼搶節錄出嚟,希望同大家分享下,一齊了解林伯特用咩方式從熱刺身上攞返控球權。

https://i.imgur.com/PH1IqfG.gif
熱刺同而家好多球隊一樣,想從後場組織。龍門球開出嚟比中堅,再傳俾左翼衛嘅列基朗。列基朗回到較深位置攞波,係避免被赫臣奧度爾截波。喺後場危險地帶始終穩陣行先。

列基朗喺呢個位置攞波,正中車路士下懷。五名藍軍球員即時逼向列基朗方向,並盡可能遮住列基朗嘅傳波路線。列基朗難以透過地波交波俾隊友。如果傳被冇遮擋嘅尼當比利,曼治丶佐真奴同艾斯比列古達都可以向尼當比利夾擊,尼當比利亦都要轉身,所以一旦傳俾尼當比利,九成會被車路士擔到。由於列基朗嘅左方同後方都係邊線,佢嘅選擇唔多,自己引球出擊只會吸引車路士進一步壓前。所以列基朗只有大腳向前傳嘅選擇。

今場熱刺前面係拉美拿同貝雲積,藍軍安排蘇馬同杜莫利爭頂。兩位中堅都係擅頂之人,當中蘇馬更喺上季英超爭頂成功率排第七。佢哋容易頂走皮球,破壞熱刺組織。由於拉美拿同貝雲積身型較為細小,所以更加有利車路士呢套戰術。

頂完波之後就要執Second Ball。因為車路士向右路逼搶,頭先都講到有五個人咁多,所以有人數優勢執Second Ball。加上前面有基奧特,令到事情變得更加容易。長遠嚟講,如果添姆華拿踢正前鋒,呢方面可能會被犧牲。搶完Second Ball後,個波就會落喺較空嘅車路士球員身上,今次就由基奧特頂俾艾斯比列古達,呢位隊長再回後組織。

每個戰術都有佢嘅優缺點,如果熱刺前場有一個高大球員(例如哈利簡尼),或者選擇俾身後波,前場同車路士中堅鬥跑(可以參考阿仙奴上季足總盃決賽),車路士就失去優勢。不過呢一個都總算係有效奪回控球嘅策略。大家日後睇波都可以留意下,或者喺睇入波之外,都可以諗下唔同球隊所做嘅每個動作,背後嘅目的。

標籤: 車路士  熱刺  英超  聯賽盃  戰術  

留言


請按此登錄後留言。未成為會員? 立即註冊
    快捷鍵:←
    快捷鍵:→