常被低估嘅世界級前鋒：賓斯馬 精選

講到世界級前鋒，今時今日不得不提利雲度夫斯基。健康嘅阿古路亦相當具質素。至於賓斯馬呢？唔係好多球迷會將佢歸類於「世界級」行列。不過喺筆者心目中，佢可以同以上兩位平起平坐。

力求衛冕嘅皇馬暫時踢咗三場西甲比賽，第一場用上4-2-3-1，另外兩場就用上4-3-1-2。三場比賽入面，無論係陣式同人腳，都係場場唔同。所以可以判斷施丹希望試陣，為皇馬尋找新嘅踢法。三場比賽後，只有四位球員每場都正選上陣，除咗門將高圖爾斯丶中堅拉莫斯同華拉尼外，賓斯馬係唯一一名每場都獲派正選嘅進攻球員。佢亦不負所托，引用whoscored.com嘅賽後評分，賓斯馬三場比賽嘅平均分有7.22分之高，尤其喺4-3-1-2陣式下，佢嘅發揮更佳。

作為一個前鋒，埋門同走位能力好重要。雖然賓斯馬三場波都仲未開齋，但係比賽中已經展現賓斯馬嘅射門能力。好似對貝迪斯呢場比賽，球不著地射入一球，可惜越位在先。又好似下半場一個攻勢，賓斯馬搵到貝迪斯兩名後衛之間嘅空位攝入。如果唔係艾馬臣情急之下擺烏龍，相信賓斯馬好大機會可以射入。https://i.imgur.com/d6ZHQjK.gif
https://i.imgur.com/cyvBb0z.gif
其實賓斯馬對上兩季喺西甲都射入超過20球，應該冇乜人會質疑佢嘅入球能力，而大家都知道，賓斯馬除咗射得，仲可以擔任支援隊友嘅角色。賓斯馬經常回後攞波，回後亦可以吸引對方中堅離開位置，為隊友製造空位。又或者將波分俾邊。兩閘上前係皇馬主要進攻元素，所以賓斯馬回後，某情度上都係協助重馬Build up。由於佢較大隻，護球能力又好，即使有後衛喺身後施壓，賓斯馬都可以食身位，順利分波。
https://i.imgur.com/JlZrHNQ.gif
另外，喺4-3-1-2下，皇馬自然缺少兩翼，拉邊嘅責任亦都交咗俾賓斯馬，可以見到賓斯馬經常去到兩邊位置，再同兩閘配合。

下圖分別係賓斯馬同另一位前鋒祖域嘅Heat Map。賓斯馬活動範圍大，喺球場大部份位置都留下足跡。即使年紀大過祖域，跑動仍然比祖域多。呢個亦都係賓斯馬嘅優點。賓斯馬Heat Map

祖域Heat Map

而更加難得嘅係賓斯馬嘅控球同過人能力，下面就見到賓斯馬左cup右cup，最緋擺脫到敵位傳中，為華維迪助攻；而另一條片就見到賓斯馬對華拉度列嘅一腳射門，賓斯馬個波好黐腳，所以即使被包圍，都能夠順利起腳。扭波勁嘅人好多，如果好扭得嚟，又有賓斯馬咁上下嘅身型就比較少。就係呢兩樣元素加埋，先令佢成為一個出色嘅前鋒。
https://i.imgur.com/bxZqxqF.gifhttps://i.imgur.com/FvBCYId.gif

總結
賓斯馬除咗射門能力只外，佢亦都為皇馬創造好多機會。事實上，佢暫時喺西甲創造咗10個射門機會，喺正前鋒嚟講係第二多，佢亦到創造咗三次射門機會，全個西甲只有貝迪斯嘅簡拿利斯比佢多。同埋要留意，皇馬暫時只係入咗四球波，賓斯馬係參與咗皇馬大部份入球。無論係C朗離開之前定之後，賓斯馬喺皇馬一直擔當住一個重要角色，筆者實在唔明白點解講到世界級前鋒，好少人會提到佢。