德國隊防守角球漏洞

黃足坑 於 19/11/2020 發表 收藏文章
星期二晚,西班牙以6比0大勝德國。比數證明德國有好多不足之處。六球之中,西班牙其中兩個入球都係嚟自角球。可見防守死球係德國弱點之一。筆者會喺呢度嘗試分析兩個角球,尋找德國防守死球嘅弊病。

首先講下第一球角球入波,西班牙有五位球員喺禁區丶兩位球員喺禁區頂丶一個企喺短角球位置。即係連埋門將,西班牙只有兩位球員留守較後位置;至於德國方面,唔計龍門有七個人喺禁區丶兩個人睇短角球丶一個人守住禁區頂,冇人等反擊。最後呢個波係直接斬入禁區,所以禁區外嘅事就唔講喇。

睇返西班牙眾將喺禁區內嘅部署:柏奧托利斯負責遮擋紐亞丶法蘭托利斯同洛迪企近柱丶拉莫斯喺較出位置等走位丶最後莫拉達喺遠柱。而德國方面,哥列斯卡丶真達丶蘇尼同基拿比企喺小禁區頂丶卻奧斯喺近柱落點位置丶根度簡企十二碼點。中堅高治打算跟實拉莫斯,基拿比負責守莫拉達。

哥列斯卡丶真達丶蘇尼都冇明確防守目標。要知道真達同蘇尼都係擅頂之人,唔應該只做執漏;反之身型唔出眾嘅基拿比要防守頭搥了得嘅莫拉達,令人感覺防守錯配。

頭先講到柏奧托利斯企喺門將前面,但係佢有權喺開角球時走位,所以應該要有防守球員「照顧」佢,而從片段所見,最近佢嘅哥列斯卡冇望過佢,只係望出面。西班牙嘅洛迪開波後向近柱走,根度簡冇選擇去跟,變相卻奧斯被兩位西班牙球員夾住,形勢不利。哥利斯卡想過去幫手時,又會將空間送俾柏奧托利斯,可謂兩頭唔到岸;拉莫斯利用根度簡做單擋,成功擺脫高治,但係被白衫重重包圍,所以即使角球斬落拉莫斯度,問題都唔會太大。而莫拉達同基拿比嘅對決,後者完全俾唔到壓力前者,任由莫拉達跳頂,最終個波真係落喺莫拉達度,造成第一個入波。
https://i.imgur.com/bvXiRN7.gif

第二個角球入波,亦係西班牙今場第三球。西班牙有9人喺前場,而德國有10人喺後場,另外1個等反撃。兩隊禁區入面企位大致相似,所以唔花篇幅重覆講。西班牙今次有兩個人喺角球旗位置,角球可以用外彎或者內彎開出,選擇更多,最終決定由法比安左腳開外彎波。企喺前柱位嘅法蘭托利斯向前跑,引開咗一個德國球員,為後面嘅洛迪拉開空間,而本來防守洛迪嘅根度簡被攝贏,連爭頂嘅機會都冇。兩次角球,根度簡都有份做錯事,最終再一次被頂入。其他位置方面,德國仍然係用基拿比mark莫拉達,蘇尼同真達只係做執漏,筆者實在唔明白路維嘅用意。
https://i.imgur.com/qGgghYU.gif

喺輸六球嘅前提下,呢兩個防守失誤只係冰山一角,仲有好多位置值得攞出嚟討論,往後日子德國要好好考慮防守球員嘅配搭。唔知各位讀者又點睇呢兩個角球呢,不妨一齊討論下,互相交流意見。
標籤: 西班牙  德國  

留言


請按此登錄後留言。未成為會員? 立即註冊
    快捷鍵:←
    快捷鍵:→