「我想為腦麻痺患者帶黎希望」談談史葛冼佳亞哥哥—馬田冼佳亞既故事

隨心寫足球 於 12/05/2015 發表 收藏文章
講起冼佳亞,大家可能會諗起原屬曼城,現被借至阿士東維拉既史葛冼佳亞。但係大家又知唔知,史葛冼佳亞有一個叫做馬田冼佳亞既哥哥呢?冇錯,今次故事既主角就係大史葛冼佳亞三年既哥哥—馬田冼佳亞。
(左:史葛冼佳亞,右:馬田冼佳亞)

馬田冼佳亞同細佬們(仲有三弟,現效力修咸頓既謝克冼佳亞)同樣喜愛足球,同樣想以足球作為自己既職業,不過同兩位細佬唔同既係:馬田冼佳亞踢既係七人殘障足球,皆因佢係一位腦麻痺患者。
(謝克冼佳克)

要了解馬田冼佳亞既故事,就必先認識乜野係腦麻痺。腦麻痺(Cerebral Palsy,或簡稱CP),係一種喺人類發展時,未成熟既大腦發生非惡化性既腦病變,而影響活動能力既疾病,甚至可以影響智力、感官等其他範疇。當中患病原因可以分為產前、產時及產後,例如腦膜炎(產後),而腦麻痺類型亦可分成五種,如痙攣型及低張型,初生嬰兒患病機率大約係1/500。
(痙攣型腦麻痺既細分類)

馬田冼佳亞患上左腦麻痺,但殘疾並冇冷卻佢對足球既熱情同野心,佢加入左一隊叫Twerton Athletic既球隊,儘管佢既步履可能有時會一拐一拐,但係技術上佢並冇落後於其他人,而佢心入面亦好清楚自己永遠踢唔到頂級既比賽,不過依然對自己既技術好有信心。現實喺呢個時間出場潑一潑冷水,當時馬田冼佳亞被阻撓參加聯賽,因為其他隊既領隊認為佢係一位殘障人士,馬田冼佳亞冇理咁多,只係做好自己份內事,踢好自己既足球。

直至十五歲,一次意外令馬田冼佳亞改變一生:當日佢抱住朋友既小女兒玩滑梯,點知佢最後衝出滑梯,盆骨落地,起初馬田冼佳亞並冇理會,到事發兩個禮拜後先因劇痛而求醫,送達醫院後檢查發現佢既髖關節甩左臼(Hip joint dislocation),而佢既高肌張力(Muscle tone)令佢出現長短腳問題。經過八年間唔同既治療,例如注射肉毒桿菌素(Botox)、做過八次手術,馬田冼佳亞坐過三年幾輪椅,到廿一歲時接受髖關節更換手術後問題先得以解決。

可幸既係,喺呢六年既艱苦歲月中,馬田冼佳亞都冇被擊沉,因為一方面佢知道佢有家人,甚至整個家族既支持,例如當佢住院時,史葛冼佳亞常常都會去探望佢;另一方面佢知道呢個世界上仲有更多比佢更可憐、更嚴重既腦麻痺患者,所以佢要更快振作起黎。
(史葛冼佳亞與馬田冼佳亞合照)

馬田冼佳亞一行得番就重投足球既懷抱,皇天不負有心人,佢最終都搵到屬於自己既機會:當史葛冼佳亞被車路士外借至普利茅夫既時候,佢將哥哥介紹俾領隊荷洛威認識。荷洛威邀請曾修讀教練課程既馬田冼佳亞夏天嗰陣去社區教下波,就喺教波嗰一日,馬田冼佳亞知道左原來普利茅夫有殘障人士足球隊。

加入球隊後,馬田冼佳亞踢出好表現,被英格蘭球探加利禮治觀察到,最後更被召入英格蘭國家隊,征戰2012殘奧既七人足球項目,值得一提既係,該年史葛冼佳亞亦有代表英國參與倫敦奧運會。馬田冼佳亞講到:「作為一個殘障人士,我無諗過自己可以代表祖國,我好慶幸我搵到英格蘭腦麻痺足球代表隊。如果你係一個腦麻痺病人,你心入面諗:『我可以點樣發揮自己體育才華?又冇任何平台。』 殘奧既出現改變左一切,你未必可以去到殘奧既水平,但至少你有一個目標俾你去勇往直前。」
(兩兄弟分別征戰殘奧同奧運)

起初最冇可能代表英格蘭足球隊既馬田冼佳亞,而家既國家隊上陣次數反而多過兩位細佬,有時馬田冼佳亞仲會喺兩位細佬面前開玩笑咁話佢係英格蘭國腳,串下佢地添。
(馬田冼佳亞練波中)

當馬田冼佳亞講到英格蘭腦麻痺足球代表隊,佢臉上就充滿喜樂,佢話:「我好開心有呢一班隊友同職員,我地有時可能會互相取笑下大家既殘障,但大家既態度都係非常專業。而家我地踢過殘奧會,我希望將來我地可以踢多啲頂級既比賽,同更多球員有所交流。」佢再補充話:「運動係殘障人士既良藥,可以帶黎自信、喜樂。有啲殘障人士唔想受注目或受傷而收埋自己係絕對無問題,但當你肯走出自己既舒適區,你一定可以擊倒任何挑戰。而我地就係一班企左出黎既腦麻痺患者,我想為腦麻痺患者帶黎希望:我得既話,佢地都一樣得。」

細佬史葛冼佳亞當然為哥哥感到十分高興啦,佢認為縱使佢自己係一位英超球員,都未能好似哥哥咁啟發到咁多人,見到哥哥經歷左咁多挑戰後成功,作為細佬亦為感到非常驕傲。
(史葛冼佳亞現效力阿士東維拉)

而家馬田冼佳亞喺一間學校入面擔任學習支援助理,負責促進一啲殘障學生既學習,有時亦會公開去分享自己既故事,佢並唔會避開唔講自己面對既問題或者旁人眼中奇怪既步姿,因為佢希望以自己既經歷去啟發同觸動其他人,最後當然就係為英格蘭腦麻痺足球代表隊踢波啦!

認識英格蘭腦麻痺足球代表隊:
https://youtu.be/4Q1roq8GelM
若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就快啲睇下喇,多謝支持~

原文,經編輯

留言


請按此登錄後留言。未成為會員? 立即註冊
    快捷鍵:←
    快捷鍵:→