曼聯新球員:你要知道迪比既五件有趣小事

隨心寫足球 於 08/05/2015 發表 收藏文章
睇文之前,同大家講聲,本專欄Icon將會由一個足球改為筆者最喜愛既現役門將—西維爾既比圖,希望大家唔好見怪~

曼聯最近公佈佢地同應屆荷甲冠軍PSV燕豪芬達成協議,將於季尾簽入荷蘭籍既翼鋒迪比。據報曼聯以2500萬鎊搶贏利物浦在內既潛在對手奪得呢位21歲既新星。迪比既到來,令曼聯既進攻線份量又再得以提升,但係球迷可能仲未太熟悉呢位今季不斷同曼聯扯上關係既邊路好手,所以本專欄特意為大家送上有關迪比既五件有趣小事。

1. 迪比既球會處子戰
迪比既職業生涯處子戰發生喺2011年,當時佢代表PSV燕豪芬於荷蘭盃第二輪作客迎戰業餘球隊VVSB,結果PSV燕豪芬呢支荷甲豪門當然係大勝收場,以0-8大數VVSB晉級。該場比賽入面,迪比亦有兩球進帳,可以喺處子戰入波實屬難得,而更值得高興既係:PSV燕豪芬該季於荷蘭盃過五關六將,最後成功贏得荷蘭盃,而呢個亦係迪比職業生涯第一個錦標。

2. 迪比既國際賽生涯
迪比於2013年十月十五日迎黎佢既首場國際賽,當時荷蘭於世界盃外圍賽中作客土耳其,迪比於該場比賽最後階段入替蘭斯,雖然上陣時間只有一分鐘,但卻係國家隊生涯既第一級階梯。至今佢已經為荷蘭隊踢過15場比賽,貢獻左兩個入波。迪比亦有被當時荷蘭主帥雲高爾選入2014年世界盃荷蘭國家隊既二十三人大軍,並選擇穿上21號球衣。

3. 迪比喺2014世界盃既表現

迪比於2014世界盃對澳洲既賽事中,成功以一記遠射射入佢人生第一個世界盃入球,呢一球除左幫助荷蘭以3-2險勝之外,亦令佢以二十歲又四個月之齡為荷蘭史上最年輕於世界盃入波既球員。喺成個世界盃入面,迪比交出左兩個入波同一個助攻,儘管喺四強同季軍戰並未得到上陣機會,但佢既表現已經可以與法國既普巴同華拉尼一齊被選入2014世界盃最佳年輕球員既最後三強。雖然最後不敵普巴落敗,但已經係對迪比實力既一個肯定。

4. 迪比今季喺荷甲既表現
迪比今季於荷甲暫時入左廿一球,稍稍以兩球壓過第二位—同屬PSV燕豪芬既盧克迪莊,居於榜首。而喺呢廿一球入面,有三分一都係喺球賽最後十五分鐘射入,可見迪比可以喺對手體能下降時給予致命一擊。另外,迪比其中一樣備受批評既地方係:作為一個翼位球員,佢今季喺聯賽既助攻只有可憐既三個,但每場起腳數就有5.4次(即係大約每十六分鐘就起腳一次)。去到曼聯,迪比可能唔會准許起腳太多,點樣做多啲有益既傳球同助攻可能係佢既一大考驗。

5. 迪比既紋身

迪比係一個足球天才,但佢年輕時卻要喺PSV既生活中苦苦掙扎,因為佢時常會同領導層有不和,而佢既脾氣亦極不穩定,連PSV都要為佢搵一個人生教練。但係迪比既人生模範,始終都係佢爺爺,為紀念於自己十五歲時過身既爺爺,迪比於身上紋下對爺爺既思念。迪比話:「我爺爺俾左好多力量同照顧我,當佢過身既一刻,我同自己講:『我知道我既生命目標,就係要爬升到足球球壇既頂峰。』」。

好文欣賞:五位新一代既保方接班人

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就快啲睇下喇,多謝支持~

參考

留言


請按此登錄後留言。未成為會員? 立即註冊
  • Gor SK 於 09/05/2015 評論 NO. 1

    處子戰個段,既然講PSV個名先,應該8:0大勝,0:8就係俾人大數
    同埋樓上講乜?

快捷鍵:←
快捷鍵:→