五位新一代既保方接班人 精選 推薦

意大利國家隊要搵一位保方既接班人呢個話題已經講左好耐，雖然保方仍然穩健，但佢畢竟都已經37歲，職業生涯頂盡剩返五年左右，係時候要俾新一輩上位。雖然有部份球迷認為意大利聯賽同球員質素有下降趨勢，但係事實上意大利同德國一樣，喺門將既位置上不斷有新星湧現，要複製保方年紀輕輕就成為國門既故事絕對並非天方夜譚。我地睇睇五位新一代既保方接班人(不包括馬捷迪同施利古呢兩位年紀有番咁上下既門將)：


1. 佩連
要數第一位意大利門將新星，就一定要數佩連，因為佢係呢張名單中最接近意大利國門既一位：22歲既佢喺2014年世界盃時被意大利國家隊選中，排在保方同施利古之後，成為三號門將，係國家隊俾佢既一大肯定。佩連係熱拿亞既青訓產品，先後被借過去意乙既柏度華同意甲升班馬佩斯卡拉去吸收經驗，表現突出既佢上季返回母會後得到唔少上陣機會，成為球隊既一號門將。唔知係咪出任中游球隊門將比較忙，佩連今季喺意甲既場均撲救高出接近1.5球，表現令人滿意。

2. 利亞尼
保方所效力既球會祖雲達斯似乎都有為保方既退休做好準備，早喺2012年時就從布雷西亞引入現年22歲既利亞尼。祖記買入佢後不敢怠慢，立即借佢去兩隊意乙球隊去累積經驗。今季利亞尼再被外借至意甲既升班馬錫耶納，同佩連一樣，利亞尼今季既意甲場均撲救數都比保方多，而佢既表現亦逐年進步中。

3. 史博迪亞路
史博迪亞路同上述兩位新星門將一樣都係22歲，而佢就係效力於意甲既阿特蘭大隊。阿特蘭大門將干錫尼離隊他投後，史博迪亞迪成功擊敗老將費索連尼及球隊新援阿夫拉莫夫，奪得正選位置。史博迪路今季直至而家以96個總撲救數高倨意甲第二，足足係保方既兩倍，而且比第一位既干錫尼只差一球，可見史博迪亞路一整季都可以保持上佳既狀態。佢既出色表現據聞受到米蘭雙雄既青睞，利物浦亦被傳出有意收購史博迪亞路既消息。

4. 巴迪
要論意甲今季場均撲救數既話，呢張名單中第一既唔係以上三位，而係巴迪呢位原屬國際米蘭既23歲小將，佢平均每場都貢獻三個撲救(保方只得1.55個)。同佩連同利亞尼一樣，巴迪都被借過去唔同既意乙球隊，今季則被借至意甲既基爾禾，希望可以感受更高既比賽水平，可惜巴迪喺基爾禾獲得既上陣機會唔多，今季只在意甲亮相九場。巴迪向來同佩連都有一種瑜亮之爭既感覺，大家都係嗰種反應極快既門將，但似乎而家佩連領先一步，巴迪要突圍而出，第一步係要搶個正選位先。

5. 施古費特
施古費特係呢張名單入面最年紀既球員，效力烏甸尼斯既佢現時只得18歲，但佢已經代表烏甸尼斯踢過十幾場意甲比賽。上年巴西世界盃前，保方於訪問中講過：施古費特出色既表現絕對值得擠入廿三人名單當中。當我地睇到施古費特上季既成績表：場均2.56個撲救，不失球率接近四成時，相信大家都會明白保方支持施古費特既原因，而上季尾佢亦被傳出同馬體會有所聯繫。不過最終留隊施古費特同巴迪一樣，今季被逼坐上後備席，同樣祝願佢可重拾正選位置，因為國門既競爭係唔等人既。


若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk