四位英格蘭國家隊既未來新星

隨心寫足球 於 10/05/2015 發表 收藏文章
哈利簡尼今季表現一鳴驚人,今季暫時於英超上陣三十二場,射入左二十球,佢既崛起立即被大眾寄予厚望,不單止成為熱刺既新寵兒,亦被視為英格蘭國家隊未來既鋒線希望。果然,佢終於一圓大國腳夢,喺英格蘭對立陶宛既比賽中後備入替朗尼,並且立即以頭鎚建功。

哈利簡尼既故事其實係唔少英格蘭年輕球員既夢想,因為要成為大國腳絕對唔易,而以下就係一班從未為英格蘭一隊上陣過,但短期內有機會,或可讓領隊鶴臣一試派其上陣既年輕新星。
(哈利簡尼)

(成為大國腳係無數年輕英格蘭球員既夢想)

1. 禾特普斯
禾特普斯呢位效力修咸頓既中場球員近呢一兩季俾人有唔錯既印象,並開始成為球隊既骨幹球員,今季獲得廿三次喺英超上陣既機會,若然唔係季初足部骨折既話,上陣次數一定唔止咁少。相比起一眾英格蘭國家隊中場新丁,如阿士東維拉既戴夫、史雲斯既舒爾菲同熱刺賴恩美臣等,禾特普斯今季喺英超既場均助攻、關鍵傳球、製造機會都更顯優勝,所以領隊鶴臣喺「雙特」從國家隊退役,中場線開始改朝換代既時代絕對可以考慮派禾特普斯上陣。

2. 湯卡路爾
湯卡路爾原屬熱刺,以往曾被借往英冠球隊,如打比郡同昆士柏流浪,今季卻被借至史雲斯。佢可以話係熱刺會方心中既明日之星,以往當舒活執教熱刺時,佢就已經話湯卡路爾將會成為一粒巨星。呢位曾經擔任英格蘭U21隊長既球員儘管年輕,但佢以往已經喺唔同既比賽入面,證明自己有足夠能力喺中場中既位置上控制比賽進程。但係湯卡路爾既借將身份可能會係佢同大國腳之間既一道距離,佢要搵到一間願意不斷派佢上場既球隊,先能夠讓鶴臣持續評估一番佢既實力。

3. 班福特
班福特11-12球季正式踢上職業足球,為諾定咸森林踢左兩場比賽後就立即被車路士以150萬鎊收購,可見班福特擁有深厚既潛力。車路士當年既投資似乎係正確既,班福特上季被借去打比郡時已經令人印象深刻,今季被外借到米杜士堡,喺三十八場聯賽中射入十七球,於足總盃用入波踢曼城出局,更加協助球隊以第四名擠身英冠升班附加賽。

有傳若然米杜士堡成功晉身英超既話,班福特有意正式轉投米杜士堡,若然成真,佢一定不乏上陣機會,屆時佢就會可能如哈利簡尼一樣得到國家隊處子戰既機會。

4. 比拉希奴
比拉希奴可謂係西布朗既核心球員,今季三十六場聯賽悉數都有上陣,而且佢係隊中既神射手,於今季西布朗各項比賽中射入十八球既佢,入球數字比隊中第二神射手伊迪耶多左足足十一球。身為英人,加上不俗既能力,令唔少球會都據聞對佢有興趣,當中包括利物浦同曼聯。其實英格蘭上年十一月對蘇格蘭既比賽之前都曾經徵召過比拉希奴入隊,只不過冇派佢上場,所以比拉希奴同英格蘭處子戰只係一步之遙,如果佢可以保持狀態,披上三獅軍團既戰衣上場絕對唔係問題。

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就快啲睇下喇,多謝支持~

原文,經編輯

如果喜歡我們的文章,請即分享到︰

留言


請按此登錄後留言。未成為會員? 立即註冊
  • 陳世捷 於 11/05/2015 評論 NO. 1

    bamford怎麼可能賣…

快捷鍵:←
快捷鍵:→