歐聯丨賽後文章 : 皇馬未能將漂亮組織轉化 但放手一搏再有奇蹟 曼城表現合理下突然夢碎 (皇家馬德里 3-1 曼城 總比數 : 6-5)

歐聯四強次回合,皇馬同曼城嘅對決上演經典大逆轉。曼城下半場越踢越順,甚至拉開比數。身在出局邊緣嘅皇馬,再次發揮動漫「主角光環」絕地反擊,反勝曼城殺入決賽。

雙方陣容 :

👑⛵️體能狀態
上場比賽,皇馬面對分數上可以踢「風流波」嘅愛斯賓奴只需打和,便能高舉西甲獎杯,最終球隊輕鬆大勝,而曼城爭奪英超冠軍不容有失,最終擊敗了列斯聯。對比上一場,皇馬正選陣容唔計傷癒復出有7個調動,而曼城只有3個。加上連同次回合對決,皇馬連續兩場主場出擊,曼城連續兩場作客應戰,皇馬今場體能狀態更好。

👑⛵️隔靴搔癢
上半場至下半場中段,皇馬整體運轉發揮較好。球隊壓迫得以迫甩曼城控球,當壓迫被對方越過,球隊回防同補位速度亦都足夠。皇馬今場防守表現改善唔少。防中卡斯米路復出,令皇馬後防得到保護,加上兩翼華維迪同雲尼素斯回防積極,曼城於陣地戰中難以滲入皇馬禁區,大多只能以遠射隔靴搔癢,迪布尼今場狀態一般,其幾次遠射都未能射中門框範圍。雖說皇馬整體運轉較好,但年紀大嘅中場都有偶爾俾到曼城快攻/反擊空間,20分鐘迪布尼禁區頂逗入禁區俾到貝拿度施華射門,只差高圖爾斯一關。
👑進攻方法
皇馬今場多次以快攻/反擊侵襲曼城後防。速度同體型兼備嘅卡爾獲加,今場復出表現良好,多次阻止雲尼素斯嘅推進同接應身後長傳嘅衝擊。

雲尼素斯雖然受到限制,但皇馬左路配合順暢,能夠於對方包夾之下,將波轉移至右路俾到卡華積或華維迪傳中俾到賓斯馬埋門,可惜一次頭槌頂唔正,一次反應唔切。賓斯馬今場腳風不及之前階段,實際入球高於預期入球6.69球嘅絕頂表現。

下半場開波,皇馬先於中圈作短傳配合,再俾到卻奧斯長傳至右路,卡華積後上插前而未有踩入越位陷阱,得以接應再傳中,只不過雲尼素斯接應傳球時皮球太貼腳而射斜。

皇馬嘅進攻部署包含唔同組織方法,絕對唔止係「傳俾賓斯馬」,只可惜球隊漂亮嘅組織未能被轉化成入球。
⛵️哥帥調動後入球
下半場中段,雙方壓迫力隨體能下降,控球能力較強嘅曼城得以保持更多控球以減慢體能消耗,曼城形勢有所改善。72分鐘,哥帥連換兩人,分別以施真高入替再次受傷嘅卡爾獲加,以及用根度簡入替迪布尼。迪布尼今場狀態不佳而失誤頻頻,球隊依然領先之下,就算唔考慮之後嘅英起賽程,以根度簡入替迪布尼補充中場體能都係合理。換人過後,根度簡嘅膊腳隨即幫助球隊越過對方壓迫,狀態較好嘅貝拿度施華引領快攻,推進到禁區頂,吸引三人包夾再分俾右邊馬列斯勁射入網,令總比數拉開至3-5。
👑放手一搏
皇馬失球後陷於出局邊緣,安察洛堤連換兩人,以艾辛斯奧同卡馬雲加入替卡斯米路同摩迪,加上早前洛迪高入替卻奧斯,華維迪移入中場,皇馬年紀較大嘅中場三寶全部都被換出。球隊形成4231陣型,年輕嘅中前場組合配搭住賓斯馬放手一搏。

球隊陣容雖然年輕而有活力,但中前場組織嘅默契不足,未能製造太多威脅。反而曼城後備入替捷西斯嘅基亞利殊,以其後備入題嘅體能優勢,以及其個人技術於左路製造兩次機會,分別僅僅被文迪護空門同高圖爾斯救出。
👑奇蹟開始出現
去到比賽尾段,哥帥以費蘭甸奴入替馬列斯,希望守住兩球優勢到最後。皇馬最後只能全軍壓上,再放高波入禁區。此時奇蹟開始出現,89分鐘,卡馬雲加長傳入禁區,當簡些路以為皮球會直出底線,衝入禁區底線嘅賓斯馬便凌空將波撈入中間,助攻洛迪高快艾達臣一步射入追近。88秒之後,卡華積右路傳中,皮球喺艾辛斯奧頭頂擦過,剛好越過對方中堅拿樸迪,洛迪高頭鎚一頂入網,皇馬帶有運氣嘅入球令比賽進入加時。
皇馬連入兩球後,主場氣氛加上球隊士氣立即重燃,而曼城球員則陷入迷惘。加時階段,卡馬雲加發揮後備入替嘅體能優勢,長驅直進到禁區頂分俾洛迪高再傳中,接應皮球嘅賓斯馬快一步搏到迪亞斯禁區內犯規,並親自操刀射入十二碼,助皇馬再次大逆轉。
👑⛵️後記
曼城今場喺體能劣勢下,絕大部份時間保住領先優勢,球員盡力,而哥帥嘅調動亦係合理。半隻腳踏入決賽之時先被迫和再逆轉,歐聯突然夢碎甚為可惜。

今屆嘅皇馬,有如動漫主角所在嘅球隊,一再面對強大嘅對手,一再陷於絕地再反撲逆轉。好難完全解構到皇馬係點樣做到,但肯定有嘅原因係眾將不認輸、放手一摶而沉着應戰至最後一秒嘅態度。皇馬一再向大家示範,將動漫般嘅情節實現,哪怕只有1%嘅機會。各位有目標、有夢想嘅朋友,無論你依家面對乜嘢難關,希望皇馬嘅故事能夠啟發同鼓勵到你。


歡迎 follow Instagram!!
睇完波訓醒可能會有即時短文或者係小弟有感而發嘅po
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→