《從不被看好的交易?是偏見還是現實? 深入探討杜曹需要盧卡古的因與過》

BluexLion車迷手記 於 06/09/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


盧卡古哩個名字,一直比到人感覺都係「大份」、笨拙、埋門差既印象,外界對佢既觀感依然停留左喺效力曼聯既時代,而佢轉投左國米之後其實都進步左唔少,但球迷們可能連佢一場穿起藍黑波衫既賽事都無睇就話意甲水平低、「意假」等,老實地講究竟係人地無進步還是係你自己原地踏步,相信時間會好快比到答案你。

之前都有講到收購一名球員,要講需求、現實與時機,車路士由上季都睇到對於前鋒位置的確係有需求,總唔能夠單靠佐真奴射入十二碼而成為陣中神射手,而現實話你知無論係車迷們還是藍軍管理層幾咁想要夏蘭特都好,球員本心根本就無意加盟車路士,至於時機就係巿場上受認証既前鋒選擇已經少之又少,老既好似利雲哩啲你唔會選擇重金禮聘佢返黎,而未受驗証既「所謂」潛力新星亦經已有巴舒亞伊哩個人板你睇,既然杜曹想要一啲新衝擊而認定盧卡古係合適人選,球迷們又點解唔試下放低以往對球員既執著同成見,去嘗試改變對佢過往既觀感呢?

跟住就想講下究竟杜曹睇中左盧卡古啲咩,喺哩個話題開始之前就先要從球隊本身既前場陣容入手,上季藍軍能夠打中鋒位既球員有四位,包括艾巴咸、基奧特、添姆雲拿同夏維斯,喺之前林伯特仲帶領緊球隊既時候兩位德國兵尚未加盟,果一季都睇到艾巴咸同基奧特喺特質上既缺失,艾巴咸喺前鋒特質上的確好似每一樣都有啲,但總係無一樣特別突出,入球率亦唔夠穩定,而基奧特喺場上擔任支點既能力當然無容置疑,但年紀受限始終缺少左活力,至於添姆雲拿同夏維斯喺上季杜曹執教底下都嘗試過擔任中鋒哩個位置,前者擅於跑動製造空間,但主力始終都係適合一啲利用速度打反擊既戰術,加上埋門能力弱,安排打陣地戰或者高強度身體對抗既賽事會相當輸蝕,至於夏維斯喺最後一腳既處理係相當優秀,不過如果講即食要佢擔大旗一季入到二十球或以上都仲未話太過可行。
四位球員同時都各有優異同缺失之差,而喺釋出艾巴咸同基奧特既空間之下,杜曹睇中盧卡古既特質主要有三大範疇,首先係身體對抗,上季都睇到球隊喺面對住一啲硬度較強身形相當硬朗既中堅既時候,陣中前線球員就只有基奧特一人能夠應付,始終藍軍攻擊球員就好似佩利錫、薛耶治哩啲既身形偏向「書生」居多,都係以腳法技術為主,但一去到要同人硬碰硬鬥撞既時候就完全唔係果回事,而盧卡古經歷左喺國米被干地改造之後,明顯係身形上由以往既「肥腫」變成今日既「健碩」,加上能夠喺場上係可以以一敵二牽引住對手兩名或以上防守球員,變相減少左其他球員對於身體對抗既負擔,亦會釋放到更多進攻空間比隊友發揮。

而佢既身體質素亦延伸出第二個範疇,就係前線既支點能力,喺中前場停得住個波,背身「得」住對手接應長短傳,再二傳比其他隊友作配合,看似簡單但真正做落其實並唔容易,尤其係如果你係車迷就會知道哩樣野可以話係球隊自杜奧巴同迪亞高哥斯達後一直缺乏既元素,亦搵過唔少前鋒都填補唔到哩個空缺;而最後一個範疇就係反擊速度,盧卡古可以喺做完策應之後馬上跑到前場參與進攻反擊,跟得上前線隊友既速度節奏,再加上佢亦都擅於邊線發展,可以令到進攻既套路同配合更加多元化,至於埋門能力就唔需要多講,其實盧卡古以往喺無論係效力英超曼聯果期還是意甲,入球數字一直都相當穩定,只係一直都被外界批評為「弱旅殺手」淨係對中下游對手先識入波,強強對碰無左影,但如果你睇番上季車路士喺聯賽既表現,其實就正正係面對住一啲中下游球隊時咬唔入,又或者喺領先一球無優勢之下無神神比對手追平而失分,好老實藍軍依加個處境並唔怕你淨係識入弱旅波,而係至怕你唔識入波。

至於仲有一項最受大家關注既定必係控球能力,哩點無可否認既係即使盧卡古係有進步到但依然都係個人弱項,就要睇下杜曹點樣可以喺戰術配合下利用其他隊友既走位去幫助到佢去減少哩項既接應失誤,始終每名球員都有自身既弱點,反而喺足球哩項團體運動之下點樣可以發揮得出每名球員既強項,繼而再喺戰術同配合之下將效果倍量化,哩樣先係團體運動既吸引之處。

以上分析都係以球隊環境同杜曹主打戰術既角度出發,就個人而言對於哩單交易係持正面態度的,即使你可能會話價錢上係買得貴,不過最重要既始終係無買錯,而最終時間亦都會証明到盧卡古究竟係咪車路士所要既「正確的一個」。


文章發表時間 : 06/09/2021 12:55
文章最後更新時間 : 06/09/2021 12:55

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  盧卡古  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→