《恨鐵不成鋼 生涯愈走下坡的山寨王 - 巴舒亞伊》

BluexLion車迷手記 於 17/08/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


巴舒亞伊,不知不覺哩位球員都已經二十有七,亦到達在球員生涯既黃金之年,只可惜佢既職業生涯一直愈走愈低,由當日法甲潛力新星到今日成為一名毫不起眼既前鋒球員,轉眼間都只係經歷左五個年頭,恨鐵不成鋼既佢似乎都要為自己既事業尋找下一步。

五年前巴舒亞伊以接近四千萬歐元由法甲馬賽轉投車路士,以佢今日既身價黎講如果仲有當時既一半都真係執到都偷笑,你可能會問當初點解藍價會肯付出哩個價錢去買佢,最主要原因有兩方面,首先係球員特質,由體格身形上黎睇巴舒亞伊的確擁有強頑既身軀,符合藍軍一直希望尋找又黑又硬既前鋒要求,再者比利時人於馬賽成名時以射門觸角見稱,喺數據層面上單以佢喺法甲最後一個球季(15/16)既數據黎講,成功做出23個入球以及10個助攻雙雙既成績經已吸引一眾潛力買家既目光。

當時巴舒亞伊喺車路士尚未確立新主教練係邊個之前加盟,可見得管理層係相當睇重哩單交易,雖然佢同干地喺首季加盟之下經已奪得英超冠軍,不過哩位比利時前鋒得到既上陣機會並唔算得上多,甚至只能獲得幾分鐘既垃圾時間出場,而主要都係以後備身份接替擔正既迪亞高哥斯達,在於後者既能力同巴舒亞伊之間的確存在明顯差距,比利時人被安排只能作為替補亦屬無可厚非。

但喺完季時迪亞高哥斯達與干地既「信息事件」鬧翻,正當球迷們以為會比到機會巴舒亞伊擔正時球會喺哩個時候換來由皇馬來投既莫拉達,雖然前者既上陣時間有所提升,但都不足以令巴舒亞伊獲得留隊機會,再加上干地喺過去一個球季既時間都並無因應球員特質而定立一套擅於佢去發揮既體系,喺連鎖轉會效應下巴舒亞伊喺季中就以借用身份轉投到多蒙特,換來阿仙奴因為奧巴美揚既加盟而放棄既基奧特。

而巴舒亞伊亦的確喺德甲賽場搵得返過去馬賽效力既光輝歲月,短短半季經已成為陣中正選射手,與馬高萊斯以及當時仲係效力緊多蒙特既佩利錫組成前場三人組,季後更令「蜜蜂軍團」向車路士提出轉會收購,可惜被藍軍一口拒絕,而據報當中主要原因係雙方未能就轉會費達成共識,推斷當時車路士一定係以收返四千萬歐元作為主力目標,相反多蒙特就唔肯用番哩個價錢黎買斷佢,繼而一拍兩散;之後巴舒亞伊亦繼續以外借身份先後加盟華倫西亞同水晶宮,相比於西甲賽場似乎球員都係偏向適合於德甲發展居多。

直到前一季林伯特執教時球員至正式得到留隊機會,當時艾巴咸為球隊主力射手,不過巴舒亞伊並未有把握得到前者受傷缺陣期間既機會,更錄得16場英超賽事中只取得一個入球既低效數字,雖然球員大大話話都經歷左五年時間,但佢並無因為咁而有得到顯注既階段性成長,場上功能依然非常單一只能做最後一射,而射門質素亦都唔高,一啲背身二傳、回後策應既多元化職能都仲係缺乏,喺今時今日每隊球隊都要求前鋒全能化既趨勢之下,巴舒亞伊既個人特質的確唔符合現今足球體系發展。

由多蒙特再到水晶宮,到依加傳得相當接近既比錫達斯,巴舒亞伊既職業生涯經已每況愈下,即使車路士希望喺佢身上收番少量轉會費亦都只係一廂情願既諗法,而毫無疑問既係今日要搵人接手經已係S級難度任務了。


文章發表時間 : 17/08/2021 13:45
文章最後更新時間 : 17/08/2021 13:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  巴舒亞伊  

留言


請按此登錄後留言。未成為會員? 立即註冊
    快捷鍵:←
    快捷鍵:→