《背負著青訓9號的壓力 其實你已經很努力了 - 艾巴咸》

BluexLion車迷手記 於 20/08/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


艾巴咸既離開,正面睇的確換黎一筆可觀既轉會資金,加上出售其他球員繼而再引入盧卡古,喺哩個9號位置上既變動的確係一個提升;不過話雖如此,佢既離去對於車迷黎講難免有一點感觸,艾巴咸算係近十年黎首位由青訓提升上黎而成功企穩喺一隊發展既前鋒球員,加上背負著9號波衫既魔咒到壓力,佢其實經已成功為自己喺史丹福橋寫下歷史。

自少加入車路士青訓體系既艾巴咸,一直以速度作為賣點成為青年梯隊中既前線新星,亦同時為球隊成為14/15以及15/16兩個球季既U19歐洲青年賽冠軍,及後經歷過布里斯托城、史雲斯以及早兩季借用到有泰利做助教既阿士東維拉既外借生涯,前季終於喺時任領隊林伯特接掌球隊後得到留隊機會,更揀選穿起受詛咒既「9號」球衣,可見得哩名黃毛小子相當具野心希望能夠喺一隊闖出一片天。

而其實早喺外借史雲斯既時候球員經已嘗試過於英超作賽,可惜果季擔任球隊正選前鋒既艾巴咸喺全個球季39場賽事之中只錄得8個入球,其中就更只有5個係聯賽入球,最終都無法令史雲斯脫離降班區域再一次跌落英冠,當然除左鋒線無力之外史雲斯亦有其他問題引致到佢地降班,不過喺果季都已經睇到艾巴咸欠缺一項能夠立足於英超既前鋒特性,就係穩定既入球率。

除左速度之外,艾巴咸喺前鋒應有既射門觸角以及技巧方面其實都相當一般,佢的確有魄力能夠喺前場作迫搶,但總喺把握入球機會上欠缺一槌定音之力,而喺狀態上亦比較飄忽不定,當腳風順時可以中龍連入一兩球,但當過左道氣之後就下下「射飛機」,亦同時影響得到佢既心理質素,尤其係喺急於表現自己既情況下既處理埋門既手法就只會顯得更差。
不過如果以前個賽季黎睇,其實艾巴咸喺數據上係有明顯既進步,47場既賽事中錄得15個英超以及3個歐聯入球,以一名青訓初哥黎睇能夠喺入球數字獲得雙位數絕對唔容易,更可以話比唔少歷任9號前鋒取得更好既入球數字。即使資質上艾巴咸未必算係頂級,不過總算喺各方面既能力都不過不失,加以時間琢磨相信係可以再有進一步既提升,亦相信係車路士喺是次轉會加入回購條款既主因。

祝願艾巴咸喺羅馬發展一切順利,能夠成為摩連奴手中的重子棋子,喺意甲闖出自己一片新天空。


文章發表時間 : 20/08/2021 12:00
文章最後更新時間 : 20/08/2021 12:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 艾巴咸  車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→