《車路士轉會窗總結 簽一借一免簽一 車迷們又滿意嗎?》

BluexLion車迷手記 於 02/09/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


轉會窗正式完結,車路士相對於上一個夏季轉會窗一口氣連簽幾個新球員,今年明顯靜焗得多,不過現實再一次証明未到官宣一刻都唔好咁老定住,即使傳得幾咁火熱幾咁無限接近都好,一日未官宣一日都唔好跟車太貼,尤其喺沉日朝早起身時見唔到觀迪加盟反而係變左借到沙奧尼古斯(Saúl Ñíguez),而你又會點評論車路士喺哩個轉會窗既操作?一齊討論下...

車路士喺今個轉會窗一共簽入左三個新球員,包括當中最高價既就係由國際米蘭收購左盧卡古,之後以免簽形式簽入前富咸門將比堅拿利,以及喺轉會窗完結之前由馬德里體育會借入中場沙奧尼古斯,而同時亦以借用或出售形式釋放左唔少球員,當中既價錢亦都可以話相當可觀,尤其係賣走艾巴咸到羅馬以及後防小將Marc Guéhi到水晶宮哩兩單交易,都可以話高於預計巿場價格出售,更令球隊喺哩個轉會窗即使有高價收購既盧卡古,最後埋單計數都依然有賺(不過唔好忘記過去車路士都買左唔少水貨係賣唔出 最出名既必定係「飲水哥」真禾特)。

集中睇番收購果部份,早喺轉會窗之前即係上季季尾既時間都留意到,前中後三線都有需要補充既需要,而如果排優先次序的話個人認為收購前鋒同中場會係同一水平重要,反而中堅位可以再有啲時間真係睇啱先至出手,最終西維爾喺蘇馬離隊後坐地起價令觀迪既交易告吹,不過後防人手上都叫做可以接受未去到危急關頭,而打起左小將查路巴亦可以算話一解燃眉之急,仲可以有更多空間比到佢喺今季發揮。

至於收購盧卡古既時候反對聲音偏多,主要原因有兩個,第一係佢活在球迷們寄託於收購夏蘭特既影子底下,之前都有交待過即使你肯等多一季時間,夏蘭特心目中想揀既球會都唔會係車路士,而其二就係球迷們對盧卡古既印象仲停留左喺佢效力曼聯既時代,印象流之下仲係覺得佢「又頓又慢」,再加插意甲水平低等意識,到依加踢左兩場英超至發現盧卡古好似同以前有啲唔同喎,反對聲音都明顯開始細左,其實如果你睇番用艾巴咸同基奧特兩個既技術特點去換一個盧卡古返黎,你就會覺得哩個變化係一種升級而唔會係退步。

而借用到沙奧尼古斯更加可以話係相當超值既交易,要喺巿場上尋找佐、高、簡之後既第四中場並唔容易,加上應付多線發展既競爭你又唔能夠收購一啲即戰力較低既球員,但只靠陣中年輕球員能力亦不足以應付,借用沙奧尼古斯一季無疑係一個得宜既操作,感覺上有啲前早兩季借用到高華錫黎史丹福橋一樣,都係同時擁有即戰力加上價錢並唔貴既操作。

總結今個轉會窗雖然動作唔多,不過幾單收購都相當具質素同針對性,而即使最後觀迪既交易告吹都可以留待到冬季轉會窗再作跟進,始終後防人手尚算充裕都仲可以用多半季時間觀察一下,個人黎講對於今個轉會窗係滿意的,唔知你又點睇呢?


文章發表時間 : 02/09/2021 13:30
文章最後更新時間 : 02/09/2021 13:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→