進攻是最好的防守 (利物浦對曼城賽後分析)

黑仔講波 於 04/10/2021 發表 收藏文章
圖片來源:英超官方網站 (https://www.premierleague.com/match/66407)
國際賽期前嘅最後一場英超由利物浦主場迎戰曼城。上星期筆者曾經分享過今季心目中嘅頭三大熱係車路士、利物浦、曼城 (詳情請見延伸閲讀),今場兩隊就合演一場高水平比賽,節奏明快而且絕不拖泥帶水,無論進攻、防守都非常到位,亦擅於把握對手犯錯,而且一眾球員都非常搏命,好似當正係歐聯決賽咁打,能夠觀賞到一場咁精彩嘅比賽實屬觀眾之福。雖然球證執法備受爭議,但筆者都唔再多作深入探討,下文都係主要分析翻兩隊踢法為主。

利物浦沿用周中歐聯大勝波圖嘅陣容出戰,右閘正選位置繼續由占士米拿代替受傷嘅亞歷山大阿諾出任,同馬迪普、雲迪克、羅拔臣組成四人防線;三中場有居迪斯鍾斯、法賓奴、佐敦軒達臣助攻助守,協助前線三叉戟文尼、迪奧高祖達、沙拿進攻,而費明奴則先列後備。

利物浦正選陣容
GK1 艾利臣 Alisson Becker
LB 26羅拔臣 Andrew Robertson
CB4 雲迪克 Virgil van Dijk
CB32馬迪普 Joël Matip
RB7 占士米拿 James Milner (78' 由祖高美斯 Joe Gomez 入替)
CM17居迪斯鍾斯 Curtis Jones
CM3 法賓奴 Fabinho
CM14佐敦軒達臣 Jordan Henderson
FW10文尼 Sadio Mané
FW20迪奧高祖達 Diogo Jota (68' 由費明奴 Roberto Firmino 入替)
FW11沙拿 Mohamed Salah

至於曼城方面,相比周中歐聯不敵巴黎聖日耳門嘅比賽,曼城陣容上作出咗兩個調動,分別係以科頓、加比爾捷西斯代替馬列斯 (Riyad Mahrez)、史達寧出任正選,維持慣用嘅 4-3-3 陣式。

曼城正選陣容
GK31艾達臣 Ederson
LB 27簡些路 João Cancelo
CB14拿樸迪 Aymeric Laporte
CB 3 戴亞斯 Rúben Dias
RB 2 卡爾獲加 Kyle Walker
CM17迪布尼 Kevin De Bruyne
CM16洛迪 Rodri
CM20貝拿度施華 Bernardo Silva
FW47科頓 Phil Foden
FW10基利殊 Jack Grealish (66' 由史達寧 Raheem Sterling 入替)
FW9 加比爾捷西斯 Gabriel Jesus

上半場曼城主導形勢,即使利物浦有過一段時間反撲亦未能持續,大多數時間曼城都壓住喺利物浦半場範圍打,連沙拿、迪奧高祖達等都要回防幫手。曼城主打短傳入楔攻擊 half space 位置及 overlap 邊路,並會透過快速轉邊拉散利物浦防線,頗有成效。但喺艾利臣表現神勇,加上曼城把握力不足嘅情況下,上半場兩隊互交白卷。換邊後利物浦立即採取主動,以攻代守,因為佢哋深知唔能夠再俾曼城從容地用波,故此全隊都提高速率並加強逼搶力度,終於喺 59 分鐘由文尼先開紀錄,但 10 分鐘後科頓就為曼城扳平。76 分鐘沙拿挺身而出憑個人技術擺脫幾個曼城防守球員後窄角度射入。正當人人以為利物浦可以贏得呢場比賽之際,迪布尼喺 81 分鐘為曼城再次追平,最終兩隊以 2:2 打成平手,各得一分。

弱點攻擊 – 左右閘身後
其實兩隊打法都頗為類似:同樣排出 4-3-3 陣式,同樣崇尚前場逼搶,三中場會有一個防中主要負責逗後 (利物浦:法賓奴;曼城:洛迪),而另外兩個中場則會前插攻擊對方 half space 位置或作 overlap (利物浦:居迪斯鍾斯、佐敦軒達臣;曼城:迪布尼、貝拿度施華);前鋒三叉戟之間有默契並以靈活嘅走位、傳送打入對方禁區;同時兩閘喺進攻之中有好高參與度,比賽中兩隊都不乏閘位球員 overlap 到邊線或 underlap 到對方禁區嘅畫面。而正正係因為雙方嘅閘位球員都有高嘅進攻參與度,兩隊都會主打對方兩閘身後,尤其是打反擊嘅時候。

利物浦篇
利物浦主要攻擊嘅係曼城左閘,除咗因為陣中王牌沙拿踢右翼鋒外,另一個原因係曼城左閘簡些路嘅身體質素比右閘卡爾獲加較差,由沙拿對簡些路會比文尼對卡爾獲加較易佔上風。利物浦嘅攻勢較為直接,多數都係憑個人技術、速度擺脫對手後攻門或傳出直線俾隊友接應。

圖片來源:利物浦官方 YouTube (https://www.youtube.com/watch?v=2yNnklW5HZU)

例如喺造成第一個入球嘅反擊之中,沙拿過咗曼城左閘簡些路一路推進並吸引中堅拿樸迪嘅注意,原本喺戴亞斯同卡爾獲加中間嘅文尼突然轉向同身後嘅迪奧高祖達交叉走位,喺戴亞斯身前走向右前方,亦即係原本由拿樸迪防守嘅位置,沙拿見狀立即送出直線,文尼亦不負所託射入。至於利物浦嘅第二個入球就更加係沙拿喺右路嘅一人表演:先擺脫曼城科頓、簡些路及貝拿度施華嘅三人夾擊,再殺入禁區並 fake 過拿樸迪射入。

曼城篇
圖片來源:英超官方網站 (https://www.premierleague.com/match/66407)

曼城主要攻擊嘅則係利物浦右閘嘅位置,因為占士米拿年事已高,而且係替補右閘,同埋曼城左閘簡些路比起右閘卡爾獲加有更細膩嘅技術,今場曼城主要透過左右轉邊拉扯對手防線,一方面可以讓另一邊嘅進攻球員可以有大量與對手 1 on 1 嘅空間,另一方面試圖把握喺轉邊期間對手防線移動時可能出現嘅漏洞。曼城組織進攻時多數會先從右路進攻,去到 final third 嘅時候就會快速轉至左邊,由於曼城本身從右路進攻,利物浦整體防守陣形亦會相應移至左路,導致占士米拿負責防守嘅右閘位置有大量空位,喺左翼位置出現嘅科頓或基利殊就可以有足夠嘅 1 on 1 空間。

圖片來源:英超官方網站 (https://www.premierleague.com/match/66407)

值得一提嘅係今場對陣占士米拿時科頓比基利殊發揮得更好。基利殊 1 on 1 時習慣扭過對手,但面對占士米拿呢類經驗老到、防守路數好嘅球員明顯未能佔有甜頭;加上基利殊慣用右腳,從左路進攻嘅話控球時足球就會更接近防守球員,有利占士米拿防守。相反,科頓慣用腳係左腳,變相控球時足球距離占士米拿較遠,而且科頓速度快、踢法直接,唔會話一定要扭過對手,好多時接應轉邊後佢就會憑速度一推就爆落底線或入禁區,令占士米拿吃盡苦頭,占士米拿喺上半場亦已經因此拎咗一面黃牌。曼城追平嘅兩球亦正正係科頓喺左路嘅入球同助攻,即使出現第二個入球時占士米拿已經被調離場,但似乎曼城嘅呢套進攻方式對利物浦頗為有效。

總結
兩隊喺踢出部署、球員有高水平表現下合演咗一場精彩比賽,相信亦係頗為符合預期嘅賽果。兩隊同樣有強橫嘅攻力,球員既可以打出絲絲入扣嘅配合,亦能夠以一人之力扭轉局勢;反而喺把握力、防守上嘅表現仍然有改善空間。嚟緊由於係國際賽期嘅關係要再等多一個星期先有英超,黑仔講波嘅賽後分析系列就到時再見大家。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page!(https://www.facebook.com/blacksontalkball/)

如果喜歡我們的文章,請即分享到︰

標籤: 利物浦  曼城  英超  文尼  科頓  沙拿  迪布尼  

留言


請按此登錄後留言。未成為會員? 立即註冊
    快捷鍵:←
    快捷鍵:→