英超第一輪壓軸重頭戲由熱刺主場迎戰曼城，最終熱刺憑孫興慜喺下半場一箭定江山，取得新領隊帶領下嘅首勝，今季英超有個好開始。
熱刺今場排出 4-3-3 陣式迎戰，王牌球員哈利簡尼 (Harry Kane) 唔喺大軍名單之中，由孫興慜、盧卡斯姆拿及貝格雲擔起進攻重任；中後場都有較新嘅面孔上陣，例如中場有上季外借到諾域治嘅史基比擔任正選，而右閘則由坦根加取代過往嘅慣常正選奧利亞 (Serge Aurier)、杜靴迪擔任。
熱刺正選陣容
GK1 洛里斯 Hugo Lloris
LB 3 列古朗 Sergio Reguilón
CB15 戴亞 Eric Dier
CB6 山齊士 Davinson Sánchez
RB25 坦根加 Japhet Tanganga (83' 由杜靴迪 Matt Doherty 入替)CM20 迪利阿里 Dele Alli
CM29 史基比 Oliver Skipp
CM5 靴爾堡 Pierre-Emile Højbjerg (90' 由羅美路 Cristian Romero 入替)
FW23 貝格雲 Steven Bergwijn (77' 由盧施素 Giovani Lo Celso 入替)
FW7 孫興慜 Son Heung-Min
FW27 盧卡斯姆拿 Lucas Moura
曼城同樣以 4-3-3 出戰，再一次用上熟悉嘅無鋒陣。中場有新援基利殊正選上陣，而迪布尼則先任後備；同樣喺後備席上嘅仲有慣常正選中堅拿樸迪 (Aymeric Laporte) 、史東斯 (John Stones) ，由尼敦艾基頂上夥拍戴亞斯鎮守中路。
曼城正選陣容
GK31 艾達臣 Ederson
LB 22 文迪 Benjamin Mendy (79' 由辛真高 Oleksandr Zinchenko 入替)CB 6 尼敦艾基 Nathan Aké
CB 3 戴亞斯 Rúben Dias
RB 27 簡些路 João Cancelo
CM10 基利殊 Jack Grealish
CM25 費蘭甸奴 Fernandinho
CM8 根度簡 Ilkay Gündogan
FW7 史達寧 Raheem Sterling (70' 由加比爾捷西斯 Gabriel Jesus 入替)
FW21 費蘭托利斯 Ferran Torres
FW26 馬列斯 Riyad Mahrez (79' 由迪布尼 Kevin De Bruyne 入替)
上半場曼城主導形勢，以前場逼搶及熟練嘅短傳滲透不斷製造威脅。雖然熱刺防守時球員已經集中喺中路壓縮曼城嘅進攻空間，但前中後三線連結唔夠緊密，而且防守 half-space 時球員配合度不足，導致不時出現雙閘需要一對二嘅情況，不失球實屬萬幸。曼城進攻流暢，掌控形勢，但好多時都係欠缺埋門一腳，久攻不下；而熱刺失去哈利簡尼下前場頓失支點，前場三子同對方防守球員爭頂時處於下風，只有少數解圍能夠成功創造反擊機會，威脅非常有限。
換邊後熱刺開始發力，中前場球員比上半場時更主動，作出更多逼搶，而曼城則逼搶力度稍降，此消彼長下下半場初段由熱刺主導形勢。曼城企穩陣腳後逐漸控制節奏，但就喺呢個時候熱刺嘅孫興慜成功把握一次反擊機會，喺右路 cut-in 燙遠柱入，收死對方門將艾達臣。及後曼城加強進攻力度並先後換入加比爾捷西斯、迪布尼加強攻力並成功製造機會，但仍然未能取得入球，最終一球敗走北倫敦。
熱刺 - 熟悉嘅防守反擊
喺新領隊紐奴帶領下熱刺對住曼城延續上季防守反擊嘅打法，而今場面對曼城作出嘅針對性部署亦見一定成效，但尚有改善空間。今場熱刺防守時集中喺中路，壓縮曼城進攻空間，逼使曼城要從邊路進攻；但曼城喺邊路尤其是左路進攻都冇咩著數，全因今仗熱刺右閘坦根加有出色穩健嘅發揮。同過往嘅正選右閘、出晒名攻強守弱嘅奧利亞、杜靴迪唔同，坦根加大部份時間都係留喺後場，較少上前參與進攻，以防留下太多空位俾曼城打反擊；而且佢有身形、有速度之餘亦有唔錯嘅單對單防守能力，令史達寧、基利殊都冇啖好食。而曼城喺久攻不下嘅情況下投入更多兵力進攻包括雙閘，而後防線亦壓得好上，令後場有較多空間俾熱刺嘅前鋒發揮速度打反擊。
雖然今場熱刺成功零封曼城，但其實防守上仍然有隱憂。曼城善於且慣於利用 half-space 進攻已經係人人皆知嘅事，亦都睇得出熱刺球員有演練過應對呢種情況嘅防守；但到真正落場時面對曼城球員靈活頻繁嘅走位，熱刺球員防守時不時會出現換人防守有猶豫嘅情況，而往往呢一瞬間就會好容易被對手利用製造威脅甚至入球。故此今場熱刺能夠保持清白之身除咗自己防守上有唔錯嘅演出之外，亦有一定程度上係因為曼城把握力不足。
進攻方面，喺缺少哈利簡尼下熱刺喺進攻方面顯得有啲吃力，而且作決定上都有待改善。孫興慜、盧卡斯姆拿同貝雲積雖然能夠憑較佳嘅個人能力喺邊路甚至中路作盤扭突破，但佢哋喺反擊時嘅決定能力仲可以做得更好，例如應該幾時傳波、幾時帶波、幾時拖慢節奏等等，呢啲正係哈利簡尼在陣時作為前場支點會做嘅嘢：能夠喺前場保持控球並作出準確傳送，將反擊威脅最大化。今場熱刺雖然憑藉防守反擊贏得比賽，但球隊的確缺少一個負責組織及送出致命傳送嘅球員，球隊中喺呢方面做得較好嘅球員有盧施素同尼當比利 (Tanguy Ndombele) ，前者今場先列後備好可能係因為戰術需要，但後者不入大軍名單而且盛傳將會離隊實在令人擔憂。因此，當熱刺需要主動進攻時表現如何實在有待觀察。
曼城 - 無鋒陣威力未滿
圖片來源：英超官方網站 (https://www.premierleague.com/match/66350)
對於曼城嚟講又係一場熟悉嘅敗仗：贏形勢輸波。就如上圖所見，不論係控球、射門、傳球次數都係曼城佔優，而攻勢較多嘅曼城亦確實能夠製造威脅，但始終都係送唔到個波入網，例如下半場有費蘭托利斯門前失機等。的確曼城對於無鋒陣嘅運作十分熟練，球員之間嘅配合、走位亦好有默契，但無鋒陣除咗講求進攻球員靈活走位、換位配合之餘，另一個重點係佢哋需要輪流出現喺中鋒位置，牽制對方中堅之餘亦為身後隊友創造進攻空間並提供進攻方向，但今場曼城球員較少適時出現喺中鋒位置上，變相令自己少咗空間之餘亦令熱刺相對較易防守。呢個情況要到下半場中段加比爾捷西斯入替後打翻前鋒位先有改善，不過最終曼城仍然未能扭轉敗局，全失三分。
或者曼城喺久攻不下嘅情況下需要更果斷作出調動，而唔係寧願不斷將防線推上投入更多人手進攻都要執意以無鋒陣擊敗對手。今場曼城到 70 分鐘先作出第一個調動，由加比爾捷西斯入替今場冇咩表現嘅史達寧，唔能夠話變陣就一定入到波，但當對手已經適應防守無鋒陣嘅情況而己方喺中鋒位置又長期缺人下，不妨早少少作出改變或者能夠有奇效。另一方面，喺對手以防守反擊應戰而且球員速度快嘅情況下，不斷將防線推前會令對手有好大嘅反擊空間，令自己暴露喺危險之中。
圖片來源：熱刺官方 YouTube (https://www.youtube.com/watch?v=exwCSLlZLfM)
而球員防守時都應該有更好表現。好似上圖孫興慜嘅入球咁，呢個失球擋漏波嘅戴亞斯固然要負上責任，但尼敦艾基亦應該更緊貼孫興慜防止佢起腳。當時其實曼城已經有人數優勢，但尼敦艾基實在俾得太多空間孫興慜令佢有機會起腳，或者尼敦艾基係驚緊貼孫興慜會被扣過，但其實身後仲有文迪包位。假設孫興慜扣過尼敦艾基，面對文迪嘅佢一係傳中，一係 cut back 俾禁區頂嘅盧卡斯，前者人數上冇優勢，而後者相信好大機會會俾費蘭甸奴截到。
總結
經過今場比賽後，相信以後每支球隊對曼城時都會採取防守反擊戰術，哥迪奧拿 (Pep Guardiola) 真係要諗諗計，可能最終嘅解決方案就係將哈利簡尼帶到曼城 (笑)；而熱刺雖然取得一個好開始，但不論進攻定防守都有進步空間，尤其係球隊好大機會需要適應冇哈利簡尼後嘅日子，同時筆者亦期待熱刺主攻時嘅表現如何。
請按此登錄後留言。未成為會員? 立即註冊