師父教徒弟 (曼城對阿仙奴賽後分析)

黑仔講波 於 30/08/2021 發表 收藏文章
圖片來源:Sky Sports

英超第三輪賽事繼續有 Big 6 對碰嘅戲碼:曼城主場迎戰阿仙奴,同時亦係師徒之間嘅對碰,因為阿迪達 (Mikel Arteta) 喺做阿仙奴領隊前就曾經擔任曼城助教。今場比賽曼城喺初段就取得領先,加上阿仙奴大部分時間 10 人應戰嘅情況下,最終曼城收穫咗一場 5:0 嘅大勝。

曼城今仗繼續以 4-3-3 出戰,陣容同上場贏諾域治 5:0 時一樣,三中場以洛迪逗後為主,而根度簡、貝拿度施華則不斷前插與前線三叉戟基利殊、費蘭托利斯及加比爾捷西斯配合進攻,更不時見到佢哋會殺到入禁區攻門。

曼城正選陣容
GK31艾達臣 Ederson
LB 27簡些路 João Cancelo
CB14拿樸迪 Aymeric Laporte
CB 3 戴亞斯 Rúben Dias
RB 2卡爾獲加 Kyle Walker (46' 由辛真高 Oleksandr Zinchenko 入替)
CM8 根度簡 Ilkay Gündogan
CM16洛迪 Rodri
CM20貝拿度施華 Bernardo Silva (58' 由史達寧 Raheem Sterling 入替)
FW10基利殊 Jack Grealish
FW21費蘭托利斯 Ferran Torres
FW9 加比爾捷西斯 Gabriel Jesus (61' 由馬列斯 Riyad Mahrez 入替)

而阿仙奴就選擇防守為主以 5-4-1 應對,泰亞尼、梳亞利斯分任左右閘,三中堅則為張伯斯、賀定、高拿仙歷;而兩名中場中薩卡、奧迪加特就負責助攻助守、控制節奏。

阿仙奴正選陣容
GK1 利奴 Bernd Leno
LB 3 泰亞尼 Kieran Tierney
CB31高拿仙歷 Sead Kolašinac
CB16賀定 Rob Holding
CB21張伯斯 Calum Chambers
RB17梳亞利斯 Cédric Soares
LM10史密夫路 Emile Smith-Rowe
CM34薩卡 Granit Xhaka
CM8 奧迪加特 Martin Ødegaard (71' 由美倫尼爾斯 Ainsley Maitland-Niles 入替)
RM7 沙卡 Bukayo Saka (46' 由艾蘭尼 Mohamed Elneny 入替)
FW14奧巴美揚 Pierre-Emerick Aubameyang (59' 由拿卡錫迪 Alexandre Lacazette 入替)

圖片來源:Sky Sports

上半場初段曼城就成功把握阿仙奴兩次防守失誤領先 2:0,及後阿仙奴嘅一段反撲雖然能夠帶嚟威脅,但都未能取得入球。戰至 35 分鐘,薩卡因為一次雙腳飛鏟直接紅牌出場,令阿仙奴形勢雪上加霜。多打一人嘅情況下曼城控制戰局,及後時間由加比爾捷西斯、洛迪及費蘭托利斯各入一球,最終以 5:0 大勝阿仙奴,阿仙奴錄得三戰全敗零入球嘅尷尬成績位列榜尾。

曼城 – 多角度攻擊
曼城嘅 4-3-3 陣容都唔係啲咩新鮮事,但球員之間嘅配合同佢哋對戰術嘅熟練度實在令人讚歎。防中洛迪逗後,根度簡、貝拿度施華前插,時而攻擊 half space 時而拉邊,透過混淆對方防守球員拉空防守。中場亦由曼城全面控制,一嚟係因為佢哋中場中上有 3 對 2 嘅人數優勢,二嚟係阿仙奴嘅陣容並冇一名純正防中,未能給予曼城中場足夠壓力,令佢哋可以好從容咁用波、推進、前插,甚至連防中洛迪都攻到上去入咗球波 (當然多踢一人亦係其中一項重要因素)。

阿仙奴 – 災難防守
但呢場波與其話係曼城有好表現所以大勝,不如話係阿仙奴表現太差引致大敗。上星期筆者喺阿仙奴對車路士賽後分析一文中曾經講過阿仙奴如果冇好好調整防守嘅話難保要俾曼城大炒(詳情請見延伸閲讀),而阿迪達都深明呢點所以排出三中堅陣式希望先求穩守,但球員防守能力同集中力實在有待改善。由於十人應戰下要守住曼城係非常困難嘅事,所以接下來主要係分析翻薩卡攞紅牌前嘅兩個曼城入球,而呢兩球都係因為阿仙奴防守失誤而導致。

圖片來源:曼城官方 YouTube (https://www.youtube.com/watch?v=Mb88zdBBdik)

上圖顯示造成第一個入球嘅攻勢。當時曼城從右路進攻,泰亞尼一直有緊貼控緊球嘅貝拿度施華,而史密夫路亦留意到加比爾捷西斯嘅位置,意識到曼城想打 overload 所以都有跟過嚟,但就冇 mark 實,結果俾加比爾捷西斯輕鬆傳中,然後張伯斯判斷失誤導致漏頂,益咗伏兵背後嘅根度簡頂入。

首先係球員企位問題,右路人數上明明係 3 打 3 ,但偏偏卡爾獲加衝緊過去嘅禁區頂有大量空位 (紅圈所示)。可能阿迪達嘅戰術安排係需要薩卡防守 half space ,但當時 half space 位置並冇曼城球員,反而係禁區頂空晒,薩卡係應該企出去守住禁區頂而唔係盲目咁企喺 half space 位置;而史密夫路或者就係因為顧忌身後嘅卡爾獲加而唔敢拍埋去加比爾捷西斯,令後者可以輕鬆傳中,而張伯斯就喺位置感、判斷力失誤下漏頂導致失球。

圖片來源:曼城官方 YouTube (https://www.youtube.com/watch?v=Mb88zdBBdik)

而第二球曼城開出自由球後再由貝拿度施華斬入禁區時,傳球路徑上嘅三名阿仙奴防守球員一個撻 Q 兩個漏踢,漏到落費蘭托利斯腳下輕鬆射入,呢啲失誤實在唔應該喺一支強隊身上見到。而今場大敗反映出阿仙奴無論係球隊整體防守抑或球員個人防守能力上都有問題,相信阿迪達喺調教隊伍防守上仍然要再下苦功,協助球隊及球員建立一套有系統、有意識嘅防守,否則當要再面對其他以進攻為主嘅強隊例如利物浦時分分鐘又要經歷一場大敗。

不過阿迪達嘅呢套戰術反擊時都能夠帶嚟一定威脅。反擊時兩閘同兩翼都會推前一格,陣容變為 3-4-3,兩翼會收入少少讓出邊線空間俾兩閘大造文章。過往阿仙奴攻勢多數都係嚟自左路,今場都唔例外,多次見到泰亞尼挑戰對方右閘卡爾獲加,甚至殺到入禁區,可惜都未能造成入球。

總結
今場曼城其實都係一如既往嘅發揮,依舊係主打 4-3-3 進攻,取得 5:0 大勝主要都係因為阿仙奴實在出現太多失誤,而曼城就係能夠把握對手嘅失誤將佢哋狠狠懲罰。對曼城嚟講今場大勝絕對係一枝強心針,因為佢哋下輪就要面對一支擅於打防守反擊嘅強隊李斯特城,而曼城對住防守反擊好多時都吃盡苦頭;阿仙奴開季三場不勝零入球暫列榜尾嘅成績實在令人擔憂,對佢哋嚟講嘅好消息可能只有下星期係國際賽期,或者可以俾佢哋止一止血,而佢哋下一輪面對嘅諾域治同樣未嘗一勝,相信係開齋好時機。

如果喜歡我們的文章,請即分享到︰

標籤: 英超  曼城  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→