知己知彼 (李斯特城對車路士賽後分析)

黑仔講波 於 22/11/2021 發表 收藏文章
圖片來源:英超官方網站 (https://www.premierleague.com/match/66454)
嚟到英超第 12 輪比賽,頭場首先有李斯特城主場迎戰車路士。兩支球隊近況迥異:主隊各項比賽已經三場不勝,而作客嘅車路士則連續八場保持不敗,當中更有五場零封對手,足見佢哋防守穩健;反觀李斯特城今季防守表現有下滑迹象,對上一場不失球嘅賽事已經要數到去 8 月,不禁令人擔心佢哋能否抵禦車路士呢類強隊。

李斯特城今場以 3-4-2-1 出戰,後防依舊有伊雲斯、蘇恩古、阿瑪迪嘅組合,左右翼衛則由卡斯坦尼、艾伯禮頓擔任;中場方面由於泰利文斯 (Youri Tielemans) 受傷嘅關係改由尼迪迪夥拍蘇馬里;鋒線則由華迪領銜,與班尼斯、陸文合作攻堅。

李斯特城正選陣容
GK 1卡斯柏舒米高 Kasper Schmeichel
CB 4蘇恩古 Çağlar Söyüncü
CB 6伊雲斯 Jonny Evans
CB 18阿瑪迪 Daniel Amartey
LWB27卡斯坦尼 Timothy Castagne
CM 42蘇馬里 Boubakary Soumaré (75‘ 由杜斯貝利賀爾 Kiernan Dewsbury-Hall 入替)
CM 25尼迪迪 Wilfred Ndidi
RWB 11艾伯禮頓 Marc Albrighton
CAM 7班尼斯 Harvey Barnes (46’ 由麥迪臣 James Maddison 入替)
CAM 37陸文 Ademola Lookman (46’ 由伊恩拿祖 Kelechi Iheanacho 入替)
FW 9華迪 Jamie Vardy

車路士同樣排出三中堅陣式,由老將泰亞高施華帶領魯迪加、查洛巴鎮守後防,左右翼衛分別係捷維爾、列斯占士;中場方面則有佐真奴、簡迪負責控制節奏及破壞對手組織,並支援前線三子赫臣奧度爾、蒙特、夏維斯。

車路士正選陣容
GK16文迪 Edouard Mendy
CB 2魯迪加 Antonio Rüdiger
CB 6泰亞高施華 Thiago Silva
CB14查洛巴 Trevoh Chalobah
LWB21捷維爾 Ben Chilwell
CM 5佐真奴 Jorginho (77' 由路夫斯捷克 Ruben Loftus-Cheek 入替)
CM 7簡迪 N’Golo Kanté
RWB24列斯占士 Reece James
CAM20赫臣奧度爾 Callum Hudson-Odoi
CAM19蒙特 Mason Mount (63’ 由薛耶治 Hakim Ziyech 入替)
ST 29夏維斯 Kai Havertz (62’ 由普列錫 Christian Pulisic 入替)

李斯特城 – 繼續迷失
今場李斯特城依然擺脫唔到佢哋防守不穩嘅毛病,防守時俾得太多空間對手發揮。除咗第一球角球防守時走甩魯迪加外,另外兩球都見到中場同後防之間差唔多空晒。出現呢個情況除咗係中場回防唔切外,與李城 3-4-2-1 陣式對兩翼防守佈署不足亦有關。

圖片來源:車路士官方 YouTube (https://www.youtube.com/watch?v=c423tCiUaUI)
第二個失球簡迪接應列斯占士傳球後,一個轉身擺脫李城球員後就能夠長驅直進,直接面對對方後防線,從上圖可以見到李城一對中場尼迪迪、蘇馬里完全失位;而喺畫面下方會見到李城同車路士呈 3 打 3 狀態,因此李城後防球員全部都被逼向後退,但明顯地蘇恩古係應該要去逼簡迪,一來因為佢係當時最接近簡迪嘅球員,二來簡迪攻擊緊嘅正正就係蘇恩古負責防守嘅左中堅位置,結果喺冇人去逼簡迪嘅關係簡迪就射入咗一球世界波。

圖片來源:車路士官方 YouTube (https://www.youtube.com/watch?v=c423tCiUaUI)

而第三個失球就係邊路防守不足嘅問題,同時亦再次見到李城中場失位嘅問題。本身車路士喺左路組織攻勢,引晒李城球員移去嗰邊,結果車路士一下子轉去右路進攻,又係有大量空位俾查洛巴輕鬆推進,而李城後防球員受制於對手進攻球員只能不斷後退,未能主動上前阻止對方球員推進,最終薛耶治成功落底傳中,普列錫接應射入。

車路士 – 知己知彼
圖片來源:英超官方網站 (https://www.premierleague.com/match/66454)

杜曹帶領嘅車路士作為一支踢慣三中堅嘅球隊,當然非常清楚呢個陣式嘅強弱,而佢哋今場正正就係以自己嘅長處攻擊對手嘅弱點。今季車路士嘅閘位球員喺進攻上嘅表現突出,無論係今場嘅正選左右閘捷維爾、列斯占士,抑或係馬高斯阿朗素 (Marcos Alonso) 都有唔少嘅助攻甚至入球,正正係因為三中堅陣式非常著重翼衛壓前助攻。今場對手李斯特城排出 3-4-2-1 陣式,中場球員集中喺中路,導致邊路防守薄弱,故此今場車路士都主要從邊路進攻,除咗一對翼衛外,今場理應係踢進攻中場嘅赫臣奧度爾、蒙特亦會拉到邊路配合,創造人數優勢 overload 對手;而且會不斷透過左右轉邊拉扯對方防線,令對邊防守出現空位,今場第二、三個入球正正係透過上述部署創造。

總結
車路士再次收穫一場不失球嘅勝仗,而且贏得非常有說服力;李斯特城則繼續低迷,不論防守抑或進攻都明顯不在狀態,今場比賽只得 4 次射門,最終大敗一場。嚟緊踏入 12 月英超將會進入快車期,對於兩隊嚟講點樣好好運用每一位球員、點對輪換都絕對係一個考驗,對車路士嚟講呢輪快車期嘅表現將會好影響佢哋今季能否問鼎英超冠軍;而李斯特城當務之急則係重拾狀態,應付嚟緊頻密嘅比賽。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  李斯特城  車路士  魯迪加  簡迪  普列錫  

留言


請按此登錄後留言。未成為會員? 立即註冊
    快捷鍵:←
    快捷鍵:→