有干地的熱刺

黑仔講波 於 04/11/2021 發表 收藏文章
圖片來源:熱刺官方網站 (https://www.tottenhamhotspur.com/news/2021/october/antonio-conte-appointed-new-head-coach/)

隨住一場 0:3 嘅敗仗,熱刺宣佈辭退上任僅四個月嘅領隊紐奴,取而代之嘅係前車路士及國際米蘭領隊 – 干地(Antonio Conte)。

有睇開英超嘅球迷相信對呢位領隊並不陌生。當年佢嚟到英超帶領車路士時就掀起一股三中堅熱潮,憑住呢套戰術帶領車路士稱霸英超,傲視群雄;及後佢去到國米亦成功帶領球隊打破祖雲達斯嘅壟斷取得意甲冠軍,用嘅仍然係一套三中堅戰術。從車路士嘅 3-4-3 (或 3-4-1-2、或 3-4-2-1) 到國米嘅 3-5-2,忠於三中堅陣式嘅同時干地亦會繼續鑽研各種可能性。筆者就嘗試分析干地麾下嘅熱刺會點排陣。


圖片來源:英超官方網站 (https://www.premierleague.com/match/66431)

三中堅:羅美路、迪亞、坦根加
預期干地帶領熱刺都係踢三中堅,而羅美路 (Cristian Romero) 將會係核心人物。三中堅本身就係干地嘅核心戰術,同時亦可以改善熱刺後防不穩嘅問題。羅美路上季效力嘅阿特蘭大都係踢開三中堅嘅球隊,不論係三名中堅之中嘅任何一個位置佢都能夠勝任,更榮獲意甲最佳防守球員。喺意甲打滾嘅羅美路除咗有意大利式嘅穩健外,同時亦保留自身南美嘅勇悍、主動出擊攔截嘅風格,加上有唔錯嘅用球能力,相信佢會成為干地手下嘅一員大將。

但其餘兩名中堅人選嘅配置將會係干地要面對嘅難題,因為喺熱刺剩低嘅中堅人選中,山齊士 (Davinson Sánchez)、戴亞 (Eric Dier)、洛頓 (Joe Rodon)及可閘可中堅嘅坦根加 (Japhet Tanganga)、賓戴維斯 (Ben Davies) 都難以俾人一種穩陣嘅感覺,而且過去都曾經間唔時「自爆」連累球隊輸波。但若要秤嘅話相信坦根加、戴亞將會擔當羅美路嘅後防拍檔。

坦根加雖然今季打開右閘,但由於三中堅對中堅人手需求增加,加上三中堅戰術需要攻擊力強嘅翼衛,因此守強於攻嘅坦根加將會由慣常右閘轉為中堅。呢位球員有速度有身型,雖然經驗尚淺,但對於一名 22 歲嘅防守球員嚟講佢嘅表現不過不失。喺三中堅體系中佢會同山齊士進行輪換,因為呢兩位球員係同一類球員,有速度、有身位,可以擔任三中堅之中嘅邊中堅,而坦根加稍為佔優嘅原因就係佢喺戰術執行、穩定性方面應該較山齊士好。

至於不知不覺間已經喺熱刺効力咗七個球季嘅戴亞,近幾季表現每況愈下,但作為熱刺陣中英超經驗最多嘅中堅,相信干地會希望佢以自身經驗喺適當時候帶領後防線。

圖片來源:英超官方網站 (https://www.premierleague.com/match/66439)

翼衛:列古朗、艾馬臣
左右翼衛嘅人選相信毫無懸念,會由列古朗 (Sergio Reguilón)、艾馬臣 (Emerson Royal) 擔任正選。熱刺兩閘位置嚴格嚟講分別都只有兩名球員,左閘係列古朗、賓戴維斯,前者不論防守、穩定性及進攻能力都比後者優秀,係左翼衛必然正選;而右閘人選喺坦根加出任中堅後就係艾馬臣、杜靴迪 (Matt Doherty) 之爭,前者喺比賽中雖然並冇太多出眾表現,但亦展示出自己紮實嘅基本功及一定嘅助攻能力,相比起從狼隊加盟後患得患失兼久疏戰陣嘅杜靴迪,將會成為球隊正選右翼衛。

中前場
中場排陣將會較為複雜,因為會直接影響到球隊到底係踢 3-4-3 (雙中場) 抑或 3-5-2 (三中場),而且仲會左右前鋒球員嘅位置、戰術安排。不論係 3-4-3 抑或 3-5-2,干地對中場球員嘅要求係做到三樣嘢:第一係破壞對方傳球、搶奪球權,第二係掌控球隊節奏、轉守為攻,第三係體能充足、既可防守又可進攻嘅 box-to-box。

圖片來源:英超官方網站 (https://www.premierleague.com/match/66409)

靴爾堡 (Pierre-Emile Højbjerg) 將會係中場嘅重要人物,佢既可以逗後作為防中,亦可以勝任 box-to-box 嘅工作,令干地喺調兵遣將時有更大彈性。雙中場情況下佢可以隨時切換角色,而佢身邊嘅拍檔就會係負責創造攻勢嘅盧施素 (Giovani Lo Celso) 或尼當比利 (Tanguy Ndombele),前線三子哈利簡尼 (Harry Kane)、孫興慜 (Son Heung-Min) 及盧卡斯姆拿 (Lucas Moura) 就可以悉數上陣,前者居中、後兩者打邊。


3-4-1-2 亦係一個可行嘅方法,原有嘅兩名中場再加上專注負責防守嘅史基比 (Oliver Skipp),分擔靴爾堡壓力並增加中場控制力,雙箭頭則會變為哈利簡尼搭配孫興慜或盧卡斯姆拿。雖然熱刺季初曾以孫興慜出任單箭頭效益不大,但若然同哈利簡尼互相配合打雙箭頭就唔同講法,畢竟上季熱刺就有一段時間係打雙箭頭,亦造就咗上季兩者成為最佳拍檔嘅一時佳話。

總結
相信熱刺要「回血」仍然需要一段時間,干地當務之急係要幫助哈利簡尼重拾狀態、信心,並且喺冬季轉會期清理冗員、收購有實力而適合戰術嘅球員。熱刺下場聯賽將會作客對近期同樣經歷低潮嘅愛華頓,到底干地會點樣施展渾身解數帶領熱刺走出低谷,相信唔少球迷都好期待。

如果喜歡我們的文章,請即分享到︰

標籤: 英超  熱刺  干地  紐奴  哈利簡尼  孫興慜  

留言


請按此登錄後留言。未成為會員? 立即註冊
    快捷鍵:←
    快捷鍵:→