兵法大戰 (利物浦對阿仙奴賽後分析)

黑仔講波 於 23/11/2021 發表 收藏文章
圖片來源:Sky Sports (https://www.skysports.com/football/liverpool-vs-arsenal/446401)
今個星期另一場焦點賽事係利物浦對阿仙奴。上場被韋斯咸打破聯賽不敗之身嘅利物浦今仗定必希望以一場勝仗重回正軌;而阿仙奴則挾聯賽三連勝之勢作客挑戰利物浦。

利物浦今場依舊以 4-3-3 出戰,左閘由斯米卡斯代替受傷嘅羅拔臣 (Andrew Robertson) 出任正選;三人中場線由泰亞高、法賓奴、張伯倫組成,作為防線前嘅屏障之餘亦支援前線三叉戟文尼、祖達、沙拿進攻。

利物浦正選陣容
GK1 艾利臣 Alisson Becker
LB 21斯米卡斯 Konstantinos Tsimikas
CB4 雲迪克 Virgil van Dijk
CB32馬迪普 Joël Matip
RB66亞歷山大阿諾 Trent Alexander-Arnold
CM6 泰亞高 Thiago Alcántara (84' 由摩頓 Tyler Morton 入替)
CM3 法賓奴 Fabinho
CM15張伯倫 Alex Oxlade-Chamberlain (76' 由佐敦軒達臣 Jordan Henderson 入替)
FW10文尼 Sadio Mané
FW20迪奧高祖達 Diogo Jota (76' 由南野拓實 Takumi Minamino 入替)
FW11沙拿 Mohamed Salah

今場阿迪達並冇喺陣容上作出任何變動,都係沿用近期常用嘅人腳,希望乘住近期聯賽三連勝嘅氣勢及狀態作客晏菲路取分。

阿仙奴正選陣容
GK32藍斯度 Aaron Ramsdale
LB 20泰華利斯 Nuno Tavares
CB 6 加比爾 Gabriel
CB 4 賓韋特 Ben White
RB18富安健洋 Takehiro Tomiyasu
LM10史密夫路 Emile Smith-Rowe
CM23洛岡加 Albert Sambi Lokonga (53‘ 由美倫尼爾斯 Ainsley Maitland-Niles 入替)
CM5 帕迪 Thomas Partey (84‘ 由艾蘭尼 Mohamed Elneny 入替)
RM7 沙卡 Bukayo Saka
SS 9 拿卡錫迪 Alexandre Lacazette (67’ 由奧迪加特 Martin Ødegaard 入替)
FW14奧巴美揚 Pierre-Emerick Aubameyang

利物浦 – 贏波方程式
今仗利物浦其實並無作出任何特別部署,只係保持自己一貫嘅風格,加上球員狀態、把握力皆好,造就一場大勝。

圖片來源:阿仙奴官方 YouTube (https://www.youtube.com/watch?v=OLMArydz7Xo)

進攻時偽中鋒迪奧高祖達會回後至中場協助組織,一方面可以 overload 對手雙中場,另一方面亦可拉走對方後衛,讓兩名翼鋒文尼、沙拿有更多空位發揮佢哋嘅速度,第三個入球正正係用呢個方法組織 (如上圖所示)。

圖片來源:英超官方網站 (https://www.premierleague.com/match/66455)

此外,利物浦中前場有系統嘅逼搶亦係佢哋嘅拿手好戲。雖然阿仙奴鍾意打後場組織,但其實佢哋缺乏一啲用球能力好而且穩陣嘅球員,難以破解利物浦嘅前場逼搶,而且容易因受壓而犯錯,第二個入球正正係利物浦嘅逼搶令阿仙奴左閘泰華利斯犯錯,傳失咗俾迪奧高祖達,俾後者為主隊拉開比數。

不過防守同樣維持一貫風格:中前場失控球後兩閘係對方反擊嘅主要位置。雖然利物浦主導比賽,但阿仙奴間中嘅反擊亦甚具威脅。由於利物浦進攻時雙閘都會壓得好前助攻,一失去控球權後雙閘好易就會回唔切防,被對手利用佢哋防守位置嘅空間,甚至直接面對中堅。若非今場阿仙奴前線球員把握力不足,相信利物浦都好難零封對手。

阿仙奴 – 部署不足
圖片來源:英超官方網站 (https://www.premierleague.com/match/66455)

今場阿仙奴依舊以 4-4-1-1 (或 4-4-2) 陣式出戰,進攻上睇得出有因為對手係利物浦而作出部署。由於利物浦係踢 4-3-3,加上左右閘慣常壓上助攻,邊路防守容易出現空位或人手不足嘅情況,故此阿仙奴今場主力攻擊對方邊路,尤其是雙閘身後位置,透過左右翼史密夫路、沙卡配合雙閘及前鋒 overload 對手。可惜今場比賽阿仙奴球員把握力平平,未能將反擊機會轉化成入球。

然而,阿仙奴防守上就出現唔少問題。首先,利物浦嘅 4-3-3 陣式本身中場中路就會有人數優勢,而且利物浦中鋒位置嘅球員不論係費明奴 (Roberto Firmino)、迪奧高祖達抑或係今場後備入替嘅南野拓實都慣常回後至中場攞波,導致阿仙奴中場中路長期處於 2 打 3 甚至 2 打 4 嘅情況。雖然今場拿卡錫迪身處接近進攻中場位置,但始終前鋒出身嘅佢都唔慣要回防至咁深位置,對中場防守幫助有限。再者,當利物浦中鋒由前鋒位置回後攞波時,負責防守嘅阿仙奴中堅就會被拉走,變相身後出現空位,利物浦一對翼鋒文尼、沙拿把握速度上嘅優勢經常殺入呢啲心臟位置,製造威脅。

總結
雖然今場利物浦收穫一場大勝,但左右閘防守問題依舊,雙閘亞歷山大阿諾、斯米卡斯 (或羅拔臣) 的確有好強嘅助攻能力,但畢竟攻守之間仍然需要搵到一個平衡點;阿仙奴雖然連勝紀錄告終,但今場佢哋總算踢得出賽前部署,只係把握力不足及後防失誤導致一場未能破蛋嘅大敗,希望今場嘅失誤唔會為佢哋後防帶嚟信心危機,可以延續之前嘅好狀態。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  利物浦  阿仙奴  文尼  祖達  沙拿  南野拓實  

留言


請按此登錄後留言。未成為會員? 立即註冊
    快捷鍵:←
    快捷鍵:→