你有張良計,我有過牆梯 (車路士對熱刺賽後分析)

黑仔講波 於 24/01/2022 發表 收藏文章
圖片來源:英超官方網站 (https://www.premierleague.com/match/66564)
兩軍一個月內第三次交戰,月初喺聯賽盃四強嘅賽事車路士兩回合都擊敗兼零封熱刺,連同聯賽首循環嘅賽事,車路士今季已經三殺熱刺。

繼上場對白禮頓後杜曹再次排出四後衛陣式,以 4-1-4-1 (或 4-3-3) 出戰。沙亞繼續正選上陣,今場客串左閘,中堅由泰亞高施華、魯迪加出任,右閘則為艾斯比列古達;中場方面佐真奴逗得較深,主要喺防中位置出現,而高華錫、蒙特則較前,於進攻上有較大參與,左右翼則為赫臣奧度爾、薛耶治,正選中鋒繼續由盧卡古擔任。

車路士正選陣容
GK 1 阿列沙巴拿加 Kepa Arrizabalaga
LB 31沙亞 Malang Sarr
CB 6 泰亞高施華 Thiago Silva
CB 2 魯迪加 Antonio Rüdiger
RB 28艾斯比列古達 Cesar Azpilicueta
CDM5佐真奴 Jorginho (73’ 由簡迪 N’Golo Kanté 入替)
LM 20赫臣奧度爾 Callum Hudson-Odoi (87’ 由馬高斯阿朗素 Marcos Alonso 入替)
CM 8 高華錫 Mateo Kovačić
CM 19蒙特 Mason Mount
RM 22薛耶治 Hakim Ziyech (90’ 由沙奧尼古斯 Saúl Ñíguez 入替)
FW 9 盧卡古 Romelu Lukaku

無獨有偶,干地今場同樣排出四後衛陣式,以 4-4-2 出戰。賓戴維斯回歸左閘位置,中堅由山齊士及傷癒復出嘅戴亞擔任,右閘則由坦根加客串;靴爾堡、哈利榮斯聯手出任中場,左右翼則為踢慣翼衛嘅施斯隆、杜靴迪;雙箭頭除咗有哈利簡尼之外,仲有上場補時連入兩球協助球隊反勝嘅功臣貝格雲。

熱刺正選陣容
GK1 洛里斯 Hugo Lloris
LB 33賓戴維斯 Ben Davies
CB6 山齊士 Davinson Sánchez
CB15戴亞 Eric Dier
RB25坦根加 Japhet Tanganga (57’ 由史基比 Oliver Skipp 入替)
LM19施斯隆 Ryan Sessegnon (56’ 由盧卡斯姆拿 Lucas Moura 入替)
CM5 靴爾堡 Pierre-Emile Højbjerg
CM8 哈利榮斯 Harry Winks (89’ 由基爾 Bryan Gil 入替)
RM2 杜靴迪 Matt Doherty
FW23貝格雲 Steven Bergwijn
FW10哈利簡尼 Harry Kane

今場雙方排出陣容後都展示出好明確嘅戰術風格:杜曹同干地都係用開三後衛嘅領隊,兩軍交鋒兩次後今場明顯都想避免對方利用翼衛身後空位打反擊而排出四後衛,更各自以中堅沙亞、坦根加客串左、右閘加強防守。中場方面杜曹排出佐真奴、高華錫、蒙特呢個較進取嘅組合,試圖喺中路取得人數優勢;干地安排翼衛出任左右翼則反映出今場佢想打防守反擊,雙箭頭之中哈利簡尼會回後幫手分波,貝格雲則於最前隨時發揮速度打反擊。

車路士 – 運轉流暢
車路士今場透過頻繁嘅轉邊拉扯熱刺防線,以呢個方式將中場中嘅人數優勢最大化。進攻時,車路士多數會由佐真奴逗後,高華錫、蒙特分別與左右翼赫臣奧度爾、薛耶治配合,分別攻擊熱刺嘅邊路及 half space,令熱刺嘅一對翼都需要退到落後防線協助防守,變相中場中只係剩翻靴爾堡、哈利榮斯,覆蓋範圍十分有限,呢個時候車路士透過快速轉邊就可以把握邊路防守嘅空位。
圖片來源:車路士官方 YouTube (https://www.youtube.com/watch?v=WNmsp8fIPuY)

以車路士先開紀錄一球為例,車路士先係從左路推進,熱刺防線整體跟住橫移,赫臣奧度爾切入中路時高華錫拉邊引走熱刺右閘坦根加,等赫臣奧度爾可以直接面對對手中堅戴亞。同時我哋可以留意到盧卡古只係一個人就已經同時吸引咗熱刺中堅山齊士、左閘賓戴維斯嘅防守,蒙特喺身後無人看管,而薛耶治則一直身處於熱刺左翼施斯隆嘅盲眼位。

隨後薛耶治走翻出嚟接應赫臣奧度爾傳球,攞波一刻清楚見到熱刺一對中場靴爾堡、哈利榮斯橫移嘅速度完全跟唔上車路士嘅轉邊,薛耶治得以同施斯隆一對一。呢個時候蒙特同後上嘅艾斯比列古達馬上拉邊,限制並擾亂施斯隆,令佢唔知應該 mark 邊個好,薛耶治則把握住呢個因施斯隆猶豫咗一瞬間而出現嘅破綻射入一球世界波,為球隊先開紀錄。

熱刺 – 反擊乏力
圖片來源:英超官方網站 (https://www.premierleague.com/match/66564)

從熱刺今場嘅正選陣容都可以知道佢哋打算以防守為主、一分都收貨,4-4-2 陣式除咗四後衛外連左右翼都由本身踢開閘或翼衛嘅施斯隆、杜靴迪擔任,防守時陣形盡量收窄,壓縮中路空間,防止對手從中路突破;應付兩邊防守時左右翼會回得更深協助兩閘防守,確保有足夠球員同時防守邊路及 half space。呢個戰術喺上半場尚算成功,熱刺成功保住 0:0 進入更衣室。

但下半場一開波熱刺就被對手透過快速轉邊創造出嘅人數優勢打破缺口,干地見狀亦好快收起施斯隆及今場表現麻麻嘅坦根加,換入史基比、盧卡斯姆拿改踢 4-3-3。可惜不論係 4-4-2 或 4-3-3,熱刺始終欠缺具創造力嘅中場,未能撕破車路士嘅防線;即使想打反擊,熱刺可以策動反擊嘅球員根本唔多,喺車路士後衛嘅貼身防守下難以成功,雖然換入盧卡斯姆拿令球隊增多一個突破點,但要穿越車路士穩健、整齊嘅防線亦非易事。而當車路士喺 73 分鐘以簡迪入替佐真奴時,今場比賽基本上都可以宣佈完結。

總結
車路士再次零封熱刺,今季第四度擊敗對手,同時中止咗干地帶領熱刺喺英超嘅不敗走勢。從今場嘅排兵佈陣、戰術調動都可以見到雙方領隊準備充足,經過一番互相猜度、較量下,最終車路士依然技高一籌,成功取得勝利,終止球隊聯賽四場不勝嘅走勢之餘亦為球隊打下一枝強心針,因為佢哋嚟緊將會以歐聯冠軍嘅身份出戰世界冠軍球會盃。熱刺聯賽不敗走勢告終後正好迎嚟一個短暫休息嘅時間,進攻主力孫興慜 (Son Heung-Min) 有望喺下輪復出,同時球隊亦有望簽入新球員,且看熱刺能否調整狀態,重回勝軌。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  車路士  熱刺  薛耶治  泰亞高施華  

留言


請按此登錄後留言。未成為會員? 立即註冊
    快捷鍵:←
    快捷鍵:→