天下武功唯快不破 2 (車路士對利物浦賽後分析)

黑仔講波 於 03/01/2022 發表 收藏文章
圖片來源:英超官方網站 (https://www.premierleague.com/match/66544)
頭場星期六睇完阿仙奴對曼城之後,星期日晚又再有一場大戰,由車路士喺主場對利物浦。今場比賽節奏明快,兩隊都快上快落,實在刺激,同首循環一樣,所以筆者連個標題都係同首循環嘅利物浦對車路士賽後分析一樣:天下武功唯快不破。

車路士排出 3-4-2-1 出戰,三中堅有魯迪加、泰亞高施華、查洛巴出任正選,而一對正選翼衛列斯占士 (Reece James)、捷維爾 (Ben Chilwell) 都因傷缺陣,後者更有機會提早收咧,車路士後防人手可以話係捉襟見肘,今場則以馬高斯阿朗素、艾斯比列古達出任左右翼衛;高華錫、簡迪聯手出任雙中場負責掃蕩、組織,靠前少少嘅有普列錫、蒙特,支援箭頭夏維斯進攻。

車路士正選陣容
GK 16文迪 Edouard Mendy
CB 2 魯迪加 Antonio Rüdiger
CB 6 泰亞高施華 Thiago Silva
CB 14查洛巴 Trevoh Chalobah (70’ 由佐真奴 Jorginho 入替)
LWB3馬高斯阿朗素 Marcos Alonso
CM 8 高華錫 Mateo Kovacic
CM 7 簡迪 N’Golo Kanté
RWB28艾斯比列古達 Cesar Azpilicueta
CAM10普列錫 Christian Pulisic
CAM19蒙特 Mason Mount
ST 29夏維斯 Kai Havertz (79’ 由赫臣奧度爾 Callum Hudson-Odoi 入替)

利物浦依舊排出 4-3-3 迎戰,正選門將艾利臣因感染武漢肺炎而未能出戰,利物浦改由基拿夏把守最後一關;後防線上左閘斯米卡斯繼續取代停賽嘅羅拔臣 (Andrew Robertson) 嘅正選位置,干拿迪亦代替馬迪普 (Joël Matip) 成為雲迪克嘅中堅拍檔,加上亞歷山大阿諾組成四人防線;三中場方面有占士米拿、法賓奴、佐敦軒達臣;而三前鋒繼續有文尼、迪奧高祖達、沙拿。

利物浦正選陣容
GK62基拿夏 Caoimhín Kelleher
LB 21斯米卡斯 Konstantinos Tsimikas
CB 4 雲迪克 Virgil van Dijk
CB 5 干拿迪 Ibrahima Konaté
RB66亞歷山大阿諾 Trent Alexander-Arnold
CM7 占士米拿 James Milner (69' 由拿比基達 Naby Keïta 入替)
CM3 法賓奴 Fabinho
CM14佐敦軒達臣 Jordan Henderson
FW10文尼 Sadio Mané (90’ 由居迪斯鍾斯 Curtis Jones 入替)
FW20迪奧高祖達 Diogo Jota (69' 由張伯倫 Alex Oxlade-Chamberlain 入替)
FW11沙拿 Mohamed Salah

高位逼搶、快速反擊
雖然兩隊陣容、球員唔同,但佢哋嘅踢法甚至係場波嘅走勢都非常類似,就連一開波失誤都係一人一個,只不過車路士未能把握而利物浦則成功把握查洛巴解圍失誤,由文尼先開紀錄。

車路士同利物浦兩隊都係打高位防守,防線會壓得好上,當雙方喺中前場一失去控球權後就會立即進行反搶,故此經常會見到兩隊球員喺中場爭持;當其中一方搶到球權,就會把握對手因高位防守而出現嘅大量後場空位,以長傳直接攻擊呢啲位置,再由靈活、速度快嘅前鋒發揮速度、技術壓入禁區攻門。

圖片來源:車路士官方 YouTube (https://www.youtube.com/watch?v=XWXisCP3p8A)

上圖顯示利物浦第二個入球嘅攻勢。亞歷山大阿諾喺中場直接斬向車路士左閘位置,沙拿突破越位成功接應,馬高斯阿朗素回身想追都追唔切,而值得一提嘅係車路士中堅魯迪加被拉離中堅位置先會導致車路士後防有咁大空位,最終沙拿成功把握,為利物浦拉開比數。

而以下呢一張圖亦展示咗車路士點樣利用利物浦嘅高位防守打反擊。當時亞歷山大阿諾衝前以頭鎚解圍,但個波清得唔遠俾魯迪加一腳踢上前交到簡迪腳下,呢個時候除咗可以見到利物浦嘅後衛壓得好上之外,亦可以見到干拿迪去補亞歷山大阿諾嘅右閘位,中堅位置立即有兩名車路士球員插入。簡迪見狀立即向前傳,普列錫加速殺入禁區,為車路士射入扳平一球。

圖片來源:車路士官方 YouTube (https://www.youtube.com/watch?v=XWXisCP3p8A)

圖片來源:英超官方網站 (https://www.premierleague.com/match/66544)

除咗雙方戰術部署得宜令呢場比賽咁精彩刺激之外,兩名門將都有好高水平嘅表現。主隊門將文迪雖然喺第二球失球當中判斷失誤可以處理得更好,但其後佢亦屢救險球,包括下半場飛身撲走沙拿嘅中距離笠射;基拿夏作為後備門將佢今場嘅表現絕對係可圈可點,一開波救出普列錫嘅單刀、下半場擋走普列錫嘅近門撞射,而所失兩球一球係世界波、一球係單刀,佢都已經盡咗力做齊佢能力範圍內做到嘅嘢。

總結
喺車路士及利物浦激戰賽和後,今輪贏波嘅曼城就漁人得利擴大榜首優勢。車路士受傷兵問題困擾,加上盧卡古因不當言論被雪藏,「解凍」無期,嚟緊仲要有連場大戰 (包括下輪聯賽對曼城),就要睇睇杜曹排兵佈陣及輪換嘅能力;利物浦亦將要面臨主力文尼、沙拿離隊參加非洲盃嘅難題,畢竟佢哋兩個係球隊進攻重心,今場所入兩球亦係由佢哋射入,睇嚟高普亦要諗諗計激活其他進攻球員擔起入球嘅重任。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 車路士  利物浦  高華錫  普列錫  文尼  沙拿  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→