一失足成千古恨 (李斯特城對熱刺賽後分析)

黑仔講波 於 21/01/2022 發表 收藏文章
圖片來源:英超官方網站 (https://www.premierleague.com/match/66507)
英超周中快車尾場,由李斯特城喺主場迎戰熱刺。由於受疫情影響,李城已經連續三場比賽延期,今場係佢哋喺 2022 年嘅第一場比賽,狀態成疑;熱刺雖然喺新領隊干地帶領下喺聯賽連續 8 場不敗,但喺聯賽盃四強就被車路士雙殺兼零入球,今場將會係雙方重拾狀態嘅關鍵一戰。

李斯特城今場以 3-5-2 出戰,後防方面有主力伊雲斯 (Jonny Evans) 因傷缺陣,三中堅由維斯達哥、蘇恩古及客串嘅查祖利出任正選,左右翼衛分別為湯馬仕、艾伯禮頓;中場繼續由杜斯貝利賀爾、泰利文斯、麥迪臣搭檔;前鋒方面華迪 (Jamie Vardy) 因傷缺陣,伊恩拿祖 (Kelechi Iheanacho) 亦要參加非洲國家盃,因此由陸文、達卡擔任正選雙箭頭。

李斯特城正選陣容
GK 1 卡斯柏舒米高 Kasper Schmeichel
CB 23維斯達哥 Jannik Vestergaard
CB 4 蘇恩古 Çağlar Söyüncü
CB 20查祖利 Hamza Choudhury
LWB33湯馬仕 Luke Thomas (53’ 由真仕田 James Justin 入替)
CM 22杜斯貝利賀爾 Kiernan Dewsbury-Hall (88’ 由蘇馬里 Boubakary Soumaré 入替)
CM 8 泰利文斯 Youri Tielemans
CM 10麥迪臣 James Maddison
RWB11艾伯禮頓 Marc Albrighton
FW 37陸文 Ademola Lookman
FW 29達卡 Patson Daka (75’ 由班尼斯 Harvey Barnes 入替)

熱刺同樣以 3-5-2 出戰,三中堅為賓戴維斯、山齊士、坦根加,左右翼衛繼續由列古朗、艾馬臣出任;中場線以工兵型及防守型球員為主,由靴爾堡、哈利榮斯、史基比組成;前鋒方面由於孫興慜 (Son Heung-Min) 因傷缺陣,改由盧卡斯姆拿與哈利簡尼拍檔。

熱刺正選陣容
GK 1 洛里斯 Hugo Lloris
CB 33賓戴維斯 Ben Davies
CB 6 山齊士 Davinson Sánchez
CB 25坦根加 Japhet Tanganga
LWB3列古朗 Sergio Reguilón (79’ 由貝格雲 Steven Bergwijn 入替)
CM 5 靴爾堡 Pierre-Emile Højbjerg
CM 8 哈利榮斯 Harry Winks (74’ 由盧施素 Giovani Lo Celso 入替)
CM 29史基比 Oliver Skipp
RWB12艾馬臣 Emerson Royal (46’ 由杜靴迪 Matt Doherty 入替)
FW 27盧卡斯姆拿 Lucas Moura
FW 10哈利簡尼 Harry Kane

李斯特城 – 邊路推進、高位防線
由於兩隊都係踢 3-5-2 嘅關係,一對翼衛需要頻繁上前助攻,而佢哋壓上後暴露出嚟嘅空位就係雙方嘅主要進攻目標。李斯特城除咗有一對翼衛負責兩邊進攻外,中場亦會拉邊試圖 overload 對手;同時雙箭頭亦會橫移支援,變相會有一人攻擊 half space,另一人喺中鋒位置牽制對手。

圖片來源:熱刺官方 YouTube (https://www.youtube.com/watch?v=WOJ67-ngvMA)

上圖正正係一個李斯特城打反擊嘅例子,而呢個攻勢最終亦為佢哋先開紀錄。從熱刺球員嘅位置可以知道佢哋啱啱攻完一輪:右翼衛艾馬臣未及回防,熱刺後防只能整體向右移,由右中堅坦根加暫時擔任右閘作防守;同時佢哋嘅中場亦回唔切防,同後防之間產生大量空位,令李城球員有機可乘。拉邊嘅中場杜斯貝利賀爾一路推進並交到俾陸文,雖然佢控甩腳,但達卡成功保持控球,中路迅間形成三打三。佢哋甚至可以再傳俾空晒嘅右翼衛艾伯禮頓壓入禁區,不過佢哋最終選擇推入禁區,兩腳短傳後列古朗解圍失誤,達卡成功先開紀錄。

但李城今場嘅致命傷係佢哋嘅防線壓得太前,導致身後有太多空位。正如上文提到,兩隊都係以 3-5-2 出戰,任何一邊失去控球權時兩閘位置都一定有大量空位;而且李城後防壓得前之餘佢哋嘅中堅維斯達哥轉身慢,若然對手俾到直線後防可以立即宣佈打少一個,高位防線嘅佈陣今場就間接引致李城兩個失球。

熱刺 – 邊路推進、中路強攻
同李斯特城一樣,喺 3-5-2 陣式下嘅熱刺兩隻翼衛都會壓前助攻,但由於中場創造力不足,好多時都要哈利簡尼回後組織,進攻方向因而轉為中路,但喺正常組織進攻或陣地戰嘅情況下李斯特城中路都有足夠防守,熱刺難以攻入,好多時都以遠射作結,成脅有限。

圖片來源:熱刺官方 YouTube (https://www.youtube.com/watch?v=WOJ67-ngvMA)

不過由於李城防線企位偏前,熱刺打反擊時除咗兩閘推進之外好多時亦會作出 through pass 嘗試直接打對方身後。好似上圖顯示熱刺追平一球嘅攻勢,當時熱刺成功搶截,畫面上見到李城中堅維斯達哥、查祖利喺中圈位置附近,而其實另一名中堅蘇恩古就喺哈利簡尼附近,不過畫面影唔到佢。維斯達哥嘗試封阻傳俾哈利簡尼嘅傳球路線,同時蘇恩古則走緊出嚟希望以越位陷阱化解呢次攻勢,但佢未走到出嚟嘅時候哈利榮斯已經以一記挑傳俾到哈利簡尼單刀,後者亦成功把握。

圖片來源:熱刺官方 YouTube (https://www.youtube.com/watch?v=WOJ67-ngvMA)

同樣事情喺補時階段再次發生,亦即係貝格雲射入反超前一球嘅攻勢。今次李斯特城嘅防線算冇咁前,但當你要面對一名後備入替、好氣好力而且速度快嘅時候,後場實在有太多空位俾佢發揮,哈利簡尼一個直線俾到李斯防線身後等貝格雲追,三名中堅完全跟唔上,最終貝格雲推過門將卡斯柏舒米高射入,成功協助熱刺反勝。

其實李斯特城完全可以避免呢球失球。撇除防線企位外,導致今個失球嘅原因係李城喺中圈開波後,從中路推進時竟然面對面交失波,將控球權拱手相讓俾熱刺,最後先引致呢個結果。李城球員喺關鍵時候嘅判斷力實在有待改善。

總結
兩軍激戰之下合演咗呢場峰迴路轉嘅比賽,李斯特城後防不穩已成今季常態,而且短時間內連失兩球導致落敗亦好打擊士氣,羅渣士除咗要面對因傷病、非洲國家盃引致嘅人手短缺問題外,如何協助球員調整心態亦係當務之急;熱刺喺干地帶領下聯賽已經 9 場不敗,但下場將會面對喺聯賽盃雙殺佢哋嘅車路士,唔知干地面對舊東家可唔可以帶領熱刺繼續不敗呢?
大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→