拳來腳往 (熱刺對利物浦賽後分析)

黑仔講波 於 20/12/2021 發表 收藏文章
圖片來源:英超官方網站 (https://www.premierleague.com/match/66518)
新一波疫情喺英國爆發,導致啱啱嘅快車期有接近十場比賽需要取消,而據報英超賽會將會喺呢幾日召開會議商討下星期嘅英超比賽安排,有可能會再次因疫情而暫停賽事並於日後再安排補賽。

熱刺因天氣及疫情連續取消咗四場比賽後 (三場聯賽,一場歐洲議會盃) 終於重新開始比賽,今場排出 3-5-2 出戰,三中堅位置上繼續有賓戴維斯、迪亞、山齊士,左右翼衛則由施斯隆、艾馬臣出任;中場位置有久未正選上陣嘅迪利阿里、哈利榮斯、尼當比利;雙箭頭就繼續由孫興慜夥拍哈利簡尼。

熱刺正選陣容
GK 1 洛里斯 Hugo Lloris
CB 33賓戴維斯 Ben Davies
CB 15戴亞 Eric Dier
CB 6 山齊士 Davinson Sánchez
LWB19施斯隆 Ryan Sessegnon (86’ 由列古朗 Sergio Reguilón 入替)
CM 20迪利阿里 Dele Alli (81’ 由盧卡斯姆拿 Lucas Moura 入替)
CM 8 哈利榮斯 Harry Winks
CM 28尼當比利 Tanguy Ndombele (64’ 由史基比 Oliver Skipp 入替)
RWB12艾馬臣 Emerson Royal
FW 7 孫興慜 Son Heung-Min
FW 10哈利簡尼 Harry Kane


利物浦沿用 4-3-3 出戰,後防有干拿迪取代因病缺陣嘅雲迪克 (Virgil van Dijk) 出任正選,與羅拔臣、馬迪普、亞歷山大阿諾組成四人防線;中場線同樣受傷病困擾,上場正選泰亞高 (Thiago Alcántara)、法賓奴 (Fabinho)、佐敦軒達臣 (Jordan Henderson) 悉數缺陣,高普只好以占士米拿、拿比基達及年青球員摩頓組成中場線;三前鋒則繼續有文尼、迪奧高祖達、沙拿負責入球任務。

利物浦正選陣容
GK1 艾利臣 Alisson Becker
LB 26羅拔臣 Andrew Robertson
CB5 干拿迪 Ibrahima Konaté
CB32馬迪普 Joël Matip
RB66亞歷山大阿諾 Trent Alexander-Arnold
CM7 占士米拿 James Milner
CM80摩頓 Tyler Morton (60' 由費明奴 Roberto Firmino 入替)
CM8 拿比基達 Naby Keïta
FW10文尼 Sadio Mané (82' 由斯米卡斯 Konstantinos Tsimikas 入替)
FW20迪奧高祖達 Diogo Jota (90' 由祖高美斯 Joe Gomez 入替)
FW11沙拿 Mohamed Salah


熱刺 – 防守反擊、高位逼搶
圖片來源:英超官方網站 (https://www.premierleague.com/match/66518)

今場比賽熱刺球員喺戰術執行上有出色表現,喺防守反擊及高位逼搶兩者之間轉換得流暢、合宜。比賽初段利物浦反客為主壓住熱刺嚟攻,熱刺只好全軍退守,喺整體防守加上門將洛里斯出色演出下成功抵禦利物浦嘅攻勢。當利物浦攻勢、壓逼力度放緩後熱刺就轉守為攻,加強中前場攔截,先開紀錄一球正正係利物浦後場解圍後哈利榮斯截下皮球交俾尼當比利,後者再送出一記直線助攻哈利簡尼入球。

圖片來源:英超官方網站 (https://www.premierleague.com/match/66518)

落後一球後嘅利物浦立即加強進攻,熱刺亦唔急,將整體陣形退後引利物浦所有球員壓上進攻,一旦成功防守,不論係後衛戴亞抑或中場哈利榮斯、尼當比利就會以長傳直接攻擊利物浦空虛嘅後防,俾孫興慜同哈利簡尼去追,亦製造到唔少黃金機會,可惜孫興慜、哈利簡尼、迪利阿里連番失機,否則早應已拉開比數。

喺干地帶領下熱刺防守表現的確有改善,今場擔任正選嘅三人中場迪利阿里、哈利榮斯、尼當比利皆以頻密嘅跑動作出壓逼及遮線防守,而施斯隆更係貼身防守沙拿將後者嘅威脅減至最低;不過干地戰術對體需求極高,導致球員喺比賽中後段漸露疲態,不論速度、強度上都有所下降,相信亦係干地接下來需要解決嘅問題。

利物浦 – 大開大合
正如上文提到,利物浦喺比賽初段反客為主不斷搶攻,務求先開紀錄,但當佢哋久攻下時一眾球員就會不自覺越壓越上,導致後場有好多空位被對手利用打反擊;同時,利物浦球員反擊意識極強,成功防守、解圍後球員就會以極快速度向外擴散,喺呢個情況下佢哋就需要確保能夠將皮球傳至隊友腳上,否則將會變成一個致命失誤,就好似第一個失球嘅情況:

圖片來源:熱刺官方 YouTube (https://www.youtube.com/watch?v=Wsr_Y5lmy-o)

當時利物浦解圍,但傳波俾拿比基達時唔到腳,喺五五波嘅情況下哈利榮斯準確攔截成功搶回球權,熱刺得以重新組織攻勢。而從上圖可見當時利物浦正係重組緊防線,三中場完全失位未能作為防線前嘅屏障,加上熱刺轉邊進攻,放大三中場防守時因闊度不足而未能覆蓋邊路或 half space 嘅缺點,尼當比利因而有充足時間睇定,傳出一球靚直線俾哈利簡尼打破入球荒。

圖片來源:英超官方網站 (https://www.premierleague.com/match/66518)

但亦正正係呢種咁強嘅進攻欲望利物浦先能夠扳平,羅拔臣、亞歷山大阿諾呢一對閘與中場、翼鋒嘅配合進攻非常熟練,為對手帶來極大威脅,佢哋透過不斷而且不同嘅走位擾亂對手防守球員,使己隊進攻更立體,令對手防不勝防,當中羅拔臣更取得一入球一助攻,若非領紅出場,佢絕對有機會當選今場嘅 Man of The Match。

總結
熱刺自干地上任後喺五場聯賽取得三勝二和嘅不敗戰績,當中亦有三場成功保持清白之身,下半季嘅表現絕對值得期待;利物浦今仗被逼和後六連勝走勢告終,球隊喺比賽之中仍然展現出控制戰局嘅能力,喺幾位主力缺陣嘅情況下亦能夠全身而退。根據原定賽程兩軍下場皆會喺主場出擊,分別迎戰水晶宮、列斯聯,不過最終係照踢抑或延期仍然要等待英超賽會開會後先有定論。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

留言


請按此登錄後留言。未成為會員? 立即註冊
    快捷鍵:←
    快捷鍵:→